ಶ್ರೀಮಂತ ವರನಿಗಾಗಿ 36 ಲಕ್ಷ ರೂ. ಕಳೆದುಕೊಂಡ ಮಹಿಳೆ! ; ಆಗಿದ್ದೇನು ?

ಬೆಂಗಳೂರು: ಮ್ಯಾಟ್ರಿಮೊನಿ ವೆಬ್‌ಸೈಟ್‌ವೊಂದರಲ್ಲಿ ಶ್ರೀಮಂತ ವರನನ್ನು ಹುಡುಕಲು ಹೋದ ಮಹಿಳೆಯೊಬ್ಬರು 36 ಲಕ್ಷ ರೂ. ಕಳೆದುಕೊಂಡು ನ್ಯಾಯಕ್ಕಾಗಿ ಠಾಣೆ ಮೆಟ್ಟಿಲೇರಿದ್ದಾರೆ.

ಟಿಸಿ ಪಾಳ್ಯದ ನಿವಾಸಿ ಯಾಮಿನಿ ಅರನಿ ವಂಚನೆಗೊಳಗಾದ ಮಹಿಳೆ. ದೂರುದಾರ ಮಹಿಳೆ ಯಾಮಿನಿ ಮ್ಯಾಟ್ರಿಮೋನಿಯಲ್‌ ವೆಬ್‌ ಸೈಟ್‌ನಲ್ಲಿಶ್ರೀಮಂತ ವರನನ್ನು ಹುಡುಕುತ್ತಿದ್ದಳು. ಫೆ.27ರಂದು ಅಪರಿಚಿತ ವ್ಯಕ್ತಿಯೊಬ್ಬ ಯಾಮಿನಿಗೆ ಕರೆ ಮಾಡಿ ವಿವಾಹವಾಗುವುದಾಗಿ ಹೇಳಿದ್ದ. ಕೆಲಸದ ನಿಮಿತ್ತ ತಾನು ಕ್ಯಾಲಿಫೋರ್ನಿಯಾಗೆ ಹೋಗುತ್ತಿರುವ ಹಿನ್ನೆಲೆಯಲ್ಲಿ ಹಣದ ಅವಶ್ಯಕತೆಯಿದ್ದು, ಅಲ್ಲಿಗೆ ಹೋದ ಕೂಡಲೇ ಹಣ ಹಿಂತಿರುಗಿಸುವುದಾಗಿ ನಂಬಿಸಿ ತನ್ನ ಬ್ಯಾಂಕ್‌ ಖಾತೆಯ ವಿವರ ಕಳುಹಿಸಿದ್ದ.

ಮುಂದೆ ವಿವಾಹವಾಗುವ ಯುವಕ ಎಂಬ ನಂಬಿಕೆ ಮೇಲೆ ಮಹಿಳೆ ಆತನ ಸೂಚನೆಯಂತೆ ಹಂತ-ಹಂತವಾಗಿ ಆರೋಪಿಯ ಖಾತೆಗೆ 36,88,994 ರೂ. ವರ್ಗಾವಣೆ ಮಾಡಿದ್ದಳು. ಇದಾದ ಬಳಿಕ ಆರೋಪಿ ಹಣವನ್ನೂ ಹಿಂತಿರುಗಿಸದೆ, ವಿವಾಹವೂ ಆಗದೇ ವಂಚಿಸಿದ್ದಾನೆ ಎಂದು ದೂರಿನಲ್ಲಿ ವಂಚನೆಗೊಳಗಾದ ಮಹಿಳೆ ಆರೋಪಿಸಿದ್ದಾರೆ.