ಕರುನಾಡಿನಲ್ಲಿ ಹುಲಿಗಳ ಸಂತತಿ ವೃದ್ಧಿ- ಮಧ್ಯಪ್ರದೇಶವನ್ನು ಹಿಂದಿಕ್ಕಲಿದೆ ಕರ್ನಾಟಕ?

ಬೆಂಗಳೂರು: ರಾಜ್ಯದ ಐದು ಹುಲಿ ಸಂರಕ್ಷಿತ ಪ್ರದೇಶಗಳ ಸಹಿತ 37 ವನ್ಯಜೀವಿ ಧಾಮಗಳಲ್ಲಿ ಅಳವಡಿಸಿದ್ದ 4,786 ಕೆಮರಾಗಳ ಕಣ್ಣಿಗೆ 435 ಹುಲಿಗಳು ಕಂಡುಬಂದಿದ್ದು, ರಾಜ್ಯದಲ್ಲಿ ಒಟ್ಟು 600ಕ್ಕೂ ಹೆಚ್ಚು ವ್ಯಾಘ್ರಗಳು ಇರಬಹುದು ಎಂದು ಅಂದಾಜಿಸಲಾಗಿದೆ.

ಕಳೆದ ಬಾರಿ ಅಂದರೆ 2018ರಲ್ಲಿ ನಡೆದ ಗಣತಿಯ ಪ್ರಕಾರ ರಾಜ್ಯದಲ್ಲಿ ಒಟ್ಟು 524 ಹುಲಿಗಳಿದ್ದವು. ಮಧ್ಯಪ್ರದೇಶದಲ್ಲಿ 526 ಹುಲಿಗಳು ಪತ್ತೆಯಾಗಿದ್ದವು. ಆ ಮೂಲಕ ದೇಶದಲ್ಲಿ ಅತೀ ಹೆಚ್ಚು ಹುಲಿಗಳನ್ನು ಹೊಂದಿದ ರಾಜ್ಯ ಎಂಬ ಪಟ್ಟ ಮಧ್ಯಪ್ರದೇಶದ ಪಾಲಾಗಿತ್ತು. ಈ ಬಾರಿ ಕರ್ನಾಟಕವು ಇದನ್ನು ಮೀರಿ ನಂ. 1 ಸ್ಥಾನಕ್ಕೆ ಏರುವ ಸಾಧ್ಯತೆಗಳಿವೆ. ಪ್ರಸ್ತುತ ಕೆಮರಾ ಕಣ್ಣಿಗೆ ಬಿದ್ದಿರುವ ಹುಲಿಗಳ ಪೈಕಿ ಯೌವನಾವಸ್ಥೆಯವುಗಳೇ ಹೆಚ್ಚು.

ಪ್ರತೀ ವರ್ಷ ಜು. 29ರಂದು ಅಂತಾರಾಷ್ಟ್ರೀಯ ಹುಲಿ ದಿನಾಚರಣೆ ಇದೆ. ಈ ಹಿನ್ನೆಲೆಯಲ್ಲಿ ರಾಜ್ಯದ ಹುಲಿ ಗಣತಿ ವಿವರ ಬಿಡುಗಡೆ ಮಾಡಿದ ಅರಣ್ಯ ಸಚಿವ ಈಶ್ವರ ಖಂಡ್ರೆ, ರಾಷ್ಟ್ರೀಯ ಹುಲಿ ಸಂರಕ್ಷಣ ಪ್ರಾಧಿಕಾರ (ಎನ್‌ಟಿಸಿಎ)ದ ಮಾರ್ಗಸೂಚಿ ಅನ್ವಯ ರಾಜ್ಯದ ಹುಲಿ ಗಣತಿಯನ್ನು ವೈಜ್ಞಾನಿಕವಾಗಿ ನಡೆಸಿದ್ದು, ಈ ಗಣತಿಗೆ ಕೆಮರಾ ಟ್ರ್ಯಾಪ್‌ ಮತ್ತು ಲೈನ್‌ ಟ್ರಾನ್‌ಸ್ಟಾ éಕ್ಟ್ ವಿಧಾನ ಅನುಸರಿಸಲಾಗಿದೆ ಎಂದರು.

ಹುಲಿ ಸಂರಕ್ಷಿತ ಪ್ರದೇಶಗಳಾದ ನಾಗರಹೊಳೆ, ಬಂಡೀಪುರ, ಭದ್ರಾ, ಬಿಳಿಗಿರಿ ರಂಗನಾಥಸ್ವಾಮಿ ದೇವಸ್ಥಾನ, ಕಾಳಿ ಕಾನನ ಸೇರಿ 37 ವನ್ಯಜೀವಿ ಧಾಮಗಳಲ್ಲಿ 4,786 ಹಾಗೂ ಸಂರಕ್ಷಿತ ಅರಣ್ಯಗಳಲ್ಲಿ ಸೇರಿ ಒಟ್ಟು 5,399 ಕೆಮರಾಗಳನ್ನು ಅಳವಡಿಸಲಾಗಿತ್ತು. ಅವುಗಳಲ್ಲಿ 66.86 ಲಕ್ಷಕ್ಕೂ ಹೆಚ್ಚು ವನ್ಯಜೀವಿಗಳ ಛಾಯಾಚಿತ್ರ ದಾಖಲಾಗಿದೆ. ಇವುಗಳ ಪೈಕಿ 71 ಮರಿಗಳ ಸಹಿತ 435 ಹುಲಿಗಳು ಇದ್ದು, ಅವುಗಳ ಚಲನವಲನ, ಪ್ರಾದೇಶಿಕ ಪರಿಮಿತಿ, ಮೈಮೇಲಿನ ಪಟ್ಟೆಗಳ ಆಧಾರದ ಮೇಲೆ ಸಂಖ್ಯೆ ಗುರುತಿಸಲಾಗಿದೆ. ಇದಲ್ಲದೆ ಹುಲಿಗಳ ಮಲ, ಮೂತ್ರ, ಹೆಜ್ಜೆಗುರುತು ಮತ್ತಿತರ ವಿಧಾನಗಳಿಂದ ನಡೆಸಿರುವ ಗಣತಿ ಹಾಗೂ ಕೇಂದ್ರ ಸರಕಾರ ಬಿಡುಗಡೆ ಮಾಡುವ ಗಣತಿಗಳ ಆಧಾರದಲ್ಲಿ ರಾಜ್ಯದಲ್ಲಿರುವ ಹುಲಿಗಳ ಸಂಖ್ಯೆ 600ನ್ನು ದಾಟಬಹುದು ಎಂದು ಅಂದಾಜಿಸಲಾಗಿದೆ ಎಂದು ಹೇಳಿದರು.

ದೇಶದಲ್ಲಿ ಇನ್ನೂ ಅರಣ್ಯ ಸುರಕ್ಷಿತವಾಗಿ ಉಳಿದಿರುವುದಕ್ಕೆ ಮಾಜಿ ಪ್ರಧಾನಿಗಳಾದ ಇಂದಿರಾ ಗಾಂಧಿ ಮತ್ತು ರಾಜೀವ ಗಾಂಧಿ ಅವರು ಕಾರಣ ಎಂದರೆ ತಪ್ಪಾಗಲಾರದು. ಇಬ್ಬರೂ ನೈಜ ಪರಿಸರ ಪ್ರೇಮಿಗಳಾಗಿದ್ದರು. ಅವರು ಅರಣ್ಯ ಸಂರಕ್ಷಣ ಕಾಯಿದೆ, ವನ್ಯಜೀವಿ ಸಂರಕ್ಷಣ ಕಾಯಿದೆ, ಅರಣ್ಯ ಹಕ್ಕು ಕಾಯಿದೆಗಳನ್ನು ಜಾರಿಗೆ ತಂದರು. ಇಲ್ಲವಾಗಿದ್ದರೆ, ಈ ವೇಳೆಗೆ ಅರಣ್ಯವೂ ಇರುತ್ತಿರಲಿಲ್ಲ. ಅರಣ್ಯವಾಸಿಗಳಿಗೆ ಅವರ ಹಕ್ಕೂ ದೊರಕುತ್ತಿರಲಿಲ್ಲ. ವನ್ಯಮೃಗಗಳೂ ಉಳಿಯುತ್ತಿರಲಿಲ್ಲ ಎಂದರು.

ದೇಶ, ರಾಜ್ಯದ ಹುಲಿಗಳ ಸಂಖ್ಯೆ

ವರ್ಷ  ದೇಶ     ರಾಜ್ಯ

2006    1,411   290

2010    1,706   300

2014    2,226   406

2018    2,967   524

2022    4,344   600+

ವರ್ಷ                ಇರಿಸಿದ್ದ ಕೆಮರಾ          ಪತ್ತೆಯಾದ ಒಟ್ಟು ಪ್ರಾಣಿಗಳ ಚಿತ್ರಗಳು            ಪತ್ತೆಯಾದ ಹುಲಿಗಳು

2018                              4,124                               49,79,803                                                      404

2022                            4,786                                   66,86,450                                                      435

5 ಹುಲಿ ಸಂರಕ್ಷಿತ ಪ್ರದೇಶ

ವಿಭಾಗ ಕೆಮರಾ ಪಾಯಿಂಟ್‌     ಪತ್ತೆಯಾದ ಪಟ್ಟೆ ಹುಲಿಗಳು

ಬಂಡೀಪುರ      612      140

ಭದ್ರಾ   330      26

ಬಿಆರ್‌ಟಿ          288      39

ಕಾಳಿ    448      19

ನಾಗರಹೊಳೆ    502      149

ಒಟ್ಟು  2,180   373

ಇತರ ಅರಣ್ಯ ವಿಭಾಗ

ವಿಭಾಗ                    ಕೆಮರಾ ಪಾಯಿಂಟ್‌            ಪತ್ತೆಯಾದ ಪಟ್ಟೆ ಹುಲಿಗಳು

ಬನ್ನೇರುಘಟ್ಟ     80        02

ಬೆಳಗಾವಿ         119      07

ಭದ್ರಾವತಿ        121      05

ಕಾವೇರಿ ವನ್ಯಜೀವಿಧಾಮ         473      02

ಚಿಕ್ಕಮಗಳೂರು ವನ್ಯಜೀವಿಧಾಮ        41        06

ಹಳಿಯಾಳ       106      01

ಕಾರವಾರ         135      01

ಕೊಪ್ಪ ವನ್ಯಜೀವಿ ಧಾಮ         50        06

ಕುದುರೆಮುಖ ವನ್ಯಜೀವಿ ಧಾಮ           173      02

ಮಡಿಕೇರಿ ವಿಭಾಗ        171      03

ಮಡಿಕೇರಿ ವನ್ಯಜೀವಿ ಧಾಮ     175      11

ಮಲೆಮಹದೇಶ್ವರ ಬೆಟ್ಟ           432      05

ಮೈಸೂರು        36        04

ಶಿವಮೊಗ್ಗ       182      01

ಶಿರಸಿ               107      00

ವಿರಾಜಪೇಟೆ    111      04

ಯಲ್ಲಾಪುರ      94        02

ಒಟ್ಟು              2,606   57