ಯು-19 ಏಶ್ಯ ಕಪ್‌: ಪಾಕ್‌ ವಿರುದ್ಧ ಅಂತಿಮ ಎಸೆದಲ್ಲಿ ಎಡವಿದ ಭಾರತ

ದುಬಾೖ: ಅಂಡರ್‌-19 ಏಶ್ಯ ಕಪ್‌ ಕ್ರಿಕೆಟ್‌ ಪಂದ್ಯಾವಳಿಯ ಪಾಕಿಸ್ಥಾನ ವಿರುದ್ಧದ ಪಂದ್ಯದಲ್ಲಿ ಭಾರತ ಅಂತಿಮ ಎಸೆತದಲ್ಲಿ ಎಡವಿದೆ. ಅಹ್ಮದ್‌ ಖಾನ್‌ ಕೊನೆಯ ಎಸೆತದಲ್ಲಿ ಬೌಂಡರಿ ಬಾರಿಸಿ ಪಾಕಿಸ್ಥಾನಕ್ಕೆ 2 ವಿಕೆಟ್‌ಗಳ ರೋಚಕ ಜಯ ತಂದಿತ್ತರು.

ಯುಎಇಯನ್ನು ಮಣಿಸಿದ ಖುಷಿಯಲ್ಲಿದ್ದ ಭಾರತ ಆರಂಭಿಕ ಕುಸಿತದ ಹೊರತಾಗಿಯೂ 49 ಓವರ್‌ಗಳಲ್ಲಿ 237 ರನ್‌ ಗಳಿಸಲು ಯಶಸ್ವಿಯಾಯಿತು. ಪಾಕಿಸ್ಥಾನ 50 ಓವರ್‌ಗಳಲ್ಲಿ 8 ವಿಕೆಟಿಗೆ 240 ರನ್‌ ಬಾರಿಸಿತು.

ಕೊನೆಯ ಎಸೆತಕ್ಕೆ ಫೋರ್‌: ರವಿ ಕುಮಾರ್‌ ಪಾಲಾದ ಕೊನೆಯ ಓವರ್‌ನಲ್ಲಿ ಪಾಕ್‌ ಜಯಕ್ಕೆ 8 ರನ್‌ ಅಗತ್ಯವಿತ್ತು. ಮೊದಲ ಎಸೆತದಲ್ಲೇ ಜೀಶನ್‌ ಜಮೀರ್‌ ವಿಕೆಟ್‌ ಬಿತ್ತು. ಅನಂತರದ 4 ಎಸೆತಗಳಲ್ಲಿ 6 ರನ್‌ ಬಂತು. ಕೊನೆಯ ಎಸೆತವನ್ನು ಅಹ್ಮದ್‌ ಖಾನ್‌ ಬೌಂಡರಿಗೆ ಬಡಿದಟ್ಟಿದರು! ಭಾರತ ಜೀಶನ್‌ ಜಮೀರ್‌ (60ಕ್ಕೆ 5) ದಾಳಿಗೆ ತತ್ತರಿಸಿ 41ಕ್ಕೆ 4 ವಿಕೆಟ್‌ ಕಳೆದುಕೊಂಡಿತು. ಆದರೆ ಒಂದೆಡೆ ಕ್ರೀಸಿಗೆ ಅಂಟಿಕೊಂಡಿದ್ದ ಕಳೆದ ಪಂದ್ಯದ ಶತಕವೀರ ಹರ್ನೂರ್‌ ಸಿಂಗ್‌ 46, ಆರಾಧ್ಯ ಯಾದವ್‌ 50, ಕೌಶಲ್‌ ತಾಂಬೆ 32, ರಾಜ್ಯವರ್ಧನ್‌ 33 ರನ್‌ ಬಾರಿಸಿ ಗೌರವಯುತ ಮೊತ್ತ ತಂದಿತ್ತರು.