ಗೂಡ್ಸ್‌ ವಾಹನ ಪಲ್ಟಿ: ಅಂತ್ಯಕ್ರಿಯೆ ಮುಗಿಸಿ ಮರಳುತ್ತಿದ್ದ ಐವರ ಸಾವು

ಮುದ್ದೇಬಿಹಾಳ: ತಾಲೂಕಿನ ಚಿರ್ಚನಕಲ್‌ ಕ್ರಾಸ್‌ನಲ್ಲಿ ಶನಿವಾರ ಸಂಜೆ ಅಂತ್ಯಕ್ರಿಯೆ ಮುಗಿಸಿ ಮರಳಿ ಊರಿಗೆ ಹೋಗುತ್ತಿದ್ದ 35ಕ್ಕೂ ಹೆಚ್ಚು ಜನರಿದ್ದ ಗೂಡ್ಸ್‌ ಮಿನಿ ವಾಹನವೊಂದು ಎದುರಿಗೆ ಬಂದ ಟಿಪ್ಪರ್‌ ತಪ್ಪಿಸಲು ಹೋಗಿ ಪಲ್ಟಿಯಾಗಿ ಐವರು ಮೃತಪಟ್ಟಿದ್ದಾರೆ. 29 ಜನರು ಗಾಯಗೊಂಡಿದ್ದಾರೆ.

ಮೃತರನ್ನು ಬಾಗಲಕೋಟೆ ಜಿಲ್ಲೆ ಗುಳೇದಗುಡ್ಡ ತಾಲೂಕು ಹಳದೂರ ಗ್ರಾಮದ ಅಮೀನಸಾಬ ಹುಸೇನಸಾಬ ಸಾದಿನಿ (50), ಖಾಜಾಬಿ ಖಾಜೇಸಾಬ ಸಾದಿನಿ (55), ಪಾರ್ವತವ್ವ ನೂರಂದಪ್ಪ ರಕ್ಕಸಗಿ (50), ಬಾಗಲಕೋಟ ತಾಲೂಕು ಬೊಮ್ಮಣಗಿಯ ಹುಸೇನಬಿ ಜಲಾಲ ಮೊಕಾಶಿ (48), ಬಂದಗಿಸಾಬ ಮೊಕಾಶಿ (60) ಎಂದು ಗುರುತಿಸಲಾಗಿದೆ.

ಗಾಯಗೊಂಡ 29 ಜನರ ಪೈಕಿ 10 ಜನರ ಪರಿಸ್ಥಿತಿ ಗಂಭೀರವಾಗಿದ್ದು, ಹೆಚ್ಚಿನ ಚಿಕಿತ್ಸೆಗೆ ಇವರನ್ನು ಬಾಗಲಕೋಟೆ ಜಿಲ್ಲಾಸ್ಪತ್ರೆಗೆ ದಾಖಲಿಸಲಾಗಿದೆ. ಇಲ್ಲಿನ ತಾಲೂಕು ಸರ್ಕಾರಿ ಆಸ್ಪತ್ರೆಯಲ್ಲಿ 17 ಜನರಿಗೆ ಚಿಕಿತ್ಸೆ ನೀಡಲಾಗುತ್ತಿದೆ.

ತಾಲೂಕಿನ ಕಂದಗನೂರ ಗ್ರಾಮದಲ್ಲಿ ಖೈರೂನಬಿ ಇಮಾಮಸಾಬ ನಾಯೊಡಿ ಎಂಬುವರ ಅಂತ್ಯಕ್ರಿಯೆ ಮುಗಿಸಿಕೊಂಡು ತಮ್ಮೂರುಗಳಿಗೆ ಮರಳುತ್ತಿದ್ದ ಸಂದರ್ಭದಲ್ಲಿ ಈ ದುರ್ಘ‌ಟನೆ ಸಂಭವಿಸಿದೆ. ಚಾಲಕನ ಅತಿ ವೇಗ ಮತ್ತು ನಿಷ್ಕಾಳಜಿಯಿಂದ ಈ ಘಟನೆ ನಡೆದಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.