ಸಾವಯವ ಕೃಷಿಗೆ ಜಾಗತಿಕ ಬೇಡಿಕೆ: ಸಚಿವೆ ಶೋಭಾ

ಮೂಲ್ಕಿ: ಸಾವಯುವ ಕೃಷಿಗೆ ಜಗತ್ತಿನಲ್ಲಿ ಅಪಾರ ಬೇಡಿಕೆ ಇದೆ. ಮಣಿಪುರ, ನಾಗಾಲ್ಯಾಂಡ್‌ ಮತ್ತು ತ್ರಿಪುರದಂತಹ ಸಣ್ಣ ರಾಜ್ಯಗಳು ಅತೀ ಹೆಚ್ಚಿನ ಪ್ರಮಾಣದಲ್ಲಿ ಸಾವಯುವ ಕೃಷಿ ನಡೆಸುತ್ತಿದ್ದು, ಈ ಕೃಷ್ಯುತ್ಪನ್ನಗಳ ಖರೀದಿಗೆ ಅಮೆರಿಕದಂತಹ ದೇಶಗಳು ಮುಂಗಡ ಹಣ ನೀಡಿ ಖರೀದಿಗೆ ಮುಂದೆ ಬರುತ್ತಿರುವುದು ದೇಶಕ್ಕೆ ಹೆಮ್ಮೆ ಎಂದು ಕೇಂದ್ರ ಕೃಷಿ ಮತ್ತು ರೈತ ಕಲ್ಯಾಣ ಸಹಾಯಕ ಸಚಿವೆ ಶೋಭಾ ಕರಂದ್ಲಾಜೆ ಹೇಳಿದರು.

ಅವರು ಮೂಲ್ಕಿ ಕೊಲಾ°ಡಿನ ರಾಮಕೃಷ್ಣ ಪೂಂಜ ವೇದಿಕೆಯಲ್ಲಿ ಕೃಷಿ ಸಿರಿ -2022ರ ಉದ್ಘಾಟನೆ ಮತ್ತು ಸಾಧಕರ ಸಮ್ಮಾನ ಕಾರ್ಯಕ್ರಮದಲ್ಲಿ ಮಾತನಾಡಿದರು.

ದೇಶದ ಜಿಡಿಪಿಗೆ ಕೃಷಿ ಶೇ. 22ರಷ್ಟು ಕೊಡುಗೆ ನೀಡುತ್ತಿದೆ. ಇದು ಪ್ರಧಾನಿ ಮೋದಿ ನೇತೃತ್ವದ ಸರಕಾರದ ಸತತ ಪ್ರಯತ್ನದ ಫಲ ಎಂದು ಶೋಭಾ ಹೇಳಿದರು. ಈ ಸಾಲಿನಲ್ಲಿ ವಿತ್ತಸಚಿವೆ ನಿರ್ಮಲಾ ಸೀತಾರಾಮನ್‌ ಅವರು ಹೆಚ್ಚು ಹಣ ಮೀಸಲಿರಿಸಿದ್ದಾರೆ. ಕೇಂದ್ರ ಸರಕಾರವು ರೈತರ ಸಮಗ್ರ ಅಭಿವೃದ್ಧಿಗೆ ಪಣ ತೊಟ್ಟಿದೆ ಎಂದರು.

9ನೇ ಸ್ಥಾನಕ್ಕೇರಿದ ಸಾಧನೆ
ಉನ್ನತ ಶಿಕ್ಷಣ ಪಡೆದ ಯುವಕರು ಕೃಷಿಗೆ ಇಳಿಯುವುದಿಲ್ಲ. ಆದರೆ ಆದರೆ ಕೃಷಿಯ ಮಾರ್ಕೆಟಿಂಗ್‌ ಮತ್ತು ಬಿಸಿನೆಸ್‌ ಅವಕಾಶ ಇದೆ ಎಂದಾಗ ಮುಂದೆ ಬರುತ್ತಾರೆ. ಇದು ಕೇಂದ್ರ ಸರಕಾರ ಕೃಷಿ ಪೂರಕ ಯೋಜನೆಗಳಿಗೆ ಬೆಂಬಲ ನೀಡಿರುವುದರ ಫಲ. ದೇಶ ಕೃಷ್ಯುತ್ಪನ್ನಗಳ ರಫ್ತಿನಲ್ಲಿ ಜಗತ್ತಿನಲ್ಲಿ 9ನೇ ಸ್ಥಾನಕ್ಕೆ ಏರಿರುವುದು ಸಾಧನೆ ಎಂದರು.
ಎರಡು ತಿಂಗಳು ಕೆಲಸ ಮಾಡಿ ವರ್ಷವಿಡೀ ಹೊಟ್ಟೆ ತುಂಬಾ ಊಟ ಮಾಡಲು ಸಿಗುವುದು ಕೃಷಿಯಿಂದ ಮಾತ್ರ. ಇದು ನಷ್ಟದ ಉದ್ಯಮ ಅಲ್ಲ, ಹೆಮ್ಮೆಯ ವಿಷಯ ಎಂದು ಬಂಟ್ವಾಳ ಶಾಸಕ ರಾಜೇಶ್‌ ನಾಯಕ್‌ ಹೇಳಿದರು.
ರೈತನಿಗೆ ಸೋಲು, ಕಷ್ಟ ಎಂಬುದಿಲ್ಲ. ಕೃಷಿಕರ ಮನೆಮಕ್ಕಳು ಬಹಳಷ್ಟು ಸಾಧನೆ ಮಾಡಿದ್ದಾರೆ, ಅವರು ಕೃಷಿಯ ಜತೆಗೇ ಬೆಳೆದವರು ಎಂಬುದನ್ನು ಮರೆಯಲಾಗದು ಎಂದು ಗುರುಪುರ ವಜ್ರದೇಹಿ ಮಠದ ಶ್ರೀ ರಾಜಶೇಖರಾನಂದ ಸ್ವಾಮಿಗಳು ತಮ್ಮ ಆಶೀರ್ವಚನದಲ್ಲಿ ಹೇಳಿದರು.

ಕಾರ್ಯಕ್ರಮದಲ್ಲಿ ಪದ್ಮಶ್ರೀ ಪುರಸ್ಕೃತ ಅಕ್ಷರ ಸಂತ ಹರೇಕಳ ಹಾಜಬ್ಬ ಮತ್ತು ಕೃಷಿ ಸಾಧಕ ಅಮೈ ಮಹಾಲಿಂಗ ನಾಯ್ಕ ಅವರನ್ನು ಸಮ್ಮಾನಿಸಿ ಗೌರವಿಸಲಾಯಿತು.

ಸಾಧಕರಿಗೆ ಸಮ್ಮಾನ
ಕೃಷಿ ಸಾಧಕರಾದ ಅಬೂಬಕ್ಕರ್‌ ಸಿದ್ದಿಕ್‌, ರಘುರಾಮ ಕುಲಾಲ್‌, ವಿಶೇಶ್ವರ ಸಜ್ಜನ, ನಿತ್ಯಾನಂದ ಕರ್ಕೆರಾ ಮತ್ತು ಶ್ರೀನಿವಾಸ್‌ ಗಾಣಿಗ ಅವರನ್ನು ಸಮ್ಮಾನಿಸಲಾಯಿತು. ವಿನಯ ಕೃಷಿ ಬೆಳೆಗಾರರ ಸಂಘಕ್ಕೆ ಕೃಷಿ ಇಲಾಖೆಯ 8 ಲಕ್ಷ ರೂ. ಸಹಾಯಧನದ ಟ್ರ್ಯಾಕ್ಟರ್‌ ಹಸ್ತಾಂತರಿಸಲಾಯಿತು.

ಕೃಷಿ ಇಲಾಖೆಯ ಜಂಟಿ ನಿರ್ದೇಶಕಿ ಸೀತಾ, ಶಾಸಕ ಉಮಾನಾಥ ಕೋಟ್ಯಾನ್‌, ಮಂಗಳೂರು ವಿ.ವಿ. ಉಪಕುಲಪತಿ ಪ್ರೊ| ಪಿ.ಎಸ್‌. ಯಡಪಡಿತ್ತಾಯ, ಜಾಗತಿಕ ಬಂಟರ ಸಂಘಗಳ ಒಕ್ಕೂಟದ ಅಧ್ಯಕ್ಷ ಐಕಳ ಹರೀಶ್‌ ಶೆಟ್ಟಿ, ಸಾಯಿರಾಧ ಸಮೂಹ ಸಂಸ್ಥೆಗಳ ಆಡಳಿತ ನಿರ್ದೇಶಕ ಮನೋಹರ್‌ ಶೆಟ್ಟಿ, ಶ್ರೀನಿವಾಸ್‌ ವಿ.ವಿ.ಯ ಉಪಕುಲಪತಿ ಪಿ. ರಮಣ್‌ ಐತಾಳ್‌, ಪಟ್ಲ ಫೌಂಡೇಶನ್‌ನ ಸತೀಶ್‌ ಶೆಟ್ಟಿ ಪಟ್ಲ, ಉಧ್ಯಮಿ ಸುಗ್ಗಿ ಸುಧಾಕರ್‌ ಶೆಟ್ಟಿ, ಸಮಿತಿಯ ಅಧ್ಯಕ್ಷ ವಿಜಯ ಶೆಟ್ಟಿ ಕೊಲಾ°ಡ್‌, ಸಂಚಾಲಕರಾದ ಕೃಷ್ಣ ಶೆಟ್ಟಿ ತಾರೆಮಾರ್‌, ಡಾ| ಅಣ್ಣಯ್ಯ ಕುಲಾಲ್‌, ಕಾರ್ಯದರ್ಶಿ ಸಂತೋಷ್‌ ಶೆಟ್ಟಿ ಸುಮಿತ್ರಾ ವಿಜಯ್‌ ಶೆಟ್ಟಿ ಉಪಸ್ಥಿರಿದ್ದರು. ಸಂಚಾಲಕ ಪ್ರಶಾಂತ್‌ ಪೈ ಸ್ವಾಗತಿಸಿದರು. ದಾಮೋದರ್‌ ಶರ್ಮಾ ನಿರೂಪಿಸಿದರು. ಸಂತೋಷ್‌ ಶೆಟ್ಟಿ ಪ್ರಸ್ತಾವಿಕವಾಗಿ ಮಾತನಾಡಿದರು.