ಕೋನಸಾಗರದಲ್ಲಿ ಉತ್ತಮ ಮಳೆ

ಕೊಂಡ್ಲಹಳ್ಳಿ: ಕೋನಸಾಗರದಲ್ಲಿ ಶನಿವಾರ ಸಂಜೆ ಉತ್ತಮ ಮಳೆಯಾಗಿದೆ. ಆರಿದ್ರಾ ಮಳೆಯ ಅಬ್ಬರಕ್ಕೆ ಹಳ್ಳ, ಕೃಷಿ ಹೊಂಡ, ಚೆಕ್‌ಡ್ಯಾಂಗಳು, ಹೊಲಗಳು ನೀರಿನಿಂದ ಮೈದುಂಬಿಕೊಂಡಿವೆ.

ಸಂಜೆ 6ಕ್ಕೆ ಆರಂಭವಾದ ಮಳೆ, ಒಂದೂವರೆ ಗಂಟೆಗೂ ಹೆಚ್ಚು ಕಾಲ ಮಳೆ ಸುರಿಯಿತು. ಕೊಂಡ್ಲಹಳ್ಳಿ ಮಾರ್ಗದಲ್ಲಿನ ಹಳ್ಳ, ಬಡತಿಮ್ಮಪ್ಪ ಹಳ್ಳಗಳಲ್ಲಿ ನೀರು ತುಂಬಿ ರಸ್ತೆಯಲ್ಲಿ ಭಾನುವಾರ ಬೆಳಿಗ್ಗೆವರೆಗೂ ಹರಿದಿದೆ. ಕೋನಸಾಗರ ಗ್ರಾಪಂ ವ್ಯಾಪ್ತಿಯ ಉಡೇವು ಗ್ರಾಮದಲ್ಲೂ ಮಳೆಯಾಗಿದ್ದು, ಹಳ್ಳ, ಚೆಕ್‌ಡ್ಯಾಂ, ಕೃಷಿ ಹೊಂಡಗಳು ಭರ್ತಿಯಾಗಿವೆ. ಗ್ರಾಮದಂಚಿನಲ್ಲಿರುವ ಆಂಧ್ರಪ್ರದೇಶ ಮಾರ್ಗದ ರಸ್ತೆಯ ತಿರುವಿನ ಸೇತುವೆಯಿಂದ ಊರೊಳಗಿನ ಅಂಗಡಿ ಮುಂಗಟ್ಟುಗಳಿಗೆ ಹಾಗೂ ಮನೆಗಳಿಗೂ ನೀರು ನುಗ್ಗಿ ತೊಂದರೆಯಾಗಿದೆ.

ಹೊಲ-ತೋಟಗಳಲ್ಲಿನ ಒಡ್ಡು, ಚೆಕ್‌ಡ್ಯಾಂ, ಕೃಷಿ ಹೊಂಡಗಳು, ರೈತರ ಹೊಲ-ತೋಟಗಳ ರಸ್ತೆಗಳು ಕಿತ್ತು ಹೋಗಿ ಸಂಚಾರಕ್ಕೆ ತೊಂದರೆಯಾಗಿದೆ. ಕೋನಸಾಗರದ ಸಮೀಪದ ಶೇಂಗಾ ಹೊಲವೊಂದಕ್ಕೆ ಮಳೆ ನೀರು ನುಗ್ಗಿ ಬೆಳೆ ಸಂಪೂರ್ಣ ಹಾಳಾಗಿದೆ. ಬಿ.ಜಿ. ಕೆರೆ ಹಾಗೂ ಕೊಂಡ್ಲಹಳ್ಳಿ ಗ್ರಾಮಗಳಲ್ಲೂ ಸ್ವಲ್ಪ ಮಳೆಯಾಗಿದೆ.