ಸಿಎಂ ಪರೀಕರ್‌ ಬದಲಾಯಿಸುವ ಪ್ರಶ್ನೆಯೇ ಇಲ್ಲ : ಗೋವಾ ಕೃಷಿ ಸಚಿವ

ಪಣಜಿ : ಅನಾರೋಗ್ಯದಿಂದ ಚೇತರಿಸಿಕೊಳ್ಳುತ್ತಿರುವ ಗೋವಾ ಮುಖ್ಯಮಂತ್ರಿ ಮನೋಹರ ಪರೀಕರ್‌ ಅವರನ್ನು ಬದಲಾಯಿಸುವ ಪ್ರಶ್ನೆಯೇ ಇಲ್ಲ ಗೋವಾ ಫಾರ್ವರ್ಡ್‌ ಪಕ್ಷದ ಮುಖ್ಯಸ್ಥ ವಿಜಯ್‌ ಸರ್‌ದೇಸಾಯ್‌ ಹೇಳಿದ್ದಾರೆ.

ಪರೀಕರ್‌ ಸಚಿವ ಸಂಪುಟದಲ್ಲಿ ಸರ್‌ದೇಸಾಯಿ  ಕೃಷಿ ಸಚಿವರಾಗಿದ್ದಾರೆ. ಪ್ಯಾಂಕ್ರಿಯಾಟಿಕ್‌ ತೊಂದರೆಗಾಗಿ ದಿಲ್ಲಿಯ ಏಮ್ಸ್‌ ನಲ್ಲಿ ಚಿಕಿತ್ಸೆ ಪಡೆದು ಕಳೆದ ಅ.14ರಂದು ಗೋವೆಗೆ ಮರಳಿರುವ ಪರಿಕರ್‌ ತಮ್ಮ ನಿವಾಸದಲ್ಲಿ ವಿಶ್ರಾಂತಿ ಪಡೆಯುತ್ತಿದ್ದಾರೆ. 

”ಸಿಎಂ ಪರೀಕರ್‌ ಅವರ ಅನಾರೋಗ್ಯದಿಂದಾಗಿ ರಾಜ್ಯಾಡಳಿತೆಯು ಬಹುತೇಕ ಸ್ಥಗಿತಗೊಂಡಿದೆ” ಎಂದು ವಿರೋಧ ಪಕ್ಷಗಳು ಆರೋಪಿಸುತ್ತಿರುವ ನಡುವೆಯೇ ಬಿಜೆಪಿ “ರಾಜ್ಯದಲ್ಲಿನ ಸರಕಾರಿ ಯಂತ್ರ ಸುಗಮವಾಗಿ ಸಾಗುತ್ತಿದೆ” ಎಂದು ಹೇಳಿಕೊಂಡಿದೆ.