ಮೇ 26ರಿಂದ ಪಟಾಕಿ ಸದ್ದು

ಗಣೇಶ್‌ ಅಭಿನಯದ “ಪಟಾಕಿ’ ಚಿತ್ರ ಯಾವಾಗ ಬಿಡುಗಡೆಯಾಗುತ್ತದೆ ಎಂಬ ಕುತೂಹಲಕ್ಕೆ ಈಗ ಉತ್ತರ ಸಿಕ್ಕಿದೆ. ಅದು ಮೇ 26. ಮೇ 26 ರಂದು ರಾಜ್ಯಾದ್ಯಂತ “ಪಟಾಕಿ’ ಸಿಡಿಯಲಿದೆ. ನಿರ್ಮಾಪಕ ಎಸ್‌.ವಿ.ಬಾಬು ಅವರು ಈ ಬಾರಿ ನಿರ್ಮಾಣದ ಜೊತೆಗೆ ವಿತರಣೆಗೂ ಇಳಿದಿದ್ದಾರೆ.
 
ಹೌದು, “ಪಟಾಕಿ’ ಸಿನಿಮಾವನ್ನು ನಿರ್ಮಿಸಿರುವ ಎಸ್‌.ವಿ. ಬಾಬು ಅವರೇ ಈಗ ಸಿನಿಮಾದ ವಿತರಣೆಯನ್ನು ಮಾಡುತ್ತಿದ್ದಾರೆ. ಈ ಮೂಲಕ ವಿತರಣಾ ಕ್ಷೇತ್ರಕ್ಕೂ ಬಾಬು ಕೈ ಹಾಕಿದ್ದಾರೆ. ಕೆ.ಜಿ.ರಸ್ತೆಯಲ್ಲಿ ಎಸ್‌.ವಿ. ಲಂಸ್‌ನ  ಡಿಸ್ಟ್ರಿಬ್ಯೂಶನ್‌ ಕಚೇರಿಯನ್ನು ಕೂಡಾ ಬಾಬು ಅವರು ಭಾನುವಾರ  ಆರಂಭಿಸಿದ್ದು, ಮೊದಲ ಸಿನಿಮಾವಾಗಿ ತಮ್ಮದೇ ನಿರ್ಮಾಣದ “ಪಟಾಕಿ’ಯನ್ನು ವಿತರಣೆ ಮಾಡಲಿದ್ದಾರೆ. ಮುಂದಿನ ದಿನಗಳಲ್ಲಿ ಬೇರೆ ಬೇರೆ ಸಿನಿಮಾಗಳನ್ನು ವಿತರಣೆ ಮಾಡುವ ಆಲೋಚನೆ ಕೂಡಾ ಬಾಬು ಅವರಿಗಿದೆ.

ಬಾಬು ಅವರು ಈಗಾಗಲೇ “ಪಟಾಕಿ’ ಸಿನಿಮಾ ನೋಡಿ ಖುಷಿಯಾಗಿದ್ದಾರೆ. ಈ ಸಿನಿಮಾ ದೊಡ್ಡ ಯಶಸ್ಸು ತಂದುಕೊಡುತ್ತದೆ ಎಂಬ ವಿಶ್ವಾಸ ಕೂಡಾ ಅವರಿಗಿದೆ. ಇತ್ತೀಚೆಗೆ ಸಿನಿಮಾ ನೋಡಿದ ಎಸ್‌.ವಿ.ಬಾಬು ಅವರು ಗಣೇಶ್‌ ಅಭಿನಯ ನೋಡಿ ಥ್ರಿಲ್‌
ಆಗಿದ್ದಾರೆ. ಎಷ್ಟರ ಮಟ್ಟಿಗೆ ಥ್ರಿಲ್‌ ಆಗಿದ್ದಾರೆಂದರೆ ಮಧ್ಯರಾತ್ರಿ ಗಣೇಶ್‌ಗೆ ಫೋನ್‌ ಮಾಡಿದ್ದಾರೆ. ನಿದ್ದೆಯಲ್ಲಿದ್ದ ಗಣೇಶ್‌ ಮೊದಲ ಸಲ ಫೋನ್‌ ರಿಸೀವ್‌ ಮಾಡದೇ ಇದ್ದಾಗಲೂ ಬಿಡದೇ ಪದೇ  ಪದೇ ಫೋನ್‌ ಮಾಡಿ ಎಬ್ಬಿಸಿ ಗಣೇಶ್‌ ಅವರಲ್ಲಿ ಸಿನಿಮಾದ ಖುಷಿಯನ್ನು ಎಸ್‌.ವಿ.ಬಾಬು ಅವರು ಹಂಚಿಕೊಂಡಿದ್ದಾರೆ. 

ಗಣೇಶ್‌ ಅವರು ಈ ಸಿನಿಮಾದಲ್ಲಿ ತುಂಬಾ ಅದ್ಭುತವಾಗಿ ನಟಿಸಿದ್ದಾರೆ. ಅವರ ನಟನೆ ನೋಡಿ ನಾನು ದಾ ಆದೆ. ಆ ಖುಷಿಯನ್ನು ಹಂಚಿಕೊಳ್ಳಲು ಮಧ್ಯರಾತ್ರಿ ಫೋನ್‌ ಮಾಡಿ ಅವರನ್ನು ಎಬ್ಬಿಸಿದೆ. ಖಂಡಿತಾ ಈ ಸಿನಿಮಾ ದೊಡ್ಡ ಹಿಟ್‌ ಆಗುತ್ತದೆ ಎಂಬ ವಿಶ್ವಾಸವಿದೆ’ ಎಂದು ಹೇಳಿಕೊಂಡರು ಎಸ್‌.ವಿ.ಬಾಬು.