ಶಿರಸಿಯಲ್ಲೂ ಐಎಂಎ ಮಾದರಿ ದೋಖಾ ಕಂಪನಿ?

ಶಿರಸಿ: ರಾಜ್ಯದಲ್ಲಿ ಕೋಟ್ಯಂತರ ರೂ.ಮೋಸ ಮಾಡಿದ ಐಎಂಎ ಕಂಪನಿ ಬೆನ್ನಲ್ಲೇ ಒಂದು ಲಕ್ಷ ರೂ.ಇಟ್ಟರೆ ಹತ್ತು ತಿಂಗಳಲ್ಲಿ ಡಬಲ್‌ ಮಾಡಿಕೊಡುವ ಆಮಿಷ ಒಡ್ಡುವ ಕಂಪನಿಯೊಂದು ಶಿರಸಿಯಲ್ಲಿದೆ ಎಂಬ ಆರೋಪ ಕೇಳಿ ಬಂದಿದೆ.

ಚೆನ್ನೈ ಮೂಲದ ಈ ಕಂಪನಿಯಲ್ಲಿ ಹಣ ತೊಡಗಿಸಿದರೆ ವಾರಕ್ಕೆ 1,800 ರೂ.ನಂತೆ ನೀಡಲಾಗುತ್ತದೆ ಎಂದು ಜಾಹೀರಾತು ನೀಡಿ ಕಂಪನಿ ಮೋಸ ಮಾಡುವ ಕಾರ್ಯ ಮಾಡುತ್ತಿದೆ ಎಂಬ ಆರೋಪ ಕೇಳಿ ಬಂದಿದೆ.

ಈಗಾಗಲೇ 8-10 ಜನರು ಈ ಕಂಪನಿಯಲ್ಲಿ ಹಣ ತೊಡಗಿಸಿದ್ದಾರೆ ಎನ್ನಲಾಗಿದೆ. ಹೊನ್ನಾವರದಲ್ಲೂ ಇಂಥ ಕಾರ್ಯ ಮಾಡಲಾಗುತ್ತಿದೆ. ಒಂಭತ್ತು ವರ್ಷದ ಹಳೆಯ ಕಂಪನಿ ಎಂದು ಹೇಳಿ ಜನರಲ್ಲಿ ಆಸೆ ಹುಟ್ಟಿಸುತ್ತಿದೆ ಎನ್ನುವ ಆರೋಪ ಇದೆ. ಆದರೆ, ಈವರೆಗೆ ಯಾವುದೇ ದೂರು ದಾಖಲಾಗಿಲ್ಲ.