“ಸಿಡ್ನಿ ಟೆನಿಸ್‌’ನಿಂದ ಹಿಂದೆ ಸರಿದ ಮುಗುರುಜಾ

ಸಿಡ್ನಿ: ವಿಂಬಲ್ಡನ್‌ ಚಾಂಪಿಯನ್‌ ಗಾರ್ಬಿನ್‌ ಮುಗುರುಜಾ ಅವರು ತೊಡೆ ನೋವಿನಿಂದಾಗಿ “ಸಿಡ್ನಿ ಇಂಟರ್‌ನ್ಯಾಶನಲ್‌ ಟೆನಿಸ್‌’ ಕೂಟದಿಂದ ಹಿಂದೆ ಸರಿದಿದ್ದಾರೆ. ಇದರಿಂದ ಅವರು ಮುಂಬರುವ ವರ್ಷದ ಮೊದಲ ಗ್ರ್ಯಾನ್‌ಸ್ಲಾಮ್‌ ಆಸ್ಟ್ರೇಲಿ ಯನ್‌ ಓಪನ್‌ ಸಿದ್ಧತೆಗೆ ದೊಡ್ಡ ಹೊಡೆತ ಬಿದ್ದಿದೆ. 

ಕಿಕಿ ಬೆರ್ಟೆನ್ಸ್‌ ಅವರನ್ನು 6-3, 7-6 (6) ಕಠಿನ ಸೆಟ್‌ಗಳಲ್ಲಿ ಸೋಲಿಸಿ ಕ್ವಾರ್ಟರ್‌ಫೈನಲಿಗೇರಿದ ಕೆಲವೇ ತಾಸುಗಳಲ್ಲಿ ಅಗ್ರ ಶ್ರೇಯಾಂಕದ ಮುಗುರುಜಾ ತೊಡೆನೋವು ಉಲ್ಬಣಿಸಿದ ಕಾರಣ ಕೂಟದಿಂದ ಹಿಂದೆ ಸರಿ ಯಲು ನಿರ್ಧರಿಸಿದರು. ಕಾಲಿನ ಸ್ನಾಯು ಸೆಳೆತಕ್ಕೆ ಒಳಗಾದ ಮುಗುರುಜಾ ಕಳೆದ ವಾರ “ಬ್ರಿಸ್ಬೇನ್‌ ಟೆನಿಸ್‌’ ಕೂಟದಲ್ಲೂ ಮೊದಲ ಸುತ್ತಿನಲ್ಲಿಯೇ ನಿವೃತ್ತಿಯಾಗಿದ್ದರು. ಇದರಿಂದ ಅವರಿಗೆ ಸಿಡ್ನಿ ಟೆನಿಸ್‌ಗೆ ವೈಲ್ಡ್‌ ಕಾರ್ಡ್‌ ನೀಡಲಾಗಿತ್ತು. 

ಸಿಡ್ನಿಯಲ್ಲಿ ಕಳೆದ ವರ್ಷದ ಫೈನಲಿಸ್ಟ್‌ ಅಗ್ನಿಸ್ಕಾ ರಾದ್ವಂಸ್ಕಾ ಅವರು ಹದಿಹರೆಯದ ಅಮೆ ರಿಕದ ಅರ್ಹತಾ ಆಟಗಾರ್ತಿ ಸಿಸಿ ಬೆಲ್ಲಿಸ್‌ ಅವರನ್ನು 7-6 (4), 6-0 ನೇರ ಸೆಟ್‌ಗಳಿಂದ ಸೋಲಿಸಿ ಮುನ್ನಡೆದರು. ರಾದ್ವಂಸ್ಕಾ ಇಲ್ಲಿ 2013ರಲ್ಲಿ ಪ್ರಶಸ್ತಿ ಜಯಿಸಿದ್ದರು. 

28ರ ಹರೆಯದ ಪೋಲೆಂಡಿನ ರಾದ್ವಂಸ್ಕಾ ಕ್ವಾರ್ಟರ್‌ಫೈನಲ್‌ನಲ್ಲಿ ಇಟಲಿಯ ಅರ್ಹತಾ ಆಟಗಾರ್ತಿ ಕ್ಯಾಮಿಲಾ ಜಿಯೊರ್ಜಿ ಅವರ ಸವಾಲನ್ನು ಎದುರಿಸಲಿದ್ದಾರೆ. ಜಿಯೋರ್ಜಿ ಈ ಹಿಂದಿನ ಪಂದ್ಯದಲ್ಲಿ ಮಾಜಿ ಸಿಡ್ನಿ ಚಾಂಪಿಯನ್‌ ಪೆಟ್ರಾ ಕ್ವಿಟೋವಾ ಅವರನ್ನು 7-6 (7), 6-2 ಸೆಟ್‌ಗಳಿಂದ ಕೆಡಹಿದ ಸಾಧನೆ ಮಾಡಿದ್ದರು.