ಎಸ್‌ಎಫ್ಒ ವೈಮಾನಿಕ ಸಂಗ್ರಹಾಲಯ: ಭಾರತದ ಮಹಿಳಾ ಪೈಲಟ್‌ ಜೊಯಾ ಅಗರ್ವಾಲ್‌ ಗೆ ಸ್ಥಾನ!

ನವದೆಹಲಿ: ಅಮೆರಿಕದ ಪ್ರತಿಷ್ಠಿತ ಎಸ್‌ಎಫ್ಒ ವೈಮಾನಿಕ ಸಂಗ್ರಹಾಲಯದಲ್ಲಿ ಭಾರತೀಯ ಮಹಿಳಾ ಪೈಲಟ್‌ ಜೊಯಾ ಅಗರ್ವಾಲ್‌ ಸ್ಥಾನ ಪಡೆದಿದ್ದಾರೆ.

ಉತ್ತರಧ್ರುವದ ಮೇಲೆ ವಿಮಾನ ಚಲಾಯಿಸಿದ ಭಾರತದ ಮೊದಲ ಮಹಿಳಾ ಪೈಲಟ್‌ ಎನ್ನುವುದು ಅವರ ಹೆಗ್ಗಳಿಕೆ.

ಏರ್‌ ಇಂಡಿಯಾ ಪೈಲಟ್‌ ಆಗಿರುವ ಜೊಯಾ, 2021ರಲ್ಲಿ ಮಹಿಳಾ ಪೈಲಟ್‌ಗಳಿಂದಲೇ ತುಂಬಿದ್ದ ಬೋಯಿಂಗ್‌-777 ವಿಮಾನವನ್ನು ಅಮೆರಿಕದ ಸ್ಯಾನ್‌ಫ್ರಾನ್ಸಿಸ್ಕೊದಿಂದ ಬೆಂಗಳೂರುವರೆಗೆ ಚಲಾಯಿಸಿದ್ದರು. ಇದು ಜಗತ್ತಿನ ಅತಿ ಸುದೀರ್ಘ‌ ವಾಯುಮಾರ್ಗವೆನಿಸಿದೆ. ಇಲ್ಲಿ 16,000 ಕಿ.ಮೀ.ಗಳನ್ನು ಜೊಯಾ ತಂಡ ಕ್ರಮಿಸಿತ್ತು. ಈ ಗೌರವದಿಂದ ಜೊಯಾ ಕೂಡ ಸಂತೋಷಗೊಂಡಿದ್ದಾರೆ.

ಪ್ರಸ್ತುತ ಈ ಸಂಗ್ರಹಾಲಯದಲ್ಲಿ ಸ್ಥಾನ ಪಡೆದಿರುವವರ ಪೈಕಿ ಜೀವಂತವಿರುವ ವ್ಯಕ್ತಿ ನಾನೊಬ್ಬಳೇ ಎನ್ನುವುದು ಅವರ ರೋಮಾಂಚನಕ್ಕೆ ಕಾರಣ. ಇಂತಹದ್ದೊಂದು ಜಾಗದಲ್ಲಿ ನನಗೆ ಜಾಗ ಸಿಗುತ್ತದೆ ಎನ್ನುವುದನ್ನು ಕಲ್ಪಿಸಿಯೂ ಇರಲಿಲ್ಲ ಎಂದು ಅವರು ಹೇಳಿಕೊಂಡಿದ್ದಾರೆ.