ಫ್ರೆಂಚ್‌ ಓಪನ್‌ ವನಿತಾ ಸಿಂಗಲ್ಸ್‌ : ಭರವಸೆ ಮೂಡಿಸಿದ ಜಿದಾನ್ಸೆಕ್‌-ಬಡೋಸಾ

ಪ್ಯಾರಿಸ್‌: ಸ್ಲೊವೇನಿಯಾದ ತಮಾರ ಜಿದಾನ್ಸೆಕ್‌ ಮತ್ತು ಸ್ಪೇನಿನ ಪೌಲಾ ಬಡೋಸಾ ಫ್ರೆಂಚ್‌ ಓಪನ್‌ ವನಿತಾ ಸಿಂಗಲ್ಸ್‌ನಲ್ಲಿ ಹೊಸ ಭರವಸೆ ಮೂಡಿಸಿದ್ದಾರೆ. ಇಬ್ಬರೂ ಕ್ವಾರ್ಟರ್‌ ಫೈನಲ್‌ನಲ್ಲಿ ಪರಸ್ಪರ ಎದುರಾಗಲಿದ್ದಾರೆ. ರಶ್ಯದ ಅನಾಸ್ತಾಸಿಯಾ ಪಾವ್ಲುವೆಂಕೋವಾ ಕೂಡ ಇದೇ ಸಾಲಿಗೆ ಏರಿದ್ದಾರೆ. ಆದರೆ ಬೆಲರೂಸ್‌ನ ವಿಕ್ಟೋರಿಯಾ ಅಜರೆಂಕಾ ಅವರಿಗೆ ರೊಲ್ಯಾಂಡ್‌ ಗ್ಯಾರಸ್‌ ಬಾಗಿಲು ಮುಚ್ಚಿದೆ.

85ನೇ ರ್‍ಯಾಂಕಿಂಗ್‌ನ ಜಿದಾನ್ಸೆಕ್‌ ಗ್ರ್ಯಾನ್‌ಸ್ಲಾಮ್‌ ಕೂಟವೊಂದರ ಕ್ವಾರ್ಟರ್‌ ಫೈನಲ್‌ ಪ್ರವೇಶಿಸಿದ ಸ್ಲೊವೇನಿಯಾದ ಮೊದಲ ಆಟಗಾರ್ತಿ ಎಂಬುದು ವಿಶೇಷ. ಕಳೆದ ವರ್ಷ ಇದೇ ಕೂಟದಲ್ಲಿ 4ನೇ ಸುತ್ತಿನ ತನಕ ಸಾಗಿದ್ದು ಇವರ ಅತ್ಯುತ್ತಮ ಸಾಧನೆಯಾಗಿತ್ತು. ರವಿವಾರದ ಮುಖಾಮುಖೀಯಲ್ಲಿ ಜಿದಾನ್ಸೆಕ್‌ ರೊಮೇನಿಯಾದ ಸೊರಾನಾ ಕಿಸ್ಟಿì ವಿರುದ್ಧ 7-6 (7-4), 6-1 ಅಂತರದ ಮೇಲುಗೈ ಸಾಧಿಸಿದರು.

ಜಿದಾನ್ಸೆಕ್‌ ಅವರ ಮುಂದಿನ ಎದುರಾಳಿಯಾಗಿರುವ ಪೌಲಾ ಬಡೋಸಾ ಅವರಿಗೂ ಇದು ಮೊದಲ ಗ್ರ್ಯಾನ್‌ಸ್ಲಾಮ್‌ ಕ್ವಾರ್ಟರ್‌ ಫೈನಲ್‌ ಆಗಿದೆ. ಅವರು 2019ರ ರನ್ನರ್ ಅಪ್‌ ಮಾರ್ಕೆಟಾ ವೊಂಡ್ರೂಸೋವಾಗೆ 6-4, 3-6, 6-2 ಅಂತರದ ಸೋಲುಣಿಸಿದರು.
15ನೇ ಶ್ರೇಯಾಂಕದ ವಿಕ್ಟೋರಿಯಾ ಅಜರೆಂಕಾ ಅವರನ್ನು ಪಾವುÉಚೆಂಕೋವಾ 5-7, 6-3, 6-2ರಿಂದ ಮಣಿಸಿದರು.

ಇದನ್ನೂ ಓದಿ :ಟೆಸ್ಟ್‌ ವಿಶ್ವಕಪ್‌ ಫೈನಲ್‌ “ಬೆಸ್ಟ್‌ ಆಫ್ ತ್ರೀ’ ಮಾದರಿಯಲ್ಲಿರಬೇಕಿತ್ತು : ಯುವಿ

ಬೋಪಣ್ಣ ಜೋಡಿಗೆ ವಾಕ್‌ಓವರ್‌
ಫ್ರೆಂಚ್‌ ಓಪನ್‌ ಪುರುಷರ ಡಬಲ್ಸ್‌ನಲ್ಲಿ ರೋಹನ್‌ ಬೋಪಣ್ಣ-ಫ್ರಾಂಕೊ ಸ್ಕಾಗರ್‌ ಜೋಡಿಗೆ ವಾಕ್‌ಓವರ್‌ ನೀಡಲಾಗಿದೆ. ಇವರೀಗ ಕ್ವಾರ್ಟರ್‌ ಫೈನಲ್‌ ಪ್ರವೇಶಿಸಿದ್ದಾರೆ. ಎದುರಾಳಿ ಫ್ರಾನ್ಸೆಸ್‌ ಥಿಯಾಫೊ-ನಿಕೋಲಸ್‌ ಮೊನ್ರೊ ಗಾಯಳಾಗಿ ಹಿಂದೆ ಸರಿದ ಕಾರಣ ಇಂಡೋ-ಕ್ರೊವೇಶಿಯನ್‌ ಜೋಡಿಗೆ ಮುನ್ನಡೆ ಲಭಿಸಿತು.