ಕೆವಿಎನ್‌ ತೆಕ್ಕೆಗೆ ಗಾಳಿಪಟ-2 ವಿತರಣೆ ಹಕ್ಕು

ಗೋಲ್ಡನ್‌ ಸ್ಟಾರ್‌ ಗಣೇಶ್‌ ನಾಯಕರಾಗಿರುವ “ಗಾಳಿಪಟ-2′ ಆಗಸ್ಟ್‌ 12ಕ್ಕೆ ಬಿಡುಗಡೆಯಾಗುತ್ತಿರೋದು ನಿಮಗೆ ಗೊತ್ತೇ ಇದೆ. ಈಗ ಚಿತ್ರದ ವಿತರಣೆಯ ಹಕ್ಕು ಕನ್ನಡ ಚಿತ್ರರಂಗದ ಬಿಗ್‌ ಬ್ಯಾನರ್‌ ವೊಂದು ಪಡೆದುಕೊಂಡಿದೆ. ಅದು “ಕೆವಿಎನ್‌ ಪ್ರೊಡಕ್ಷನ್‌’.

ಹೌದು, “ಗಾಳಿ ಪಟ-2′ ಚಿತ್ರದ ವಿತರಣೆಯ ಹಕ್ಕನ್ನು “ಕೆವಿಎನ್‌’ ದೊಡ್ಡ ಮೊತ್ತಕ್ಕೆ ಪಡೆದುಕೊಂಡಿದೆ. ಈ ಮೂಲಕ ಚಿತ್ರತಂಡ ಖುಷಿಯಾಗಿದೆ. “ಆರ್‌ಆರ್‌ಆರ್‌’ ಸಿನಿಮಾ ನಂತರ “ಕೆವಿಎನ್‌’ ವಿತರಣೆ ಮಾಡುತ್ತಿರುವ ಸಿನಿಮಾ “ಗಾಳಿಪಟ-2′. ರಮೇಶ್‌ ರೆಡ್ಡಿ ತಮ್ಮ ಸೂರಜ್‌ ಪ್ರೊಡಕ್ಷನ್‌ ಮೂಲಕ “ಗಾಳಿಪಟ-2′ ಚಿತ್ರ ನಿರ್ಮಿಸಿದ್ದಾರೆ. ಈಗಾಗಲೇ ತಮ್ಮ ಬ್ಯಾನರ್‌ನಲ್ಲಿ ಹಲವು ಸಿನಿಮಾ ನಿರ್ಮಿಸಿ, ಕನ್ನಡ ಚಿತ್ರರಂಗದ ಬಿಗ್‌ ಬ್ಯಾನರ್‌ ಎನಿಸಿಕೊಂಡಿದ್ದು, ಈಗ “ಗಾಳಿಪಟ-2′ ಮೂಲಕ ಎರಡು ಬಿಗ್‌ ಬ್ಯಾನರ್‌ ಗಳು ಒಂದಾದಂತಿದೆ.

ಯೋಗರಾಜ್‌ ಭಟ್‌ ನಿರ್ದೇಶನದ “ಗಾಳಿಪಟ-2′ ಚಿತ್ರದಲ್ಲಿ ಗಣೇಶ್‌, ದಿಗಂತ್‌, ಪವನ್‌, ಶರ್ಮಿಳಾ ಮಾಂಡ್ರೆ, ರಂಗಾಯಣ ರಘು ಸೇರಿದಂತೆ ಅನೇಕರು ನಟಿಸಿದ್ದಾರೆ. ಈಗಾಗಲೇ ಚಿತ್ರದ ಹಾಡುಗಳು ಬಿಡುಗಡೆಯಾಗಿದ್ದು, ಪ್ರತಿ ಹಾಡುಗಳು ಒಂದಕ್ಕಿಂತ ಒಂದು ಭಿನ್ನವಾಗಿ ಕೇಳುಗರ ಮನಸ್ಸು ಗೆದ್ದಿವೆ.