ವಿಪತ್ತು ತೆರಿಗೆ ಬಗ್ಗೆ ನಿರ್ಧರಿಸಲು ಸಮಿತಿ

ನವದೆಹಲಿ: ಕೇರಳದ ನೈಸರ್ಗಿಕ ವಿಕೋಪದಂತಹ ಸಮಸ್ಯೆ ಉಂಟಾದಾಗ ಕೆಲವು ಸರಕು ಮತ್ತು ಸೇವೆಗಳ ಮೇಲೆ ಹೆಚ್ಚುವರಿ ತೆರಿಗೆ ವಿಧಿಸುವ ಕುರಿತು ಏಳು ಸದಸ್ಯರ ಸಚಿವರ ಸಮಿತಿಯನ್ನು ಶುಕ್ರವಾರ ಜಿಎಸ್‌ಟಿ ಮಂಡಳಿ ರಚಿಸಿದೆ. ರಾಜ್ಯದಲ್ಲಿ ಕೆಲವು ಸಾಮಗ್ರಿಗಳು ಹಾಗೂ ಸೇವೆಗಳ ಮೇಲೆ ಹೆಚ್ಚುವರಿ ತೆರಿಗೆ ವಿಧಿಸಿ, ನೈಸರ್ಗಿಕ ವಿಪತ್ತಿನಿಂದ ಉಂಟಾದ ನಷ್ಟವನ್ನು ಭರ್ತಿ ಮಾಡಿಕೊಳ್ಳಲು ನೆರವಾಗಬೇಕು ಎಂದು ಕೇಂದ್ರ ಸರ್ಕಾರ ಹಾಗೂ ಜಿಎಸ್‌ಟಿ ಮಂಡಳಿಯನ್ನು ಕೇರಳ ಸರ್ಕಾರ ಆಗ್ರಹಿಸಿತ್ತು. ಈ ಹಿನ್ನೆಲೆಯಲ್ಲಿ ಕೇರಳ ಮನವಿ ಪರಿಗಣಿಸಿ, ವಿಷಯವನ್ನು ಸಮಿತಿಗೆ ಹಸ್ತಾಂತರಿಸಲಾಗಿದೆ. ಸಮಿತಿಯು ಇದರ ಕಾನೂನು ಸಾಧ್ಯತೆ ಬಾಧ್ಯತೆಗಳನ್ನು ಚರ್ಚಿಸಿ ನಿರ್ಧರಿಸಲಿದೆ ಎಂದು ವಿತ್ತ ಸಚಿವ ಅರುಣ್‌ ಜೇಟ್ಲಿ ಹೇಳಿದ್ದಾರೆ. 

ರಾಜ್ಯಕ್ಕೆ ಸೀಮಿತವಾಗಿ ಪ್ರತ್ಯೇಕ ತೆರಿಗೆ ವಿಧಿಸಬೇಕೆ, ಇಡೀ ದೇಶಕ್ಕೆ ತೆರಿಗೆಯನ್ನು ಅನ್ವಯಿಸಬೇಕೆ ಅಥವಾ ಕೆಲವೇ ಐಷಾರಾಮಿ ಸಾಮಗ್ರಿಗಳ ಮೇಲೆ ಈ ತೆರಿಗೆ ವಿಧಿಸಬೇಕೆ ಎಂದು ಸಮಿತಿ ವಿಶ್ಲೇಷಿಸಲಿದೆ. ಅಲ್ಲದೆ ರಾಜ್ಯಗಳಿಗೆ ಉಂಟಾಗುವ ತೆರಿಗೆ ಕೊರತೆಯ ಬಗ್ಗೆ ಮಂಡಳಿ ಸಭೆಯಲ್ಲಿ ಚರ್ಚಿಸಲಾಗಿದೆ.