ಬೈಕ್‌ ಕಳ್ಳನ ಬಂಧನ; ಎರಡು ಬೈಕ್‌ ವಶ

ಹುಬ್ಬಳ್ಳಿ: ವಿವಿಧೆಡೆ ಬೈಕ್‌ ಕಳ್ಳತನ ಮಾಡಿದ್ದ ಆರೋಪಿಯನ್ನು ಅಶೋಕನಗರ ಪೊಲೀಸರು ಶನಿವಾರ ಬಂಧಿಸಿದ್ದಾರೆ. ದೇಶಪಾಂಡೆ ನಗರ ವಡ್ಡರ ಓಣಿಯ ನಿವಾಸಿ ಹನುಮಂತ ಸಂಜು ಮಣವಡ್ಡರ(20) ಬಂಧಿತನಾಗಿದ್ದಾನೆ.

ಅಶೋಕನಗರ, ವಿದ್ಯಾನಗರ ಹಾಗೂ ಕೇಶ್ವಾಪುರ ಪೊಲೀಸ್‌ ಠಾಣೆಯ ವ್ಯಾಪ್ತಿಯಲ್ಲಿ ನಡೆದ ಬೈಕ್‌ ಕಳ್ಳತನ ಪ್ರಕರಣವನ್ನು ಭೇದಿಸಿರುವ ಪೊಲೀಸರು ಆರೋಪಿಯನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಬಂಧಿತನಿಂದ 70 ಸಾವಿರ ರೂ. ಮೌಲ್ಯದ ಎರಡು ಬೈಕ್‌ ವಶಪಡಿಸಿಕೊಳ್ಳಲಾಗಿದೆ. ಈ ಕುರಿತು ಅಶೋಕನಗರ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಪ್ರಕರಣ ಭೇದಿಸಿದ ಅಶೋಕನಗರ ಪೊಲೀಸ್‌ ಠಾಣೆಯ ಇನ್ಸ್‌ಪೆಕ್ಟರ್‌ ರವಿಚಂದ್ರ ಬಿ.ಡಿ, ಪಿಎಸ್‌ಐ ಶ್ರೀದೇವಿ ಜಿ.ಎಸ್‌., ಎಸ್‌ಐ ಎನ್‌.ಸಿ. ಪಾಟೀಲ ಹಾಗೂ ಸಿಬ್ಬಂದಿಯನ್ನು ಮಹಾನಗರ ಪೊಲೀಸ್‌ ಆಯುಕ್ತರು ಅಭಿನಂದಿಸಿದ್ದಾರೆ.