ಕಿಚ್ಚ ಸುದೀಪ್ ಅಭಿನಯದ “ಕೋಟಿಗೊಬ್ಬ-3′ ಥಿಯೇಟರ್‌ ಗೆ ಬರೋದಕ್ಕೆ ಕೌಂಟ್‌ಡೌನ್‌ ಶುರುವಾಗಿದ್ದು, ನಾಡ ಹಬ್ಬದ ಸಂಭ್ರದಲ್ಲೇ ಚಿತ್ರವನ್ನು ಅದ್ಧೂರಿಯಾಗಿ ತೆರೆಗೆ ತರಲು ನಿರ್ಮಾಪಕ ಸೂರಪ್ಪ ಬಾಬು ತಯಾರಿ ನಡೆಸಿದ್ದಾರೆ.
ಈಗಾಗಲೇ “ಕೋಟಿಗೊಬ್ಬ-3′ ಚಿತ್ರದ ಡಿಜಿಟಲ್‌ ಮತ್ತು ಸ್ಯಾಟಲೈಟ್‌ ಹಕ್ಕುಗಳು ಭಾರೀ ಮೊತ್ತಕ್ಕೆ ಮಾರಾಟವಾಗಿದ್ದು, ಇದೀಗ ಚಿತ್ರದ ಥಿಯೇಟರ್‌ ವಿತರಣೆಯ ಹಕ್ಕುಗಳು ಕೂಡ ದೊಡ್ಡ ಮೊತ್ತಕ್ಕೆ ಬಿಕರಿಯಾಗುತ್ತಿದೆ. ಕಳೆದ ಕೆಲ ದಿನಗಳಿಂದ ಗಾಂಧಿನಗರದಲ್ಲಿ “ಕೋಟಿಗೊಬ್ಬ-3′ ಚಿತ್ರದ ವಿತರಣೆ ವ್ಯಾಪಾರ ಜೋರಾಗಿ ನಡೆಯುತ್ತಿದ್ದು, ಇದೀಗ ಚಿತ್ರದ ಬಿಕೆಟಿ (ಬೆಂಗಳೂರು, ಕೋಲಾರ, ತುಮಕೂರು) ಹಕ್ಕುಗಳನ್ನು “ಪೊಗರು’ ಚಿತ್ರದ ನಿರ್ಮಾಪಕ ಬಿ.ಕೆ ಗಂಗಾಧರ್‌ ದೊಡ್ಡ ಮೊತ್ತಕ್ಕೆ ಖರೀದಿಸಿದ್ದಾರೆ.
ಇದನ್ನೂ ಓದಿ:ಮನೆಯಿಂದ ಹೊರಬನ್ನಿ, ಕನ್ನಡ ಸಿನಿಮಾಗಳಿಗೆ ಜೈ ಅನ್ನಿ…ಇಂದಿನಿಂದ ಹೌಸ್‌ಫುಲ್‌ ಪ್ರದರ್ಶನ
ಈ ಬಗ್ಗೆ ಮಾತನಾಡುವ “ಕೋಟಿಗೊಬ್ಬ-3′ ನಿರ್ಮಾಪಕ ಸೂರಪ್ಪ ಬಾಬು, “ಕೋವಿಡ್ ಲಾಕ್‌ಡೌನ್‌ ಇಲ್ಲದಿದ್ದರೆ, ಇಷ್ಟೊತ್ತಿಗಾಗಲೇ “ಕೋಟಿಗೊಬ್ಬ-3′ ರಿಲೀಸ್‌ ಆಗಿರುತ್ತಿತ್ತು. ಸುಮಾರು ಒಂದೂವರೆ ವರ್ಷದಿಂದ ಕಾದು ಈಗ ಸಿನಿಮಾವನ್ನು ರಿಲೀಸ್‌ ಮಾಡುತ್ತಿದ್ದೇವೆ. ಬಹಳ ಸಮಯದ ನಂತರ ಸುದೀಪ್ ಸಿನಿಮಾ ರಿಲೀಸ್‌ ಆಗುತ್ತಿರುವುದರಿಂದ, ಅವರ ಫ್ಯಾನ್ಸ್‌ ಮತ್ತು ಇಂಡಸ್ಟ್ರಿಗೆ ಸಿನಿಮಾದ ಮೇಲೆ ನಿರೀಕ್ಷೆ ಇದೆ. ಈಗಾಗಲೇ ನಮ್ಮ ಸಿನಿಮಾದ ಅನೇಕ ಏರಿಯಾಗಳ ಥಿಯೇಟರ್‌ ರೈಟ್ಸ್‌ ಸೇಲ್‌ ಆಗಿದೆ. ಇನ್ನೂ ಕೆಲವು ಮಾತುಕತೆ ಹಂತದಲ್ಲಿದ್ದು, ಈ ವಾರಾಂತ್ಯಕ್ಕೆ ಎಲ್ಲವೂ ಫೈನಲ್‌ ಆಗಲಿದೆ. ಬಿಕೆಟಿ ಏರಿಯಾ ರೈಟ್ಸ್‌ ಬಿ.ಕೆ ಗಂಗಾಧರ್‌ ದೊಡ್ಡ ಮೊತ್ತಕ್ಕೆ ಖರೀದಿಸಿದ್ದಾರೆ’ ಎಂದು ಮಾಹಿತಿ ನೀಡಿದ್ದಾರೆ.
ಇನ್ನು “ಕೋಟಿಗೊಬ್ಬ-3′ ಚಿತ್ರದಲ್ಲಿ ಕಿಚ್ಚ ಸುದೀಪ್‌ಗೆ ನಾಯಕಿಯಾಗಿ ಮಡೋನಾ ಸೆಬಾಸ್ಟಿಯನ್‌ ಜೋಡಿಯಾಗಿದ್ದಾರೆ ಉಳಿದಂತೆ ರವಿಶಂಕರ್‌, ಶ್ರದ್ಧಾ ದಾಸ್‌, ಅಫ್ತಾಬ್‌ ಶಿವದಾಸನಿ, ಆಶಿಕಾ ರಂಗನಾಥ್‌, ಅಭಿರಾಮಿ ಮೊದಲಾದವರು ಚಿತ್ರದ ಇತರ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ. ಶಿವಕಾರ್ತಿಕ್‌ “ಕೋಟಿಗೊಬ್ಬ-3′ ಚಿತ್ರಕ್ಕೆ ಆ್ಯಕ್ಷನ್‌-ಕಟ್‌ ಹೇಳಿದ್ದಾರೆ.
ಈಗಾಗಲೇ “ಕೋಟಿಗೊಬ್ಬ-3′ ಟೀಸ ರ್‌, ಹಾಡುಗಳು ಬಿಡುಗಡೆಯಾಗಿದ್ದು, ಚಿತ್ರವನ್ನು ಥಿಯೇಟರ್‌ನಲ್ಲಿ ಕಣ್ತುಂಬಿಕೊಳ್ಳೋದಷ್ಟೇ ಬಾಕಿಯಿದೆ.
ಜಿ. ಎಸ್‌. ಕಾರ್ತಿಕ ಸುಧನ್‌ 