ಉ.ಪ್ರ.ದಲ್ಲಿ ಮರ್ಯಾದಾ ಹತ್ಯೆ: ಪುತ್ರಿ, ಪ್ರಿಯಕರನ ಕೊಂದ ಅಪ್ಪ

ಸಂಭಾಲ್‌, ಉತ್ತರ ಪ್ರದೇಶ : ಮರ್ಯಾದೆಗೇಡು ಹತ್ಯೆ ಪ್ರಕರಣದಲ್ಲಿ ವ್ಯಕ್ತಿಯೊಬ್ಬ ತನ್ನ  16ರ ಹರೆಯದ ಮಗಳನ್ನು ಹಾಗೂ ಆಕೆಯ 18ರ ಹರೆಯದ ಪ್ರಿಯಕರನನ್ನು ಅಮಾನುಷವಾಗಿ ಕೊಂದಿರುವ ಘಟನೆ ಇಲ್ಲಿನ ಗಿನ್ನೋರ್‌ ಪ್ರದೇಶದಲ್ಲಿ ನಡೆದಿರುವುದಾಗಿ ಪೊಲೀಸರು ತಿಳಿಸಿದ್ದಾರೆ. 

ನಿನ್ನೆ ಭಾನುವಾರ ರಾತ್ರಿ ಅಚ್ಚನ್‌ ಕುರೇಶಿ ಗೆ ತನ್ನ ಮಗಳು ಮನೆಯಲ್ಲಿ ಇಲ್ಲದಿರುವುದನ್ನು ಕಂಡು ದಿಗಿಲಾಯಿತು. ಹುಡುಕಾಡಿದಾಗ ಆಕೆ ಮನೆ ಸಮೀಪದ ತನ್ನ ಪ್ರಿಯಕರ ಸಲ್ಮಾನ್‌ನ ಮನೆಯಲ್ಲಿ ಆತನ ಜತೆಗೆ ಲೈಂಗಿಕ ಕ್ರಿಯೆಯಲ್ಲಿ ತೊಡಗಿಕೊಂಡಿರುವುದು ಕಂಡುಬಂತು. 

ಇದರಿಂದ ಕ್ರುದ್ಧನಾದ ಅಚ್ಚನ್‌ ಕುರೇಶಿ, ಕೋಪಾವೇಶದ ಪರಾಕಾಷ್ಠೆಯಲ್ಲಿ ಒಡನೆಯೇ ತನ್ನ ಮಗಳನ್ನು ಕತ್ತು ಹಿಸುಕಿ ಕೊಂದದ್ದಲ್ಲದೇ ಆತನ ಪ್ರಿಯಕರ ಸಲ್ಮಾನ್‌ ನನ್ನು ಇರಿದು ಕೊಂದ.

ಈ ಘಟನೆಯ ವಿವರಗಳನ್ನು  ಮಾಧ್ಯಮಕ್ಕೆ ನೀಡಿರುವ ಪೊಲೀಸ್‌ ಸುಪರಿಂಟೆಂಡೆಂಟ್‌ ರವಿಶಂಕರ್‌ ಛಾವಿ ಅವರು, ಪ್ರಕರಣದ ಪೊಲೀಸ್‌ ತನಿಖೆ ಮುಂದುವರಿದಿದೆ; ಕೊಲೆ ಆರೋಪಿಯನ್ನು ವಶಕ್ಕೆ ತೆಗೆದುಕೊಳ್ಳಲಾಗಿದೆ; ಮೃತ ದೇಹಗಳನ್ನು ಮರಣೋತ್ತರ ಪರೀಕ್ಷೆಗೆ ಕಳುಹಿಸಲಾಗಿದೆ ಎಂದು ಹೇಳಿದರು.