ನೂಲು ಪೂರೈಕೆಯಿಲ್ಲದೆ ಸೊರಗಿದ ಕೈಮಗ್ಗ ಉದ್ಯಮ

ಪುಂಜಾಲಕಟ್ಟೆ: ಕಳೆದ ಹಲವು ವರ್ಷಗಳ ಹಿಂದೆ ಸಂಗಬೆಟ್ಟು ಗ್ರಾಮದಲ್ಲಿರುವ ಹಲವರ ಮೂಲ ಕಸುಬು ಕೈಮಗ್ಗ ಆಗಿ ಗ್ರಾಮ ಹೆಸರುವಾಸಿಯಾಗಿತ್ತು. ಆಧುನಿಕತೆ ಪ್ರವೇಶ ಹಾಗೂ ನೂಲು ಪೂರೈಕೆಯಿಲ್ಲದೆ ಕಸುಬು ಮರೆಯಾಗಿ ಈಗ ಪರಿಕರಗಳು ಮಾತ್ರ ಉಳಿದುಕೊಂಡಿವೆ.

ಸಂಗಬೆಟ್ಟು ಗ್ರಾಮದ ನಿವಾಸಿ ರಾಮ ಶೆಟ್ಟಿಗಾರ್‌ (72) ಕೈಮಗ್ಗ ಕೆಲಸವನ್ನು 54 ವರ್ಷಗಳಿಂದ ನಡೆಸುತ್ತಿದ್ದು, ಕಳೆದ 3 ವರ್ಷಗಳಿಂದ ಮಾರುಕಟ್ಟೆಯಲ್ಲಿ ನೂಲು ಪೂರೈಕೆಯಿಲ್ಲದೆ ಮೂಲ ಕಸುಬನ್ನು ನಿಲ್ಲಿಸಿದ್ದಾರೆ. ಅಂದು ಇವರ ಕೈಮಗ್ಗದ ನವೀನ ವಿನ್ಯಾಸದ ಸೀರೆಗಳಿಗೆ ಹಲವು ಜಿಲ್ಲೆಗಳ ಮಾರುಕಟ್ಟೆಗಳಲ್ಲಿ ಬೇಡಿಕೆಯಿತ್ತು. 5 ಮೀ. ಉದ್ದದ ಸೀರೆಗೆ ಸ್ಥಳೀಯ ಮಾರುಕಟ್ಟೆಯಲ್ಲಿ, 6 ಮೀ. ಉದ್ದದ ಸೀರೆಗೆ ಇತರ ಜಿಲ್ಲೆಗಳಲ್ಲಿ ಹೆಚ್ಚಿನ ಬೇಡಿಕೆಯಿತ್ತು. ಆಧುನಿಕತೆ ಮುಂದುವರಿದಂತೆ ಕೈಮಗ್ಗದಿಂದ ತಯಾರಿಸುವ ವಸ್ತ್ರಗಳಿಗೆ ಮಾರುಕಟ್ಟೆಯಲ್ಲಿ ಬೇಡಿಕೆ ಇಳಿಮುಖವಾಯಿತು.

ಕೈಮಗ್ಗದ ಬಟ್ಟೆ ಹೆಚ್ಚು ಬಾಳಿಕೆ, ಬಣ್ಣ ಮಾಸುವುದಿಲ್ಲ. ಇದರಿಂದಾಗಿ ಕೆಲವರು ಇನ್ನೂ ಕೈಮಗ್ಗದ ಬಟ್ಟೆಯನ್ನು ಬಳಸುತ್ತಿದ್ದಾರೆ ಎಂದು ರಾಮ ಶೆಟ್ಟಿಗಾರ ಅವರು ಸ್ಮರಿಸುತ್ತಾರೆ. ಆಧುನಿಕತೆಯಿಂದಾಗಿ ಕೈಮಗ್ಗದಿಂದ ದೂರ ಉಳಿದ ಕೆಲಸಗಾರರು ಇತರ ಕೆಲಸದಲ್ಲಿ ನಿರತರಾಗಿದ್ದಾರೆ. ಇತ್ತೀಚೆಗೆ ಮಾರುಕಟ್ಟೆಯಲ್ಲಿ ಕೈಮಗ್ಗದ ಬಟ್ಟೆಗಳಿಗೆ ಬಹು ಬೇಡಿಕೆಯಿದೆ ಎನ್ನುತ್ತಾರೆ ಕೈಮಗ್ಗ ಕೆಲಸಗಾರರು.

ಬಳಕೆಗೆ ಉತ್ತಮ
ಕಳೆದ 54 ವರ್ಷಗಳಿಂದ ಕೈಮಗ್ಗ ಕಸುಬು ನಡೆಸುತ್ತಿದ್ದೆ, ಬಟ್ಟೆ ತಯಾರಿಕೆಗೆ ಬೇಕಾಗಿರುವ ನೂಲು ಮಾರುಕಟ್ಟೆಯಲ್ಲಿ ಸಿಗದಿದ್ದ ಕಾರಣದಿಂದಾಗಿ ಕಳೆದ 3 ವರ್ಷಗಳಿಂದ ಕಸುಬು ನಿಲ್ಲಿಸಬೇಕಾಯಿತು. ಕೈಮಗ್ಗದಿಂದ ತಯಾರಿಸಿದ ಬಟ್ಟೆಗಳಿಗೆ ನೈಸರ್ಗಿಕವಾದ ಬಣ್ಣ ಉಪಯೋಗಿಸ ಲಾಗುತ್ತಿದ್ದು, ಇದು ಬಳಕೆಗೆ ಉತ್ತಮವಾಗಿದೆ. ಪ್ರತಿನಿತ್ಯ 1ರಿಂದ 2 ಸೀರೆ ತಯಾರಿಸಬಹುದು. ಆಧುನಿಕ ತಂತ್ರಜ್ಞಾನದಿಂದ ತಯಾರಿಕೆ ಅತಿ ವೇಗವಾಗುತ್ತಿದೆ.ಹೀಗಾಗಿ ಕೈಮಗ್ಗದ ಕೆಲಸ ಮರೆಯಾಗುತ್ತಿದೆ.
– ರಾಮ ಶೆಟ್ಟಿಗಾರ
ಕೈಮಗ್ಗ ಕೆಲಸಗಾರರು