India-China Border: ಉಭಯ ಸೇನಾ ವಾಪಸಾತಿ ಬೆನ್ನಲ್ಲೇ ಎಲ್‌ಎಸಿಯಲ್ಲಿ ಗಸ್ತು ಪುನಾರಂಭ

ಹೊಸದಿಲ್ಲಿ: ಭಾರತ ಮತ್ತು ಚೀನ ಸೇನೆಗಳ ವಾಪಸಾತಿ ಪ್ರಕ್ರಿಯೆ ಪೂರ್ಣಗೊಂಡ ಬೆನ್ನಲ್ಲೇ ಗುರುವಾರ ಲಡಾಖ್‌ನ ಡೆಮ್ಚಾಕ್‌ ಮತ್ತು ಡೆಪ್ಸಾಂಗ್‌ನಲ್ಲಿ ಗಸ್ತು ಪುನಾರಂಭಗೊಂಡಿದೆ. ಈ ಮೂಲಕ 2020ರ ಗಾಲ್ವಾನ್‌ ಸಂಘರ್ಷದ ಮೂಲಕ ಉಭಯ ದೇಶಗಳ ನಡುವೆ ಆರಂಭವಾಗಿದ್ದ 4 ವರ್ಷಗಳ ವೈಮನಸ್ಸು ಕೊನೆಗೊಂಡಂತಾಗಿದೆ.

ಡೆಪ್ಸಾಂಗ್‌ನಲ್ಲಿ 5 ಮತ್ತು ಡೆಮ್ಚಾಕ್‌ನಲ್ಲಿ 2 ಗಸ್ತು ಕೇಂದ್ರಗಳು ಇದ್ದು, ಈಗ ಇಲ್ಲಿ ಗಸ್ತು ಪ್ರಕ್ರಿಯೆ ಆರಂಭವಾಗಿದೆ. 2020ರ ಗಾಲ್ವಾನ್‌ ಘರ್ಷಣೆ ಬಳಿಕ ಚೀನ ಸೈನಿಕರು ಭಾರತೀಯ ಯೋಧರ ಗಸ್ತು ಪ್ರಕ್ರಿಯೆಗೆ ತಡೆಯೊಡ್ಡಿದ್ದರು. ಇದಕ್ಕೆ ಪ್ರತಿಯಾಗಿ ಭಾರತೀಯ ಯೋಧರು ಕೂಡ ಚೀನದ ಗಸ್ತಿಗೆ ತಡೆ ಉಂಟುಮಾಡಿದ್ದರು. ಹೀಗಾಗಿ, ಎಲ್‌ಎಸಿಯ ವಿವಾದಿತ ಪ್ರದೇಶದಲ್ಲಿ ಗಸ್ತು ಸಂಪೂರ್ಣ ಸ್ಥಗಿತಗೊಂಡಿತ್ತು.

ಸಿಹಿ ವಿನಿಮಯ:
ಎರಡೂ ಕಡೆಯ ಸೈನಿಕರು ವಾಪಸಾಗಿರುವುದನ್ನು ಉಭಯ ದೇಶಗಳು ದೃಢಪಡಿಸಿಕೊಂಡ ಬಳಿಕ ಗುರುವಾರ ದೀಪಾವಳಿ ಹಬ್ಬದ ಅಂಗವಾಗಿ ಪೂರ್ವ ಲಡಾಖ್‌ ಸೇರಿದಂತೆ ವಾಸ್ತವಿಕ ಗಡಿ ನಿಯಂತ್ರಣ ರೇಖೆ(ಎಲ್‌ಎಸಿ)ಯ ಹಲವು ಗಡಿ ಕೇಂದ್ರಗಳಲ್ಲಿ ಭಾರತ-ಚೀನ ಯೋಧರು ಸಿಹಿ ವಿನಿಮಿಯ ಮಾಡಿಕೊಂಡಿದ್ದಾರೆ.  ಲಡಾಖ್‌ನ ಚುಶುಲ್‌- ಮೋಲ್ಡೋ, ದೌಲತ್‌ ಬೇಗ್‌ ಓಲ್ಡಿ ಗಡಿ, ಅರುಣಾಚಲದ ಬಮ್‌ ಲಾ ಮತ್ತು ವಾಚಾ, ಸಿಕ್ಕಿಂನ ನಾಥುಲಾ ಸೇರಿದಂತೆ ಒಟ್ಟು 5 ಪ್ರದೇಶಗಳಲ್ಲಿ ಸಿಹಿ ವಿನಿಮಯ ಮಾಡಿಕೊಳ್ಳಲಾಗಿದೆ.