ಯುಎಸ್ ವಿಮಾನ ನಿಲ್ದಾಣದಲ್ಲಿ ಬಸ್ ಢಿಕ್ಕಿ ; ಭಾರತೀಯ ಮೂಲದ ವ್ಯಕ್ತಿ ಮೃತ್ಯು

ನ್ಯೂಯಾರ್ಕ್: ಬೋಸ್ಟನ್‌ನ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಸ್ನೇಹಿತನನ್ನು ಕರೆದುಕೊಂಡು ಬರಲು ಹೋಗಿದ್ದ 47 ವರ್ಷದ ಭಾರತೀಯ ಮೂಲದ ಅಮೆರಿಕನ್ ಡೇಟಾ ವಿಶ್ಲೇಷಕರೊಬ್ಬರು ಬಸ್‌ ಢಿಕ್ಕಿ ಹೊಡೆದು ಸ್ಥಳದಲ್ಲೇ ಸಾವನ್ನಪ್ಪಿದ್ದಾರೆ ಎಂದು ಮಾಧ್ಯಮ ವರದಿ ತಿಳಿಸಿದೆ.

ಆಂಧ್ರಪ್ರದೇಶ ಮೂಲದ ವಿಶ್ವಚಂದ್ ಕೊಲ್ಲಾ ಅವರು ಟಕೆಡಾ ಫಾರ್ಮಾಸ್ಯುಟಿಕಲ್ ಕಂಪನಿಯಲ್ಲಿ ಉದ್ಯೋಗಿಯಾಗಿದ್ದರು. ಮಾರ್ಚ್ 28 ರಂದು ಈ ಘಟನೆ ನಡೆದಾಗ ಅವರು ಬೋಸ್ಟನ್‌ನ ಲೋಗನ್ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ  ಸಂದರ್ಶಕ,  ಸಂಗೀತಗಾರ ಸ್ನೇಹಿತನನ್ನು ಕರೆದುಕೊಂಡು ಹೋಗುತ್ತಿದ್ದರು ಎಂದು ಯುಎಸ್ ಮಾಧ್ಯಮ ವರದಿ ತಿಳಿಸಿದೆ.

ಕೊಲ್ಲಾ ತನ್ನ ಅಕ್ಯುರಾ ಎಸ್‌ಯುವಿಯ ಚಾಲಕನ ಬದಿಯಲ್ಲಿ ನಿಂತಿದ್ದಾಗ, ಅದೇ ಸಮಯದಲ್ಲಿ, ಡಾರ್ಟ್‌ಮೌತ್ ಟ್ರಾನ್ಸ್‌ಪೋರ್ಟೇಶನ್ ಮೋಟಾರು ಕೋಚ್ ರಸ್ತೆಮಾರ್ಗದಲ್ಲಿ ಚಲಿಸುತ್ತಿತ್ತು. ಬಸ್‌ ಗುದ್ದಿ ಎಸ್‌ಯುವಿಯ ಚಾಲಕನ ಬದಿಯಲ್ಲಿ ಢಿಕ್ಕಿಯಾಗಿದೆ ಎಂದು ತನಿಖೆಯಲ್ಲಿ ಕಂಡು ಬಂದಿದೆ ಎಂದು ರಾಜ್ಯ ಪೊಲೀಸ್ ವಕ್ತಾರ ಡೇವ್ ಪ್ರೊಕೊಪಿಯೊ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.

ಕರ್ತವ್ಯ ನಿರತ ನರ್ಸ್ ಕೊಲ್ಲಾಗೆ ಸಹಾಯ ಮಾಡಲು ಧಾವಿಸಿದರು ಆದರೆ ಅವರು ಸ್ಥಳದಲ್ಲೇ ಸಾವನ್ನಪ್ಪಿದರು ಎಂದು ತಿಳಿದು ಬಂದಿದೆ.