ಮಧ್ಯಪ್ರದೇಶ: ವಾಡಿಕೆಗಿಂತ ಶೇ. 94 ಹೆಚ್ಚು ಮಳೆ : ಹವಾಮಾನ ಇಲಾಖೆ ಹೇಳಿಕೆ

ಹೊಸದಿಲ್ಲಿ : ಪ್ರಸಕ್ತ ಮುಂಗಾರು ಋತುವಿನಲ್ಲಿ ಜೂ. 1ರಿಂದ ಇದುವರೆಗೆ ಮಧ್ಯಪ್ರದೇಶದಲ್ಲಿ ವಾಡಿಕೆಗಿಂತ ಶೇ. 94ರಷ್ಟು ಹೆಚ್ಚುವರಿ ಮಳೆಯಾಗಿದೆ ಎಂದು ಭಾರತೀಯ ಹವಾಮಾನ ಇಲಾಖೆ (ಐಎಂಡಿ) ಹೇಳಿದೆ.

ಈ ಬಾರಿ ಮಧ್ಯಪ್ರದೇಶಕ್ಕೆ ಸಾಮಾನ್ಯಕ್ಕಿಂತ ಒಂದು ವಾರ ಮುಂಚಿತವಾಗಿ, ಜೂ. 10ರಂದು ಮುಂಗಾರು ಆಗಮನವಾಗಿತ್ತು.

ಬಳಿಕ ಎರಡೇ ದಿನಗಳಲ್ಲಿ ಸಂಪೂರ್ಣ ಮಧ್ಯಪ್ರದೇಶವನ್ನು ಆವರಿಸಿತ್ತು. ಐಎಂಡಿ ನೀಡಿರುವ ಮಾಹಿತಿಯ ಪ್ರಕಾರ ಪೂರ್ವ ಮಧ್ಯಪ್ರದೇಶದ ಸಿಂಗ್ರೌಲಿ ಜಿಲ್ಲೆಯಲ್ಲಿ ವಾಡಿಕೆಗಿಂತ ಶೇ. 441 ಹೆಚ್ಚು ಮಳೆಯಾಗಿದ್ದರೆ ಹೊಶಂಗಾಬಾದ್‌ ಜಿಲ್ಲೆಯಲ್ಲಿ ವಾಡಿಕೆಗಿಂತ ಶೇ. 211 ಹೆಚ್ಚು ಮಳೆ ಸುರಿದಿದೆ.