ಗೋಣಿಕೊಪ್ಪಲು: ವಿವಿಧ ಕಾಮಗಾರಿಗಳಿಗೆ ಚಾಲನೆ

ಗೋಣಿಕೊಪ್ಪಲು: ಜಿ.ಪಂ. ಅನುದಾನದ 8.60 ಲಕ್ಷ ರೂಪಾಯಿಗಳಲ್ಲಿ ವಿವಿಧ ಕಾಮಗಾರಿಗಳಿಗೆ ಜಿ.ಪಂ. ಸದಸ್ಯ ಸಿ.ಕೆ. ಬೋಪಣ್ಣ ಭೂಮಿ ಪೂಜೆ ನೆರವೇರಿಸಿದರು.

ಅತ್ತೂರು ದುರ್ಗಾ ಪರಮೇಶ್ವರಿ ದೇವಸ್ಥಾನದ ಕೆರೆ ಅಭಿವೃದ್ದಿಗೆ 2.60 ಲಕ್ಷ ರೂ, ಅತ್ತೂರು ಪ್ರಾಥಮಿಕ ಶಾಲೆಗೆ ಇಂಟರ್‌ಲಾಕ್‌ ಅಳವಡಿಕೆಗೆ 2 ಲಕ್ಷ ರೂ., ಗೋಣಿಕೊಪ್ಪ ಕೃಷಿ ವಿಜ್ಞಾನ ಕೇಂದ್ರದ ಪೈಪ್‌ಲೈನ್‌ ಮತ್ತು ಮೋಟಾರ್‌ ಅಳವಡಿಕೆಗೆ 2 ಲಕ್ಷ ರೂ. ಅರುವತ್ತೋಕ್ಲು ಕೊಳವೆ ಬಾವಿ ತೋಡಲು 2 ಲಕ್ಷ ರೂಪಾಯಿಗಳ ಅನುದಾನದಲ್ಲಿ ಅಭಿವೃದ್ಧಿ ಕಾರ್ಯಗಳಿಗೆ ಚಾಲನೆ ನೀಡಲಾಯಿತು. ಜಿ.ಪಂ. ಅನುದಾನವನ್ನು ಸಮರ್ಪಕವಾಗಿ ಬಳಸಿ ನನ್ನ ಕ್ಷೇತ್ರದ ಅಭಿವೃದ್ಧಿ ಕಾರ್ಯಕ್ಕೆ ಮನಃಪೂರ್ವಕ ಸ್ಪಂದಿಸುತ್ತಿದ್ದೇನೆ. ಅನುದಾನವನ್ನು ದುರ್ಬಳಕೆ ಮಾಡಿಕೊಳ್ಳದೆ ಉತ್ತಮ ಗುಣಮಟ್ಟದ ಕಾಮಗಾರಿ ನಡೆಸುವಂತೆ ಗುತ್ತಿಗೆದಾರರಿಗೆ ಸೂಚಿಸಿದ್ದೇನೆ. 5 ವರ್ಷಗಳ ಜಿ.ಪಂ. ಅನುದಾನವನ್ನು ಅಭಿವೃದ್ಧಿ ಕಾರ್ಯಗಳಿಗೆ ಬಳಸಿಕೊಳ್ಳುತ್ತೇನೆ. ಅಭಿವೃದ್ಧಿ ಕಾರ್ಯಗಳಿಗೆ ಸ್ಥಳೀಯ ಪಂಚಾಯತ್‌ ಅಧ್ಯಕ್ಷರ ಹಾಗೂ ಸದಸ್ಯರ, ಸಾರ್ವಜನಿಕರ ಬೆಂಬಲ ಅಗತ್ಯ ಎಂದು ಸಿ.ಕೆ. ಬೋಪಣ್ಣ ಹೇಳಿದರು.

ಈ ಸಂದರ್ಭ ಹಾತೂರು ಅಧ್ಯಕ್ಷೆ ಆಶಾಲತಾ, ಸದಸ್ಯ ಕುಲ್ಲಚಂಡ ಚಿಣ್ಣಪ್ಪ, ಮ್ಯಾಥುÂ ಸುಭಾಷ್‌, ಆರ್‌. ಸಾವಿತ್ರಮ್ಮ, ಗೋಣಿಕೊಪ್ಪ ಗ್ರಾ.ಪಂ. ಸದಸ್ಯ ರಾಮಕೃಷ್ಣ ಭಟ್‌, ಸ್ಥಳ ದಾನಿಗಳಾದ ಸಣ್ಣುವಂಡ ಕಿಶೋರ್‌ ಮಾಚಯ್ಯ, ರತ್ನಾ ಸುಬ್ಬಯ್ಯ, ಶಾಲಾ ಮುಖ್ಯೋಪಾಧ್ಯಾಯಿನಿ ಮಾಲತಿ ಮತ್ತು ಸಹ ಶಿಕ್ಷಕರು ಹಾಜರಿದ್ದರು.