ಗ್ಯಾರಿ ಸ್ಟೀಡ್‌ ಕಿವೀಸ್‌ ಕ್ರಿಕೆಟ್‌ ಕೋಚ್‌

ವೆಲ್ಲಿಂಗ್ಟನ್‌: ಮಾಜಿ ಕ್ರಿಕೆಟಿಗ ಗ್ಯಾರಿ ಸ್ಟೀಡ್‌ ನ್ಯೂಜಿಲ್ಯಾಂಡ್‌ ಕ್ರಿಕೆಟ್‌ ತಂಡದ ನೂತನ ಕೋಚ್‌ ಆಗಿ ಆಯ್ಕೆಯಾಗಿದ್ದಾರೆ. ಅವರು 2 ವರ್ಷಗಳ ಒಡಂಬಡಿಕೆಗೆ ಸಹಿ ಹಾಕಿದ್ದಾರೆ. 1999ರಲ್ಲಿ ನ್ಯೂಜಿಲ್ಯಾಂಡ್‌ ಪರ 5 ಟೆಸ್ಟ್‌ ಪಂದ್ಯಗಳನ್ನು ಆಡಿದ್ದ ಗ್ಯಾರಿ ಸ್ಟೀಡ್‌, ಕಿವೀಸ್‌ ವನಿತಾ ಕ್ರಿಕೆಟ್‌ ತಂಡದ ಹಾಗೂ ಕ್ಯಾಂಟರ್‌ಬರಿ ತಂಡದ ತರಬೇತುದಾರರಾಗಿ ದುಡಿದ ಅನುಭವ ಹೊಂದಿದ್ದಾರೆ. ಇವರ ಕೋಚಿಂಗ್‌ ಅವಧಿಯಲ್ಲಿ ನ್ಯೂಜಿಲ್ಯಾಂಡ್‌ ವನಿತಾ ತಂಡ 2009ರ ವಿಶ್ವಕಪ್‌ ಫೈನಲ್‌ ತಲುಪಿತ್ತು. ಕ್ಯಾಂಟರ್‌ಬರಿ ತಂಡ 3 ಸಲ “ಪ್ಲಂಕೆಟ್‌ ಶೀಲ್ಡ್‌’ ಪ್ರಶಸ್ತಿ ಜಯಿಸಿತ್ತು. 101 ಪ್ರಥಮ ದರ್ಜೆ ಪಂದ್ಯಗಳನ್ನಾಡಿರುವ ಸ್ಟೀಡ್‌, 32.15ರ ಸರಾಸರಿಯಲ್ಲಿ 4,984 ರನ್‌ ಗಳಿಸಿದ್ದಾರೆ. ಕಳೆದ ಜೂನ್‌ನಲ್ಲಿ ಕೋಚ್‌ ಹುದ್ದೆಗೆ ರಾಜೀನಾಮೆ ನೀಡಿದ ಮೈಕ್‌ ಹೆಸ್ಸನ್‌ ಅವರ ಉತ್ತರಾಧಿಕಾರಿಯಾಗಿ ಸ್ಟೀಡ್‌ ಅವರನ್ನು ನೇಮಿಸಲಾಗಿದೆ.