ಹಾಕಿ ವಿಶ್ವ ಲೀಗ್‌ ಫೈನಲ್‌: 2-0 ಸೋಲು ಜರ್ಮನಿಗೆ ಶರಣಾದ ಭಾರತ

ಭುವನೇಶ್ವರ: ಹಾಕಿ ವಿಶ್ವ ಲೀಗ್‌ ಫೈನಲ್‌ನಲ್ಲಿ ಭಾರತ ಉತ್ತಮ ಆರಂಭ ಪಡೆದಿದ್ದರೂ ಸೋಮವಾರ ನಡೆದ ಅಂತಿಮ ಲೀಗ್‌ ಪಂದ್ಯದಲ್ಲಿ ಬಲಿಷ್ಠ ಜರ್ಮನಿ ವಿರುದ್ಧ 0-2 ಗೋಲುಗಳಿಂದ ಶರಣಾಗಿದೆ. ಈ ಸೋಲಿನಿಂದ ಭಾರತ “ಬಿ’ ಬಣದಲ್ಲಿ ಕೇವಲ ಒಂದಂಕ ಗಳಿಸಿದೆ. ದಿನದ ಇನ್ನೊಂದು ಪಂದ್ಯದಲ್ಲಿ ಆಸ್ಟ್ರೇಲಿಯ ತಂಡವು ಇಂಗ್ಲೆಂಡ್‌ ವಿರುದ್ಧ 2-2 ಸಮಬಲದ ಹೋರಾಟ ನೀಡಿ ಡ್ರಾ ಸಾಧಿಸಿದೆ.

ರಕ್ಷಣಾತ್ಮಕ ಆಟಕ್ಕೆ ಖ್ಯಾತರಾದ ಜರ್ಮನಿಯರು ಈ ಮಹತ್ವದ ಪಂದ್ಯದಲ್ಲಿ ಭರ್ಜರಿಯಾಗಿ ಆಡಿದರು. ನಾಯಕ ಮಾರ್ಟಿನ್‌ ಹ್ಯಾನೆರ್‌ ಪೆನಾಲ್ಟಿ ಕಾರ್ನರ್‌ ಮೂಲಕ 17ನೇ ನಿಮಿಷದಲ್ಲಿ ಮೊದಲ ಗೋಲು ಹೊಡೆದರೆ ಮ್ಯಾಟ್ಸ್‌ ಗ್ರ್ಯಾಮ್‌ಬುಶ್‌ 20ನೇ ನಿಮಿಷದಲ್ಲಿ ಇನ್ನೊಂದು ಗೋಲು ಹೊಡೆದರು. ಇದು ಜರ್ಮನಿ ಈ ಕೂಟದಲ್ಲಿ ದಾಖಲಿಸಿದ ಎರಡನೇ ಗೆಲುವು ಆಗಿದೆ. ಇದರಿಂದಾಗಿ ಒಟ್ಟಾರೆ ಏಳಂಕ ಗಳಿಸಿರುವ ಜರ್ಮನಿ ಬಣದ ಅಗ್ರಸ್ಥಾನ ಪಡೆಯಿತು.