Fraud Case ಷೇರು ಮಾರುಕಟ್ಟೆ ಹೆಸರಿನಲ್ಲಿ ಮಹಿಳೆಗೆ ವಂಚನೆ

ಉಡುಪಿ: ಷೇರು ಮಾರುಕಟ್ಟೆಯಲ್ಲಿ ವ್ಯವಹಾರ ಮಾಡುವಂತೆ ತಿಳಿಸಿ ವ್ಯಕ್ತಿಯೊಬ್ಬರ ಬ್ಯಾಂಕ್‌ ಖಾತೆಯಿಂದ ಲಕ್ಷಾಂತರ ರೂ. ವರ್ಗಾಯಿಸಿಕೊಂಡ ಘಟನೆ ನಡೆದಿದೆ.

ಉದ್ಯಾವರದ ಸೌಮ್ಯಾ ಸಿ. ಅವರಿಗೆ ಫೇಸ್‌ ಬುಕ್‌ನಲ್ಲಿ ಆನ್‌ಲೈನ್‌ ಟ್ರೇಡಿಂಗ್‌ ಬಗ್ಗೆ ಮಾಹಿತಿಯ ಲಿಂಕ್‌ ಬಂದಿತ್ತು. ಅದನ್ನು ಕ್ಲಿಕ್ಕಿಸಿದಾಗ ವಾಟ್ಸ್‌ಆ್ಯಪ್‌ ಗ್ರೂಪ್‌ವೊಂದು ತೆರೆದುಕೊಂಡಿತ್ತು. ಅನಂತರ ಯಾರೋ ಅಪರಿಚಿತ ವ್ಯಕ್ತಿ ತಾನು ಷೇರ್‌ ಮಾರ್ಕೆಟಿಂಗ್‌ ಅಧಿಕಾರಿ ಅನನ್ಯಾ ಶರ್ಮ ಎಂದು ಪರಿಚಯಿಸಿಕೊಂಡು ಷೇರ್‌ ಮಾರ್ಕೆಟ್‌ನಲ್ಲಿ ಟ್ರೇಡ್‌ ಮಾಡುವ ಬಗ್ಗೆ ತಿಳಿಸಿ, ಹಣ ಹೂಡಿಕೆ ಮಾಡಿದರೆ ಅಧಿಕ ಲಾಭಾಂಶ ಬರುವುದಾಗಿ ನಂಬಿಸಿ ಲಿಂಕ್‌ ಕಳುಹಿಸಿದನು.

ಇದನ್ನು ನಂಬಿದ ಸೌಮ್ಯಾ ಅವರು ಆರೋಪಿ ಸೂಚಿಸಿದ ಬ್ಯಾಂಕ್‌ ಖಾತೆಗೆ ಹಂತ-ಹಂತವಾಗಿ 2 ಲಕ್ಷ ರೂ.ಗಳನ್ನು ವರ್ಗಾಯಿಸಿದ್ದಾರೆ. ಆದರೆ ಆರೋಪಿ ಹಣ ಹಾಗೂ ಲಾಭಾಂಶ ನೀಡದೆ ವಂಚಿಸಿದ್ದಾನೆ. ಸೆನ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.