ವನಿತಾ ಹಾಕಿ: ಭಾರತ-ಸ್ಪೇನ್‌ 2-2-ಸಮಬಲದ ಹೋರಾಟ

ಮ್ಯಾಡ್ರಿಡ್‌: ನಾಯಕಿ ರಾಣಿ ರಾಮ್‌ಪಾಲ್‌ ಮತ್ತು ಡಿಫೆಂಡರ್‌ ಗುರ್ಜಿತ್‌ ಕೌರ್‌ ಅವರ ಅವಳಿ ಗೋಲುಗಳ ನೆರವಿನಿಂದ ಭಾರತ ವನಿತೆಯರು ಸ್ಪೇನ್‌ ವಿರುದ್ಧ ನಡೆದ ಐದನೇ ಹಾಕಿ ಪಂದ್ಯದಲ್ಲಿ 4-1 ಗೋಲುಗಳಿಂದ ಜಯಭೇರಿ ಬಾರಿಸಿದೆ. ಇದರಿಂದಾಗಿ ಐದು ಪಂದ್ಯಗಳ ಹಾಕಿ ಸರಣಿ 2-2 ಸಮಬಲದಲ್ಲಿ ಅಂತ್ಯಗೊಂಡಿದೆ.

ಚೆಂಡಿನ ನಿಯಂತ್ರಣ ಮತ್ತು ಗೋಲು ಹೊಡೆಯುವ ಅವಕಾಶದಲ್ಲಿ ಭಾರತ ಪಂದ್ಯದಲ್ಲಿ ಪ್ರಾಬಲ್ಯ ಮೆರೆಯಿತು. ನಾಯಕಿ ರಾಣಿ 33 ಮತ್ತು 37ನೇ ನಿಮಿಷದಲ್ಲಿ ಗೋಲು ದಾಖಲಿಸಿ ಸಂಭ್ರಮಿಸಿದರೆ ಗುರ್ಜಿತ್‌ 44 ಮತ್ತು 50ನೇ ನಿಮಿಷದಲ್ಲಿ ಪೆನಾಲ್ಟಿ ಕಾರ್ನರ್‌ ಅವಕಾಶದಲ್ಲಿ ಗೋಲನ್ನು ಹೊಡೆದು ತಂಡದ ಭಾರೀ ಅಂತರದ ಗೆಲುವಿಗೆ ಕಾರಣರಾದರು. ಸ್ಪೇನ್‌ನ ಏಕೈಕ ಗೋಲನ್ನು ಲೋಲಾ ರೀರಾ 58ನೇ ನಿಮಿಷದಲ್ಲಿ ಹೊಡೆದರು.