‘ಸಿಇಪಿಸಿಗೆ ಪಾಕ್‌ ಭ್ರಷ್ಟಾಚಾರವೇ ದೊಡ್ಡ ಬೆದರಿಕೆ, ಭಾರತ ಅಲ್ಲ’

ನ್ಯೂಯಾರ್ಕ್‌ : ಬಹು ಶತಕೋಟಿ ಡಾಲರ್‌ಗಳ ಚೀನ- ಪಾಕಿಸ್ಥಾನ ಇಕಾನಮಿಕ್‌ ಕಾರಿಡಾರ್‌ (ಸಿಪಿಇಸಿ) ಯೋಜನೆಗೆ ಭಾರತ ಒಂದು ಬೆದರಿಕೆಯೇ ಅಲ್ಲ; ಪಾಕಿಸ್ಥಾನದಲ್ಲಿ ತಾಂಡವವಾಡುತ್ತಿರುವ ಭ್ರಷ್ಟಾಚಾರವೇ ಈ ಬೃಹತ್‌ ಯೋಜನೆಗೆ ಬಹು ದೊಡ್ಡ ಬೆದರಿಕೆಯಾಗಿದೆ ಎಂದು ಅಮೆರಿಕನ್‌ ತಜ್ಞರೊಬ್ಬರು ಹೇಳಿದ್ದಾರೆ.

”ಸಿಪಿಇಸಿ ಯೋಜನೆಯು ಎರಡೂ ಪಾಲುದಾರ ದೇಶಗಳಲ್ಲಿನ (ಚೀನ-ಪಾಕಿಸ್ಥಾನ) ಭ್ರಷ್ಟಾಚಾರದಿಂದಾಗಿ ವಿಳಂಬವನ್ನು ಹಾಗೂ ಅಪಾರ ಪ್ರಮಾಣದ ವೆಚ್ಚ ಏರಿಕೆಯನ್ನು ಕಾಣುತ್ತಿದೆ. ಚೀನ ಈ ಬೃಹತ್‌ ಯೋಜನೆಯನ್ನು ವಿನ್ಯಾಸಗೊಳಿಸಿ ಅನುಷ್ಠಾನಿಸುತ್ತಿದೆಯಾದರೆ ಪಾಕಿಸ್ಥಾನ ಯೋಜನೆಯ ಮೇಲುಸ್ತುವಾರಿಯನ್ನು ನೋಡಿಕೊಳ್ಳುತ್ತಿದೆ” ಎಂದು ನ್ಯೂಯಾರ್ಕ್‌ನ ಎಲ್‌ಐಯು ಪೋಸ್ಟ್‌ನಲ್ಲಿನ ಅರ್ಥಶಾಸ್ತ್ರ ವಿಭಾಗದ ಮುಖ್ಯಸ್ಥ ಹಾಗೂ ಪ್ರೊಫೆಸರ್‌ ಆಗಿರುವ ಪ್ಯಾನೋಸ್‌ ಮುರ್‌ಡೋಕೋತಾಸ್‌ ಹೇಳಿದ್ದಾರೆ.

ಸಿಪಿಇಸಿ ಯೋಜನೆಯ ಬಗೆಗಿನ ಅವರ ವಿಶ್ಲೇಷಣಾತ್ಮಕ ಲೇಖನವು ಫೋರ್‌ಬ್ಸ್ ನಲ್ಲಿ ಪ್ರಕಟಗೊಂಡಿದೆ. 

ಚೀನ – ಪಾಕಿಸ್ಥಾನದ ಪಾಲುದಾರಿಕೆಯ ಈ ಮಹತ್ವಾಕಾಂಕ್ಷೀ ಯೋಜನೆಯು ಉಸುಕಿನ ಅರಮನೆಯಾಗಿ ಕಂಡುಬರುತ್ತಿದೆ. ಯೋಜನಾ ಅನುಷ್ಠಾನದ ವಿಳಂಬದಿಂದಾಗಿ ನಿರ್ಮಾಣ ವೆಚ್ಚವು ಬೃಹತ್‌ ಪ್ರಮಾಣದಲ್ಲಿ ಏರುತ್ತಿದ್ದು ಪಾಕಿಸ್ಥಾನವು ಸಾಲದ ಕಡಲಲ್ಲಿ ಮುಳುಗುವುದು ನಿಶ್ಚಿತ ಮತ್ತು ಅದು ಈ ಹಿಂದೆ 2001ರಲ್ಲಿ ಮಾಡಿದಂತೆ ಈಗಿನ್ನು ಪುನಃ ಅಂತಾರಾಷ್ಟ್ರೀಯ ಹಣಕಾಸು ಸಂಸ್ಥೆಯ (ಐಎಂಎಫ್) ಬಾಗಿಲಿಗೆ ಬೀಳಬೇಕಾಗುವುದು’ ಎಂದು ಪ್ಯಾನೋಸ್‌ ತಮ್ಮ ಲೇಖನದಲ್ಲಿ ಎಚ್ಚರಿಸಿದ್ದಾರೆ.