ಕೈಯಲ್ಲಿ ಬಿಡಿಗಾಸು ಇಲ್ಲದೇ “ಈ”ಮಹಾನಗರಕ್ಕೆ ಬಂದು “ಲಿಂಕ್ ಪೆನ್ನು”ಕಂಪನಿ ಸ್ಥಾಪಿಸಿದ್ದ ಜಲಾನ್!

ಸುಮಾರು 60 ವರ್ಷಗಳ ಹಿಂದೆ ಸೂರಜ್ ಮಲ್ ಜಲಾನ್ ಅವರು ಕೋಲ್ಕತಾಗೆ ಕಾಲಿಟ್ಟಾಗ ಅವರ ಕಿಸೆಯಲ್ಲಿ ಒಂದು ಪೈಸೆಯೂ ಇರಲಿಲ್ಲವಾಗಿತ್ತು.ನಂತರ ಕೋಲ್ಕತಾ ನಗರದ ಬೀದಿ, ಬೀದಿಯಲ್ಲಿ ಪೆನ್ ಮಾರಾಟ ಮಾಡಲು ಆರಂಭಿಸಿದ್ದರು. ಕೆಲವು ಕಾಲದ ನಂತರ ಶಹರಿನ ಮಧ್ಯದಲ್ಲಿರುವ ಬಗರಿ ಮಾರ್ಕೆಟ್ ನಲ್ಲಿ ಒಂದು ಪುಟ್ಟ ಪೆನ್ ಮಾರುವ ಅಂಗಡಿ ತೆರೆದಿದ್ದರು. ಹೀಗೆ ಕೈಯಲ್ಲಿ ಒಂದು ಬಿಡಿಗಾಸು ಇಲ್ಲದೆ ಕೋಲ್ಕತಾ ನಗರದ ಮಣ್ಣನ್ನು ಮೆಟ್ಟಿದ್ದ ಸೂರಜ್ ಲಾಲ್ ಕಠಿಣ ಪರಿಶ್ರಮದಿಂದ ಇಂದು ಕೋಟ್ಯಂತರ ರೂಪಾಯಿ ವಹಿವಾಟು ನಡೆಸುವ ಲಿಂಕ್ ಪೆನ್ ಕಂಪೆನಿಯ ಒಡೆಯರಾದ ರೋಚಕ ಯಶಸ್ಸಿನ ಕಥೆ ಇವರದ್ದು….

ಸೂರಜ್ ಲಾಲ್ ಲಿಂಕ್ ಪೆನ್ ಕಂಪೆನಿಯ ಸ್ಥಾಪಕ. 2016ರಲ್ಲಿ ಈ ಕಂಪನಿ 40 ವರ್ಷ ಪೂರೈಸಿದ್ದ ಸಂಭ್ರಮವನ್ನು ಆಚರಿಸಿತ್ತು. ಹೌದು ಇದೇ ಲಿಂಕ್ ಪೆನ್ ಅನ್ನು ನಿಮ್ಮ ಶಾಲಾ ದಿನಗಳಲ್ಲಿ ಪ್ರತಿದಿನ ಬಳಸುತ್ತಿದ್ದ ನೆನಪು ನಿಮಗೆ ಈಗ ಮರುಕಳಿಸಬಹುದು.

ಸೂರಜ್ ಮಲ್ ಅವರು ರಾಜಸ್ಥಾನದ ಶಿಕಾರ್ ಜಿಲ್ಲೆಯ ಕಡು ಬಡ ಕುಟುಂಬದಲ್ಲಿ ಜನಿಸಿದ್ದರು. ಇಡೀ ಕುಟುಂಬದ ಜವಾಬ್ದಾರಿ ತಂದೆಯ ಹೆಗಲ ಮೇಲೆ ಬಿದ್ದಿತ್ತು. ಆರು ಮಕ್ಕಳಲ್ಲಿ ಐದನೇ ಮಗ ಈ ಸೂರಜ್ ಮಲ್. ಆರ್ಥಿಕ ಸಂಕಷ್ಟದಿಂದ ತಂದೆಗೆ ಪತ್ನಿ, ಮಕ್ಕಳ ಪೋಷಣೆಯೇ ದೊಡ್ಡ ಸವಾಲಾಗಿತ್ತು. ಹೀಗೆ ಕಷ್ಟದಲ್ಲಿಯೇ ಕಾಲ ಕಳೆಯುತ್ತಿದ್ದ ವೇಳೆ 19ನೇ ವರ್ಷದಲ್ಲಿ ಸೂರಜ್ ಗೆ ತಾನು ಜೀವನದಲ್ಲಿ ಏನಾದರೂ ಸಾಧಿಸಲೇಬೇಕು ಎಂದು ನಿರ್ಧರಿಸಿಬಿಟ್ಟಿದ್ದರು.

ಕೊನೆಗೊಂದು ಪೋಷಕರ ಬಳಿ ತಾನು ಈ ನಗರ ಬಿಟ್ಟು ಹೋಗಲು ಅನುಮತಿ ನೀಡಿ ಎಂದು ಸೂರಜ್ ಕೇಳಿಬಿಟ್ಟಿದ್ದ. ಅಷ್ಟೇ ಅಲ್ಲ ಮಗ ಮದುವೆಯಾಗುತ್ತಿದ್ದೇನೆ ಎಂದು ಹೇಳಿರುವ ಮಾತಿಗೂ ಸಹಮತ ಸೂಚಿಸಿದ್ದರು. ನಂತರ ಸೂರಜ್ ಲಾಲ್ ಕೋಲ್ಕತಾ ತಲುಪಿದ್ದರು. ಕೈಯಲ್ಲಿ ಬಿಡಿಗಾಸು ಇಲ್ಲದೆ ಬಂದ ಸೂರಜ್ ಗೆ ಆರಂಭದಲ್ಲಿ ಲೊಕ್ ಕಾರ್ಪೆಟ್ ಕಂಪನಿಯಲ್ಲಿ ಪುಟ್ಟ ಕೆಲಸವೊಂದು ಸಿಕ್ಕಿತ್ತು. ಅಲ್ಲಿ ಸಾರಿಗೆ ಕಂಪನಿಯಲ್ಲಿ ಕೆಲಸ ಮಾಡುತ್ತಿದ್ದ ಸ್ನೇಹಿತನ ವಾಹನದಲ್ಲಿ ರಾತ್ರಿ ನಿದ್ದೆಗೆ ಶರಣಾಗುತ್ತಿದ್ದರು. ರಸ್ತೆಬದಿಯಲ್ಲಿಯೇ ಸ್ನಾನ, ತಿಂಡಿ, ಊಟೋಪಚಾರದ ಮೂಲಕ ದಿನಚರಿ ಸಾಗಿತ್ತು. ದಿನಂಪ್ರತಿ ಹಲವು ಕಿಲೋ ಮೀಟರ್ ಗಳಷ್ಟು ದೂರ ನಡೆದುಕೊಂಡೇ ಹೋಗಿ ಆಫೀಸ್ ತಲುಪುತ್ತಿದ್ದರು. ರಾತ್ರಿ ನಡೆದುಕೊಂಡೇ ವಾಪಸ್ಸಾಗುತ್ತಿದ್ದರು. ಇದಕ್ಕೆ ಕಾರಣ ಹಣ ಉಳಿಸುವುದಾಗಿತ್ತು!

“ನಾನು ಕಾರ್ಪೆಟ್ ಉದ್ಯಮದಲ್ಲಿ ಒಂದು ವರ್ಷ ಕೆಲಸ ಮಾಡಿದ ನಂತರ, ಬಾಚಣಿಗೆ ತಯಾರಿಸುವ ಕಂಪನಿ ಸೇರಿಕೊಂಡೆ. ಅಲ್ಲಿ ಎರಡು ವರ್ಷ ಕೆಲಸ ಮಾಡಿದ್ದೇನೆ, ಆ ಬಳಿಕ ಅಕ್ಕಿ ಗಿರಣಿಯಲ್ಲಿ ಕೆಲಸ ಮಾಡಿದ್ದು, ಕೊನೆಗೆ ಚಹಾ ಎಸ್ಟೇಟ್ ನಲ್ಲಿ ಸಹಾಯಕ ಮ್ಯಾನೇಜರ್ ಆಗಿ ದುಡಿಯಲು ಆರಂಭಿಸಿದೆ ಆಗ ನನಗೆ ತಿಂಗಳಿಗೆ ಸಿಗುತ್ತಿದ್ದ ಸಂಬಳ 500 ರೂಪಾಯಿ” ಎಂಬುದು ಸೂರಜ್ ಮಲ್ ಮನದಾಳದ ಮಾತು.

ಏತನ್ಮಧ್ಯೆ ವಯಸ್ಸಾದ ತಂದೆ, ತಾಯಿಯನ್ನು ನೋಡಿಕೊಳ್ಳುವ ನಿಟ್ಟಿನಲ್ಲಿ ಸೂರಜ್ ಮಲ್ ಅವರನ್ನು ಊರಿಗೆ ವಾಪಸ್ ಕರೆಯಿಸಿಕೊಂಡಿದ್ದರು. ಇದರಿಂದಾಗಿ ಶ್ರಮಪಟ್ಟು ದುಡಿಯುತ್ತಿದ್ದ ಸೂರಜ್ ಕನಸುಗಳು ವಿರಾಮ ಪಡೆದುಕೊಳ್ಳಲು ಕಾರಣವಾಯಿತು. ಹೀಗೆ ಊರಲ್ಲಿ ಏನೂ ಕೆಲಸ ಇಲ್ಲದೆ ಕುಳಿತುಕೊಳ್ಳುವುದು ಸರಿಯಲ್ಲ, ಏನಾದರೂ ಕೆಲಸ ಮಾಡಬೇಕೆಂದು ನಿರ್ಧರಿಸಿ, ಪೆನ್ನುಗಳನ್ನು ಖರೀದಿಸಿದ ಸೂರಜ್ ಮನೆ, ಮನೆಗೆ ತೆರಳಿ ಮಾರಾಟ ಮಾಡತೊಡಗಿದರು. ಈ ಸಂದರ್ಭದಲ್ಲಿ ಸೂರಜ್ ಗೆ ಒಂದು ವಿಷಯ ಮನದಟ್ಟಾಯಿತು, ಅದೇನೆಂದರೆ ನಮ್ಮ ದೇಶದಲ್ಲಿ ಗುಣಮಟ್ಟದ ಪೆನ್ನು ಇಲ್ಲ ಎಂಬುದಾಗಿತ್ತು.

ಹೀಗೆ ಕನಸು ಚಿಗುರೊಡೆದಾಗ ಕೋಲ್ಕತಾದ ಬಗ್ರಿ ಬಜಾರ್ ಪ್ರದೇಶದಲ್ಲಿ ಒಂದು ಬಾಲ್ ಪೆನ್ ಮಾರಾಟದ ಅಂಗಡಿಯನ್ನು ತೆರೆದಿದ್ದರು. ಯಾಕೋ ಇದರಿಂದಲೂ ಸೂರಜ್ ಅವರ ಮನಸ್ಸಿಗೆ ತೃಪ್ತಿ ತರಲಿಲ್ಲ. ಏನೇ ಆಗಲಿ ಪೆನ್ನು ತಯಾರಿಸುವ ಸ್ವಂತ ಕಂಪನಿ ಮಾಡಬೇಕೆಂಬ ಹಠಕ್ಕೆ ಬಿದ್ದು ಬಿಟ್ಟಿದ್ದರು.

ತನ್ನ ಅಳಿಯನ(ಪತ್ನಿಯ ತಂದೆ) ಕನಸಿಗೆ ನೀರೆರೆದು ಪೋಷಿಸಿದವರು ಮಾವ. ಅವರು ಕೋಲ್ಕತಾದ ಮಾಲ್ಪಾರಾದಲ್ಲಿ ರೂಂ ಅನ್ನು ನೀಡಿದ್ದರು. ಅಲ್ಲಿ ಸೂರಜ್ ಕೇವಲ ಹತ್ತು ಸಾವಿರ ರೂಪಾಯಿ ಬಂಡವಾಳದಲ್ಲಿ ಪೆನ್ನುಗಳನ್ನು ತಯಾರಿಸುವ ಪ್ಲಾಸ್ಟಿಕ್ ಭಾಗಗಳ ವ್ಯವಹಾರ ಆರಂಭಿಸಿದ್ದರು. ಅವರ ಕೆಲಸಕ್ಕೆ ತುಂಬಾ ಮೆಚ್ಚುಗೆ ಕೂಡಾ ವ್ಯಕ್ತವಾಗಿತ್ತು. 1976ರಲ್ಲಿ ಸೂರಜ್ ಅವರು ಕೇವಲ 700 ಚದರ ಅಡಿಯಲ್ಲಿ 700 ರೂಪಾಯಿ ಬಾಡಿಗೆಗೆ ಐದು ಮಂದಿ ನೌಕರರ ಜತೆ ಪುಟ್ಟ ಕಂಪನಿಯನ್ನು ಆರಂಭಿಸಿದ್ದರು.

ಅವರ ಗೆಳೆಯರ ಸಲಹೆಯಂತೆ ತಮ್ಮ ಬ್ರ್ಯಾಂಡ್ ಗೆ ಲಿಂಕ್ ಎಂಬ ಹೆಸರನ್ನು ಇಟ್ಟಿದ್ದರು. ಸೂರಜ್ ಅವರ ಪೆನ್ನಿನ ವ್ಯವಹಾರಕ್ಕೆ ಜನರು ಕೂಡಾ ಪ್ರೋತ್ಸಾಹ ನೀಡಿದ್ದು, ಇವರ ಬಳಿಯೇ ದೊಡ್ಡ ಪ್ರಮಾಣದಲ್ಲಿ ಪೆನ್ನುಗಳನ್ನು ಖರೀದಿಸತೊಡಗಿದ್ದರು. 1980ರಲ್ಲಿ ಸೂರಜ್ ಅವರ ಪುತ್ರ 17 ವರ್ಷದ ದೀಪಕ್ ಜಲಾನ್ ತರಬೇತುದಾರನಾಗಿ ಕಾರ್ಯನಿರ್ವಹಿಸಲು ಆರಂಭಿಸಿದ್ದ. ಈಗ ದೀಪಕ್ ಕಂಪನಿಯ ಆಡಳಿತ ನಿರ್ದೇಶಕರಾಗಿದ್ದಾರೆ. 1992ರಲ್ಲಿ ಲಿಂಕ್ ಕಂಪನಿ ಮಿಟ್ಸುಬಿಷಿ ಜತೆ ಯುನಿ ಬಾಲ್ ಪೆನ್ನುಗಳ ಮಾರಾಟಕ್ಕೆ ಒಪ್ಪಂದ ಮಾಡಿಕೊಂಡಿತ್ತು. ಆ ನಂತರ ದಕ್ಷಿಣ ಕೊರಿಯಾಕ್ಕೆ 12 ಲಕ್ಷ ಪೆನ್ನುಗಳನ್ನು ಮಾರಾಟ ಮಾಡಿತ್ತು. ತದನಂತರ ಲಿಂಕ್ ಓಷನ್ ಜೆಲ್ ಮತ್ತು ಲಿಂಕ್ ಸ್ಮಾರ್ಟ್ ಜೆಲ್ ಪೆನ್ನುಗಳು ಶಾಲೆ ಮತ್ತು ಕಚೇರಿಗಳಲ್ಲಿ ಅತೀ ಹೆಚ್ಚು ಜನಪ್ರಿಯತೆ ಪಡೆದುಕೊಂಡಿತ್ತು. 2005ರಲ್ಲಿ ಲಿಂಕ್ ಕಂಪನಿ ತನ್ನ ಲಿಂಕ್ ಗ್ಲಿಸರಿನ್ ಪೆನ್ನುಗಳ ಮಾರಾಟವನ್ನು ಆರಂಭಿಸಿತ್ತು.

ಪ್ರಸ್ತುತ ಲಿಂಕ್ ಕಂಪನಿ ಪೆನ್ನುಗಳ ವಿತರಣೆ, ಮಾರ್ಕರ್, ರಬ್ಬರ್, ನೋಟಬುಕ್ಸ್, ಫೈಲ್ ಪೋಲ್ಡರ್ಸ್ ಮಾರಾಟದ ಅತೀ ದೊಡ್ಡ ವಿತರಕ ಕಂಪನಿಯಾಗಿ ಬೆಳೆದು ನಿಂತಿದೆ. ಮೌಂಟ್ ಬ್ಲಾಕ್ ಕಂಪನಿಯು ವಿಶ್ವದಲ್ಲಿಯೇ ಪೆನ್ನು ಉತ್ಪಾದನಾ ಕ್ಷೇತ್ರದಲ್ಲಿ ಹೆಸರುವಾಸಿಯಾದ ಕಂಪನಿ. ಆ ನಂತರ ಪಾರ್ಕರ್ ಕಂಪನಿಗೆ ಎರಡನೇ ಸ್ಥಾನ ಇದ್ದು, ಆ ಕಂಪನಿಗಳಿಗೆ ಸಡ್ಡು ಹೊಡೆದು ಬೆಳೆದಿರುವುದು ಲಿಂಕ್ ಕಂಪನಿಯ ಹೆಗ್ಗಳಿಕೆಯಾಗಿದೆ.

*ನಾಗೇಂದ್ರ ತ್ರಾಸಿ