“ಡಿಬಗ್‌’ಕಲ್ಪನೆ ಶ್ವೇತ ಆಗಿ ಬಂತು ಬಾಕ್ಸ್‌ನಿಂದ ಹೊರಬರುವ ಆತ್ಮದ ಕಥೆ

ಮತ್ತೂಂದು ಹಾರರ್‌ ಸಿನಿಮಾ ಬಿಡುಗಡೆಗೆ ರೆಡಿಯಾಗಿದೆ. ಅದು “ಶ್ವೇತ’. ಹೆಸರು ಹೇಳಿದ ಮೇಲೆ ಇದೊಂದು ಮಹಿಳಾ ಪ್ರಧಾನ ಚಿತ್ರವೆಂದು ಪ್ರತ್ಯೇಕವಾಗಿ ಹೇಳುವ ಅಗತ್ಯವಿಲ್ಲ. ಇದು ಕೂಡಾ ಪಕ್ಕಾ ಹಾರರ್‌ ಸಿನಿಮಾ. ಈಗಾಗಲೇ ಸೆನ್ಸಾರ್‌ ಆಗಿದ್ದು “ಎ’ ಪ್ರಮಾಣ ಪತ್ರ ಪಡೆದು ಈಗ ಬಿಡುಗಡೆಯ ಹಂತದಲ್ಲಿದೆ. 

ರಾಜೇಶ್‌ ಬಲಿಪ ಈ ಸಿನಿಮಾದ ನಿರ್ದೇಶಕರು. ಪ್ರತಿ ಹಾರರ್‌ ಸಿನಿಮಾಗಳು ಕೂಡಾ ಒಂದೊಂದು ಕಾನ್ಸೆಪ್ಟ್ನೊಂದಿಗೆ ಬರುತ್ತವೆ. “ಶ್ವೇತ’ ಚಿತ್ರದ ನಿರ್ದೇಶಕ ರಾಜೇಶ್‌ ಬಲಿಪ, “ಡಿಬಗ್‌’ ಕಾನ್ಸೆಪ್ಟ್ನೊಂದಿಗೆ ಈ ಸಿನಿಮಾ ಮಾಡಿದ್ದಾರಂತೆ. ಬಾಕ್ಸ್‌ವೊಂದನ್ನು ತೆರೆದಾಗ ಅದರಿಂದ ಹೊರಬರುವ ಆತ್ಮವೊಂದರಿಂದ ಯಾವ ರೀತಿ ತೊಂದರೆಯಾಗುತ್ತದೆ ಎಂಬುದೇ “ಶ್ವೇತ’ ಚಿತ್ರದ ತಿರುಳು. “ಇದು ಹಾರರ್‌ ಜಾನರ್‌ನ ಸಿನಿಮಾ. “ಡಿಬಗ್‌’ ಕಾನ್ಸೆಪ್ಟ್ನೊಂದಿಗೆ ಈ ಸಿನಿಮಾ ಮಾಡಿದ್ದೇವೆ. ಇಲ್ಲಿ ಹೀರೋ -ಹೀರೋಯಿನ್‌ ಅನ್ನೋದಕ್ಕಿಂತ ಇಡೀ ಸಿನಿಮಾ ಪಾತ್ರಗಳ ಸುತ್ತ ಸುತ್ತುತ್ತದೆ. ಶ್ವೇತ ಅನ್ನೋ ಪಾತ್ರದ ಮೂಲಕ ಸಿನಿಮಾ ತೆರೆದುಕೊಳ್ಳುತ್ತದೆ’ ಎಂದು ಚಿತ್ರದ ಬಗ್ಗೆ ವಿವರ ನೀಡುತ್ತಾರೆ ರಾಜೇಶ್‌ ಬಲಿಪ. ಚಿತ್ರಕ್ಕಾಗಿ ಸಿಜಿ ಮೂಲಕ ವಿಶೇಷ ಜೀವಿಯೊಂದನ್ನು ಕೂಡಾ ಸೃಷ್ಟಿಸಿದ್ದು, ಇದು ಕೂಡಾ ಸಿನಿಮಾದ ಹೈಲೈಟ್‌ ಎಂಬುದು ನಿರ್ದೇಶಕರ ಮಾತು. 

ಈ ಚಿತ್ರವನ್ನು ರಾಮಚಂದ್ರ ರೆಡ್ಡಿ ಎನ್ನುವವರು ನಿರ್ಮಿಸಿದ್ದಾರೆ. ಕನ್ನಡದಲ್ಲೊಂದು ವಿಭಿನ್ನ ಸಿನಿಮಾ ಮಾಡಬೇಕೆಂಬ ಆಸೆ ಇತ್ತಂತೆ. ಅದು “ಶ್ವೇತ ಚಿತ್ರದ ಮೂಲಕ ಈಡೇರಿದೆಯಂತೆ. ಚಿತ್ರದಲ್ಲಿ ಅವರ ಮಗ ಕೂಡಾ ಪ್ರಮುಖ ಪಾತ್ರವೊಂದರಲ್ಲಿ ನಟಿಸಿದ್ದಾರೆ. ಚಿತ್ರಕ್ಕೆ ಕಿರಣ್‌ ರವೀಂದ್ರನಾಥ್‌ ಸಂಗೀತ ನೀಡಿದ್ದು, ಇಲ್ಲಿ ಸಂಗೀತ ಪಾತ್ರದ ಜೊತೆಗೆ ಸಾಗುತ್ತದೆಯಂತೆ. ಚಿತ್ರಕ್ಕೆ ಡಿ.ನಾಗರಾಜನ್‌ ಛಾಯಾಗ್ರಹಣ ಮಾಡಿದ್ದು, ಬಹುತೇಕ ಸಿನಿಮಾ ನೈಟ್‌ ಎಫೆಕ್ಟ್‌ನಲ್ಲಿ ನಡೆಯುತ್ತದೆಯಂತೆ. ನಿರ್ದೇಶಕರಿಗೆ ಲೈಟಿಂಗ್‌ ಬಗ್ಗೆ ಚೆನ್ನಾಗಿ ಅರಿವಿದ್ದು, ಹಾರರ್‌ ಫೀಲ್‌ಗೆ ಇದು ಸಹಕಾರಿಯಾಯಿತು ಎನ್ನುವುದು ಅವರ ಮಾತು.  ಚಿತ್ರದಲ್ಲಿ ಅಕ್ಷತಾ, ಜಯಶೀಲಾ, ಶ್ರೀನಿವಾಸ ಪ್ರಭು, ಮಂಜುನಾಥ ರೆಡ್ಡಿ, ಪ್ರಣವ್‌ ಸೇರಿದಂತೆ ಅನೇಕರು ನಟಿಸಿದ್ದಾರೆ.