ಕಳ್ಳರ ಹಣ ಬಿಳಿ ಮಾಡಿದ್ದೇ ಮೋದಿ ಸಾಧನೆ: ರಾಹುಲ್‌ 

ನಾಂದೇಡ್‌: ನೋಟು ಅಮಾನ್ಯವು ಮೋದಿ ಸರಕಾರದ ಅತಿ ದೊಡ್ಡ ವೈಫ‌ಲ್ಯ. ಇದರಿಂದ ದೇಶದ ಬಡವರು ತೊಂದರೆ ಅನುಭವಿಸಿದರು. ಭಾರತದಲ್ಲಿರುವ ಕಳ್ಳರ ಹಣವೆಲ್ಲ ಬಿಳಿಯಾಯಿತು ಎಂಬುದು ಆರ್‌ಬಿಐ ವರದಿ ಬಹಿರಂಗವಾದ ಅನಂತರ ದೇಶದ ಜನರಿಗೆ ಸ್ಪಷ್ಟವಾಗಿ ಗೊತ್ತಾಗಿದೆ, ಬಿಜೆಪಿ ಬಣ್ಣವೂ ಬಯಲಾಗಿದೆ ಎಂದು ಕಾಂಗ್ರೆಸ್‌ ಉಪಾಧ್ಯಕ್ಷ ರಾಹುಲ್‌ ಗಾಂಧಿ ಲೇವಡಿ ಮಾಡಿದ್ದಾರೆ. ಶುಕ್ರವಾರ ನಾಂದೇಡ್‌ನ‌ಲ್ಲಿ ಮಾತನಾಡಿದ ಅವರು, ಮೋದಿ ಅವರು ಬಡವರು, ರೈತರು, ಗೃಹಿಣಿಯರ ಹಣದ ಮೇಲೆ ಕಣ್ಣು ಹಾಕಿ ಅವರಿಗೆ ತೊಂದರೆ ಕೊಟ್ಟಿರುವುದು ಏಕೆ ಎಂಬುದು ಗೊತ್ತಾಗುತ್ತಿಲ್ಲ. ಜಿಡಿಪಿ ಕುಸಿದಿದೆ, ನಿರುದ್ಯೋಗ ತಾಂಡವವಾಡುತ್ತಿದೆ. ಇದಕ್ಕೆಲ್ಲ ಮೋದಿ ಅವರೇ ನೇರ ಹೊಣೆ ಎಂದು ಆರೋಪಿಸಿದ್ದಾರೆ. ಜತೆಗೆ, ಮೋದಿ ಹಾಗೂ ಬಿಜೆಪಿ ಅಧಿಕಾರಕ್ಕಾಗಿ ಸಮಾಜವನ್ನು ಒಡೆಯುವ ಕೆಲಸದಲ್ಲಿ ನಿರತವಾಗಿದೆ ಎಂದೂ ಹೇಳಿದ್ದಾರೆ.