ಇಂದಿನಿಂದ 2ನೇ ಆವೃತ್ತಿ ಪ್ರೊ ಕುಸ್ತಿ ಲೀಗ್‌

ಹೊಸದಿಲ್ಲಿ: ಸೋಮವಾರದಿಂದ 2ನೇ ಆವೃತ್ತಿ ಪ್ರೊ ಕುಸ್ತಿ ಲೀಗ್‌ ಆರಂಭವಾಗಲಿದೆ. ಕಳೆದ ಬಾರಿ ಕೂಟ ಯಶಸ್ವಿಯಾಗಿದ್ದರಿಂದ ಈ ಸಲ ಭಾರೀ ನಿರೀಕ್ಷೆ ಮೂಡಿಸಿದೆ.

ಹೊಸದಿಲ್ಲಿಯ ಕೆಡಿ ಜಾಧವ್‌ ಒಳಾಂಗಣ ಕ್ರೀಡಾಂಗಣದಲ್ಲಿ ನಡೆಯಲಿರುವ ಲೀಗ್‌ನಲ್ಲಿ 6 ತಂಡಗಳು ಪ್ರಶಸ್ತಿಗಾಗಿ ಪೈಪೋಟಿ ನಡೆಸಲಿವೆ. ಜ. 17 ಮತ್ತು 18ರಂದು ಸೆಮಿಫೈನಲ್‌ ಮತ್ತು ಜ. 19ರಂದು ಫೈನಲ್‌ ಪಂದ್ಯ ನಡೆಯಲಿದೆ. ಕೂಟದ ಒಟ್ಟಾರೆ ಪ್ರಶಸ್ತಿ ಮೊತ್ತ 15 ಕೋಟಿ ರೂ. ಆಗಿರಲಿದೆ.

ಅಂತಾರಾಷ್ಟ್ರೀಯ ಮಟ್ಟದ ಕುಸ್ತಿಪಟುಗಳು ಸ್ಪರ್ಧಿಸಿರುವುದು ಕುಸ್ತಿ ಅಭಿಮಾನಿಗಳಲ್ಲಿ ಕೌತುಕ ಹೆಚ್ಚಿಸಿದೆ. ಕ್ರೀಡಾಂಗಣಕ್ಕೆ ಹೆಚ್ಚಿನ ಅಭಿಮಾನಿಗಳು ಹರಿದು ಬರುವ ಸಾಧ್ಯತೆಯಿದೆ. ಒಟ್ಟು 54 ಕುಸ್ತಿಪಟುಗಳು ಸೆಣಸಾಟ ನಡೆಸಲಿದ್ದಾರೆ. ಒಟ್ಟು 9 ವಿಭಾಗದಲ್ಲಿ ಆಟ ನಡೆಯಲಿದೆ. 57, 65, 70, 74, 97 ಕೆಜಿ ಪುರುಷರ ವಿಭಾಗ ಮತ್ತು 48, 53, 58, 69-75 ಕೆಜಿ ಮಹಿಳಾ ವಿಭಾಗದಲ್ಲಿ ಸ್ಪರ್ಧೆಗಳು ಸಾಗಲಿವೆ. ಡೆಲ್ಲಿ ಸುಲ್ತಾನ್ಸ್‌, ಜೈಪುರ್‌ ನಿಂಜಾಸ್‌, ಮುಂಬೈ ಮರಾಠಿ, ಯುಪಿ ದಂಗಲ್‌, ಎನ್‌ಸಿಆರ್‌ ಪಂಜಾಬ್‌ ರಾಯಲ್ಸ್‌, ಹರ್ಯಾಣ ಹ್ಯಾಮರ್ಸ್‌ ತಂಡಗಳು ಪ್ರಶಸ್ತಿಗಾಗಿ ಸೆಣಸಲಿವೆ.

ಕುಸ್ತಿಲೀಗ್‌ ಮೇಲೆ ದಂಗಲ್‌ ಪರಿಣಾಮ!
ಅಮೀರ್‌ ಖಾನ್‌ ನಟಿಸಿದ, ಕುಸ್ತಿಪಟು ಜೀವನಾಧಾರಿತ ಸಿನಿಮಾ “ದಂಗಲ್‌’ ಇತ್ತೀಚೆಗೆ ಬಿಡುಗಡೆಯಾಗಿ ಭಾರೀ ಗಳಿಕೆ ಮಾಡಿದೆ. ಈ ದಂಗಲ್‌ ಜ್ವರ ಸೋಮವಾರದಿಂದ ಆರಂಭವಾಗಲಿರುವ ಪ್ರೊ ಕುಸ್ತಿ ಲೀಗ್‌ನ 2ನೇ ಆವೃತ್ತಿ ಮೇಲೆ ಪರಿಣಾಮ ಬೀರುವ ಸಾಧ್ಯತೆಯಿದೆ. ಸಿನಿಮಾದ ಪ್ರಭಾವದಿಂದ ಹೆಚ್ಚಿನ ಅಭಿಮಾನಿಗಳು ಕ್ರೀಡಾಂಗಣಕ್ಕೆ ಲಗ್ಗೆ ಇಡುವ ನಿರೀಕ್ಷೆ ಇದೆ. ಖ್ಯಾತ ಮಹಿಳಾ ಕುಸ್ತಿಪಟುಗಳಾದ ಬಬಿತಾ ಮತ್ತು ಗೀತಾ ಅವರನ್ನು ರೂಪಿಸಿದ ಮಹಾವೀರ್‌ ಸಿಂಗ್‌ ಜೀವನಾಧಾರಿತವಾಗಿ ಸಿನಿಮಾ ಇದಾಗಿದೆ.