ಇಂಡೋ-ಬಾಂಗ್ಲಾ ಜಲಸಾರಿಗೆ

ಅಗರ್ತಲಾ: ಭಾರತ ಮತ್ತು ಬಾಂಗ್ಲಾದೇಶ ನಡುವಿನ ಒಳನಾಡು ಜಲಸಾರಿಗೆ ಪ್ರಾಯೋಗಿಕವಾಗಿ ಆರಂಭಗೊಂಡಿದೆ. ಬಾಂಗ್ಲಾದೇಶದಿಂದ ಹೊರಟ 50 ಮೆಟ್ರಿಕ್‌ ಟನ್‌ ಸಿಮೆಂಟು ಸರಕು ಹೊತ್ತ ದೋಣಿ ತ್ರಿಪುರಾದ ಸೋನಾಮುರ ಬಂದರನ್ನು ತಲುಪಲಿದೆ.

ತ್ರಿಪುರಾಕ್ಕೆ ಆಗಮಿಸುವ ಈ ದೋಣಿಯನ್ನು ಕೇಂದ್ರ ಸಚಿವ ಮನ್‌ಸುಖ್‌ ಮಾಂಡವಿಯಾ ನವದೆಹಲಿಯಿಂದ ವಿಡಿಯೊ ಕಾನ್ಫರೆನ್ಸ್‌ನಲ್ಲಿ ಸ್ವಾಗತಿಸಲಿದ್ದಾರೆ. ಇಲ್ಲಿಯ ತನಕ ಭೂಮಾರ್ಗಗಳ ಮೂಲಕ ಈಶಾನ್ಯ ರಾಜ್ಯ ತ್ರಿಪುರಾಕ್ಕೆ ಸರಕು ಸಂಚಾರ ನಡೆಸಲಾಗುತ್ತಿತ್ತು. ಈ ಸಾಗಾಟ ದುಬಾರಿಯಾದ ಕಾರಣ, ಬಾಂಗ್ಲಾ ಬಂದರುಗಳನ್ನು ಬಳಸಿಕೊಂಡು ಒಳನಾಡು ಜಲಮಾರ್ಗಗಳ ಮೂಲಕ ತ್ರಿಪುರಾಕ್ಕೆ ಸರಕು ಸಾಗಿಸಲು ಕೇಂದ್ರ ಸರ್ಕಾರ ಯೋಜಿಸಿತ್ತು.

ಮೇ ತಿಂಗಳಿನಲ್ಲಿ “ಇಂಡೋ- ಬಾಂಗ್ಲಾ ಪ್ರೊಟೊ ಕಾಲ್‌’ (ಐಬಿಪಿ) ಮಾರ್ಗಗಳಿಗೆ ಸೋನಾಮುರ (ತ್ರಿಪುರಾ)- ದೌಡ್ಕಂಡಿ (ಬಾಂಗ್ಲಾದೇಶ) ಜಲ ಮಾರ್ಗ ವನ್ನು ಸೇರಿಸುವ ಒಪ್ಪಂದಕ್ಕೂ ಉಭಯ ರಾಷ್ಟ್ರಗಳು ಸಹಿಹಾಕಿದ್ದವು.

ಗೋಮತಿ- ಮೇಘನಾ: ಬಾಂಗ್ಲಾದೇಶ ಅಧಿಕಾರಿಗಳ ಸರ್ವೇ ಪ್ರಕಾರ, ಸೋನಾಮುರಾ- ದೌಡ್ಕಂಡಿ ಪ್ರೊಟೊಕಾಲ್‌ ಮಾರ್ಗ 90 ಕಿ.ಮೀ.ಗಳಲ್ಲಿ 89.5 ಕಿ.ಮೀ. ಬಾಂಗ್ಲಾದೇಶದಲ್ಲಿಯೇ ಬರುತ್ತದೆ. ತ್ರಿಪುರಾದ ಗೋಮತಿ ನದಿ, ಬಾಂಗ್ಲಾದೇಶದ ಮೇಘನಾ ನದಿ ಮೂಲಕ ಭಾರತದ ರಾಷ್ಟ್ರೀಯ ಜಲಮಾರ್ಗಗಳೊಂದಿಗೆ ಸಂಪರ್ಕ ಬೆಸೆಯುತ್ತದೆ.