ಅಕ್ರಮ ಸಂಪತ್ತು: ಗೋವಾ ಕೈ ನಾಯಕನ ವಿರುದ್ಧ ಎಸಿಬಿ ಎಫ್ಐಆರ್‌

ಪಣಜಿ : ಘೋಷಿತ ಆದಾಯಕ್ಕಿಂತ 4 ಕೋಟಿ ರೂ. ಹೆಚ್ಚು ಸಂಪತ್ತನ್ನು ಕಲೆಹಾಕಿರುವ ಆರೋಪದ ಮೇಲೆ ಗೋವೆಯ ಕಾಂಗ್ರೆಸ್‌ ನಾಯಕ ಚಂದ್ರಕಾಂತ ಕಾವಳೇಕರ್‌ ವಿರುದ್ಧ ಗೋವಾ ಪೊಲೀಸ್‌ ಭ್ರಷ್ಟಾಚಾರ ನಿಗ್ರಹ ದಳ ಎಫ್ಐಆರ್‌ ದಾಖಲಿಸಿಕೊಂಡಿದೆ.

ಕಾವಳೇಕರ್‌ ಅವರು ಅಕ್ರಮ ನಿವೇಶನಗಳನನ್ನು ಹಂಚುವ ಮೂಲಕ ಅಪಾರ ಪ್ರಮಾಣದ ಸಂಪತ್ತನ್ನು ಶೇಖರಿಸಿಕೊಂಡಿದ್ದಾರೆ ಎಂಬ ಮಾಧ್ಯಮ ವರದಿಗಳ ಆಧಾರದ ಮೇಲೆ ಗೋವೆಯ ಭ್ರಷ್ಟಾಚಾರ ನಿಗ್ರಹ ದಳ 2012ರಲ್ಲೇ ಕಾವಳೇಕರ್‌ ವಿರುದ್ಧ ಸ್ವಯಂ ಪ್ರೇರಣೆಯಿಂದ ಭ್ರಷ್ಟಾಚಾರ ತಡೆ ಕಾಯಿದೆಯ ಹಲವಾರು ಸೆಕ್ಷನ್‌ಗಳಡಿ ಕೇಸು ದಾಖಲಿಸಿಕೊಂಡಿತು. 

ಆ ಪ್ರಕಾರ 2012ರಲ್ಲೇ ತನಿಖೆ ಆರಂಭಿಸಿದ್ದ ಎಸಿಬಿ, ಕಾವಳೇಕರ್‌ ಅವರು ಕೇರಳದಲ್ಲಿ ಹೊಂದಿರುವ ಆಸ್ತಿಯ ವಿರುದ್ಧವೂ ತನಿಖೆ ನಡೆಸಿ ತನ್ನ ಪ್ರಾಥಮಿಕ ವರದಿಯನ್ನು ರಾಜ್ಯ ಸರಕಾರಕ್ಕೆ 2013ರಲ್ಲೇ ನೀಡಿತ್ತು.

ಇದೀಗ ಎಫ್ಐಆರ್‌ ದಾಖಲಾಗಿರುವ ಹಿನ್ನೆಲೆಯಲ್ಲಿ ಎಸಿಬಿ ಇಂದು ಕಾವಳೇಕರ್‌ ಅವರ ಗೋವೆಯಲ್ಲಿನ ಕ್ವೆಪೆಂ ನ ಬೇತುಲ್‌ ನಿವಾಸದ ಮೇಲೆ ದಾಳಿ ನಡೆಸಲಿದೆ ಎಂದು ಮೂಲಗಳು ತಿಳಿಸಿವೆ.