ಗಣೇಶಪುರದಲ್ಲಿ ಅಪಘಾತ ಹೊಡೆದಾಟ ಪ್ರಕರಣ: ಕೊಲೆ ಯತ್ನ ಕೇಸು ದಾಖಲು?

ಸುರತ್ಕಲ್‌: ಬುಧವಾರ ರಾತ್ರಿ ಕಾರೊಂದು ಬೈಕ್‌ಗೆ ಢಿಕ್ಕಿ ಹೊಡೆದ ಸಂದರ್ಭ ನಡೆದ ಗುಂಪುಗಳ ನಡುವಿನ ಘರ್ಷಣೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ನಾಲ್ಕೈದು ಮಂದಿಯನ್ನು ಪೊಲೀಸರು ವಶಕ್ಕೆ ಪಡೆದು ವಿಚಾರಣೆ ನಡೆಸುತ್ತಿದ್ದಾರೆ.

ಸ್ಥಳೀಯ ನಿವಾಸಿ ಬೈಕ್‌ ಸವಾರ ನಾಗೇಶ್‌ ಅವರು ಬೈಕಿನಿಂದ ಬಿದ್ದ ಪರಿಣಾಮ ಏಟಾಗಿ ಸುರತ್ಕಲ್‌ ಖಾಸಗೀ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದರೆ, ಇತ್ತ ಇನ್ನೊಂದು ಗುಂಪಿನ ಸದಸ್ಯರೂ ಆಸ್ಪತ್ರೆಯಲ್ಲಿ ಚಿಕಿತ್ಸೆಗೆ ದಾಖಲಾಗಿದ್ದಾರೆ.

ಕಾರಿನಲ್ಲಿ ಪ್ರಯಾಣಿಸುತ್ತಿದ್ದ ಯುವಕರು ಮೊದಲು ಹೊಡೆದಾಟ ಕೇಸು ನೀಡಿದ್ದರೂ ಬಳಿಕ ಕೊಲೆ ಯತ್ನ ಎಂದು ಬಿಂಬಿಸಲು ಯತ್ನಿಸಿದ್ದು, ಇದೀಗ ಎರಡೂ ಗುಂಪುಗಳನ್ನು ತೀವ್ರವಾಗಿ ಪೊಲೀಸರು ವಿಚಾರಣೆಗೆ ಒಳಪಡಿಸುವ ಸಾಧ್ಯತೆಯಿದ್ದು, ಘರ್ಷಣೆ ಸಂದರ್ಭ ಆಯುಧ ಏನಾದರೂ ಇತ್ತೆ, ಕಾರು ಚಾಲನೆ ಮಾಡುತ್ತಿದ್ದ ಯುವಕ ಮೊಬೈಲ್‌ ಕರೆ ಮಾಡಿ ಮತ್ತಷ್ಟು ಯುವಕರನ್ನು ಬರಲು ಹೇಳಿದದ್ದಾರೂ ಯಾಕೆ ,ಇದು ಪೂರ್ವ ಯೋಜಿತ ಕೃತ್ಯವೇ ಎಂಬುದರ ಬಗ್ಗೆ ಶಂಕೆ ವ್ಯಕ್ತವಾಗಿದ್ದು, ಸತ್ಯಾಂಶ ಏನು ಎಂಬುದು ಪೊಲೀಸರ ತನಿಖೆಯಿಂದ ತಿಳಿದು ಬರಬೇಕಿದೆ. ಗಣೇಶಪುರದಲ್ಲಿ ಪರಿಸ್ಥಿತಿ ಬಿಗಡಾಯಿಸದಂತೆ ರಿಸರ್ವ್‌ ಪೊಲೀಸ್‌ ತಂಡವನ್ನು ಕಾವಲಿಗೆ ನಿಯೋಜಿಸಲಾಗಿದೆ. ಘರ್ಷಣೆಯಲ್ಲಿ ಭಾಗಿಯಾದ ಇನ್ನಷ್ಟು ಮಂದಿಯನ್ನು ಪತ್ತೆಹಚ್ಚುವ ಕಾರ್ಯಕ್ಕೆ ಪೊಲೀಸರು ಮುಂದಾಗಿದ್ದಾರೆ.

ಇದನ್ನೂ ಓದಿ: ಕಾಪು: ಸ್ಕೂಟಿ ಸ್ಕಿಡ್‌ ಆಗಿ ಗಂಭೀರ ಗಾಯಗೊಂಡಿದ್ದ ಯುವ ಛಾಯಾಚಿತ್ರಗ್ರಾಹಕ ಸಾವು