ಏಶ್ಯ ಚಾಂಪಿಯನ್ಸ್‌ ಟ್ರೋಫಿ ಹಾಕಿ: ಚೀನವನ್ನು ಮಣಿಸಿದ ಭಾರತ

ಡಾಂಗ್ವೆ ಸಿಟಿ (ಕೊರಿಯಾ): ವನಿತೆಯರ ಏಶ್ಯನ್‌ ಚಾಂಪಿಯನ್ಸ್‌ ಟ್ರೋಫಿ ಹಾಕಿ ಪಂದ್ಯಾವಳಿಯಲ್ಲಿ ಹಾಲಿ ಚಾಂಪಿಯನ್‌ ಭಾರತ ಸತತ 2ನೇ ಗೆಲುವು ಸಾಧಿಸಿದೆ. ಬುಧವಾರ ನಡೆದ ಪಂದ್ಯದಲ್ಲಿ ಬಲಿಷ್ಠ ಚೀನವನ್ನು 3-1 ಗೋಲುಗಳಿಂದ ಮಣಿಸಿದೆ.

ವಂದನಾ ಕಟಾರಿಯಾ ಭಾರತದ ಗೆಲುವಿನಲ್ಲಿ ಮಹತ್ವದ ಪಾತ್ರ ವಹಿಸಿದರು. ಪ್ರಥಮ ಕ್ವಾರ್ಟರ್‌ನಲ್ಲೇ 2 ಗೋಲು ಸಿಡಿಸಿದ ವಂದನಾ ಭಾರತಕ್ಕೆ ಮೇಲುಗೈ ಒದಗಿಸಿದರು; ತನಗಿಂತ 2 ರ್‍ಯಾಂಕಿಂಗ್‌ ಮೇಲಿರುವ ತಂಡದ ವಿರುದ್ಧ ಹೋರಾಡಲು ಹೊಸ ಸ್ಫೂರ್ತಿ ತುಂಬಿದರು. ವಂದನಾ ಅವರ ಗೋಲುಗಳು 4ನೇ ಹಾಗೂ 11ನೇ ನಿಮಿಷದಲ್ಲಿ ದಾಖಲಾದವು. ಭಾರತದ ಮತ್ತೂಂದು ಗೋಲನ್ನು ಗುರ್ಜಿತ್‌ ಕೌರ್‌ ಬಾರಿಸಿದರು. ಚೀನದ ಏಕೈಕ ಗೋಲು ವೆನ್‌ ಡಾನ್‌ ಅವರಿಂದ 15ನೇ ನಿಮಿಷದಲ್ಲಿ ದಾಖಲಾಯಿತು. 

ಮೊದಲ ಪಂದ್ಯದಲ್ಲಿ ಜಪಾನ್‌ ವಿರುದ್ಧ 4-1 ಗೋಲುಗಳ ಜಯ ಸಾಧಿಸಿದ ಭಾರತವೀಗ ಅಂಕಪಟ್ಟಿ ಯಲ್ಲಿ ಅಗ್ರಸ್ಥಾನ ಅಲಂಕರಿಸಿದೆ. ಗುರುವಾರ ಮಲೇಶ್ಯ ವಿರುದ್ಧ ತನ್ನ 3ನೇ ಪಂದ್ಯವನ್ನು ಆಡಲಿದೆ. ದಿನದ ಇನ್ನೊಂದು ಪಂದ್ಯದಲ್ಲಿ ಮಲೇಶ್ಯ 3-2 ಅಂತರದಿಂದ ಜಪಾನ್‌ಗೆ ಸೋಲುಣಿಸಿತು.