ವಿಂಡೀಸ್‌ಗೆ ಆಘಾತ; ಅಫ್ಘಾನಿಸ್ಥಾನಕ್ಕೆ ಪ್ರಶಸ್ತಿ

ಹರಾರೆ: ಆಲ್‌ರೌಂಡ್‌ ಆಟದ ಪ್ರದರ್ಶನ ನೀಡಿದ ಅಫ್ಘಾನಿಸ್ಥಾನ ತಂಡವು ಫೈನಲ್‌ ಹೋರಾಟದಲ್ಲಿ ವೆಸ್ಟ್‌ಇಂಡೀಸ್‌ ತಂಡವನ್ನು 7 ವಿಕೆಟ್‌ಗಳಿಂದ ಸೋಲಿಸಿ ಐಸಿಸಿ ವಿಶ್ವಕಪ್‌ ಅರ್ಹತಾ ಕೂಟದ ಪ್ರಶಸ್ತಿಯನ್ನು ಗೆದ್ದುಕೊಂಡಿದೆ.

ಅಫ್ಘಾನಿಸ್ಥಾನ ತಂಡದ ನಿಖರ ದಾಳಿಯಿಂದ ರನ್‌ ಗಳಿಸಲು ಒದ್ದಾಡಿದ ವೆಸ್ಟ್‌ಇಂಡೀಸ್‌ ತಂಡವು 46.5 ಓವರ್‌ಗಳಲ್ಲಿ 204 ರನ್ನಿಗೆ ಆಲೌಟಾಯಿತು. ಗೆಲ್ಲಲು ಸುಲಭ ಸವಾಲು ಪಡೆದ ಅಫ್ಘಾನಿಸ್ಥಾನ ಭರ್ಜರಿ ಬ್ಯಾಟಿಂಗ್‌ ಪ್ರದರ್ಶಿಸಿ 40.4 ಓವರ್‌ಗಳಲ್ಲಿ ಕೇವಲ 3 ವಿಕೆಟ್‌ ಕಳೆದುಕೊಂಡು 206 ರನ್‌  ಪೇರಿಸಿ ವಿಜಯೋತ್ಸವ ಆಚರಿಸಿತು. ಎರಡು ದಿನಗಳ ಹಿಂದೆ ಅಯರ್‌ಲ್ಯಾಂಡ್‌ ತಂಡವನ್ನು ಸೋಲಿಸಿ ಮುಂದಿನ ವರ್ಷದ ವಿಶ್ವಕಪ್‌ನಲ್ಲಿ ಆಡುವ ಅರ್ಹತೆ ಗಳಿಸಿದ್ದ ಅಫ್ಘಾನಿಸ್ಥಾನ ಇದೀಗ ಬಲಿಷ್ಠ ವೆಸ್ಟ್‌ಇಂಡೀಸ್‌ ತಂಡವನ್ನು ಪಂದ್ಯದ ಪ್ರತಿಯೊಂದು ವಿಭಾಗದಲ್ಲಿ ಸೋಲಿಸಿ ಸಂಭ್ರಮಿಸಿತು.

ಮುಜೀಬ್‌ ಉರ್‌ ರೆಹಮಾನ್‌ 43 ರನ್ನಿಗೆ 4 ವಿಕೆಟ್‌ ಕಿತ್ತು ಬೌಲಿಂಗ್‌ನಲ್ಲಿ ಮಿಂಚಿದರೆ ಮೊಹಮ್ಮದ್‌ ಶೆಹಜಾದ್‌ ಮತ್ತು ರಹಮತ್‌ ಶಾ ಬ್ಯಾಟಿಂಗ್‌ನಲ್ಲಿ ಭರ್ಜರಿ ಆಟವಾಡಿದ್ದಾರೆ. ಇನ್ನಿಂಗ್ಸ್‌ ಆರಂಭಿಸಿದ ಶೆಹಜಾದ್‌ ಮತ್ತು ಗುಲ್ಬದಿನ್‌ ನೈಬ್‌ ಮೊದಲ ವಿಕೆಟಿಗೆ 58 ರನ್‌ ಪೇರಿಸಿದರು. ಆಬಳಿಕ ಶೆಹಜಾದ್‌ ಮತ್ತು ರಹಮತ್‌ ಶಾ ದ್ವಿತೀಯ ವಿಕೆಟಿಗೆ 90 ರನ್ನುಗಳ ಜತೆಯಾಟದಲ್ಲಿ  ಪಾಲ್ಗೊಂಡು ತಂಡದ ಗೆಲುವು ಖಚಿತಪಡಿಸಿದರು.

ಸಂಕ್ಷಿಪ್ತ ಸ್ಕೋರು: ವೆಸ್ಟ್‌ಇಂಡೀಸ್‌ 46.4 ಓವರ್‌ಗಳಲ್ಲಿ 206; ಅಫ್ಘಾನಿಸ್ಥಾನ 40.4 ಓವರ್‌ಗಳಲ್ಲಿ 3 ವಿಕೆಟಿಗೆ 206.