ಗದಗದಲ್ಲಿ ನಾಲ್ಕಕ್ಕೆ ಏರಿದ ಕೋವಿಡ್ ಸೋಂಕಿತರ ಸಂಖ್ಯೆ: ಸೋಂಕು ಮೂಲ ಮಾತ್ರ ಇನ್ನೂ ನಿಗೂಢ!

ಗದಗ: ಮತ್ತೊಂದು ಕೋವಿಡ್-19 ಪಾಸಿಟಿವ್ ಕೇಸ್ ಪತ್ತೆಯಾಗಿದ್ದು, ಸೋಂಕಿತರ ಸಂಖ್ಯೆ ನಾಲ್ಕಕ್ಕೇರಿದೆ. ನಗರದ ರಂಗನವಾಡ ಗಲ್ಲಿಯ 24 ವರ್ಷದ (ಪಿ. 396) ಯುವಕನಿಗೆ ಸೋಂಕು ತಗುಲಿರೋದು ದೃಢಪಟ್ಟಿದೆ.

ಏ.17 ರಂದು ಸೋಂಕು ಕಂಡು ಬಂದಿದ್ದ ಪಿ. 370 ರೋಗಿಯೊಂದಿಗೆ ದ್ವಿತೀಯ  ಸಂಪರ್ಕದಿಂದ ಸೋಂಕು ತಗುಲಿರಬಹುದು ಎಂದು ಶಂಕಿಸಲಾಗಿದೆ. ಏ.7 ರಂದು ನಗರದ ರಂಗನವಾಡ ಗಲ್ಲಿಯ 80 ವರ್ಷದ ವೃದ್ಧೆಗೆ ಸೋಂಕು ಖಚಿತವಾಗಿತ್ತು. ಅದರ ಬೆನ್ನಲ್ಲೇ ವೃದ್ಧೆ ಸಾವನ್ನಪ್ಪಿದ್ದಳು. ಬಳಿಕ ಈಕೆಯ ಸಂಪರ್ಕದಲ್ಲಿದ್ದ ಅದೇ ಪ್ರದೇಶದ ಆಕೆಯ 59 ವರ್ಷದ ಗೆಳತಿಗೆ ಸೋಂಕು ದೃಢವಾಗಿತ್ತು. ಆಕೆಯಿಂದ 42 ವರ್ಷದ ವ್ಯಕ್ತಿಗೆ (ಪಿ.370) ಸೋಂಕು ತಗುಲಿತ್ತು.

ಇಲ್ಲಿನ‌ ರಂಗನವಾಡಿಯ ಸೋಂಕಿತರಿಗೆ ಯಾವುದೇ ರೀತಿಯಲ್ಲಿ ಟ್ರಾವೆಲ್ ಹಿಸ್ಟರಿ ಇಲ್ಲ. ದೇಶ- ವಿದೇಶದಿಂದ ಆಗಮಿಸಿದವರೊಂದಿಗೆ ಸಂಪರ್ಕವೂ ಇಲ್ಲ. ಆದರೂ ಮೇಲಿಂದ ಮೇಲೆ ಪ್ರಕರಣಗಳು ದೃಢ‌ಪಡುತ್ತಿರುವುದು ಸಾರ್ವಜನಿಕರಲ್ಲಿ ಆತಂಕ ಮೂಡಿಸಿದೆ.