ಕೋವಿಡ್ ಇರುವಾಗ ಶಿಲಾನ್ಯಾಸ ಮಾಡಲು ಹೊರಟಿದ್ದಾರೆ, ರಾಮನೇ ಕಾಪಾಡಬೇಕು: ರಮೇಶ್ ಕುಮಾರ್

ಬೆಳಗಾವಿ: ಇಡೀ ಜಗತ್ತಿನಲ್ಲಿ ಕೋವಿಡ್-19 ಸೋಂಕು ದಟ್ಟವಾಗಿ ಹರಡಿದೆ. ಹೀಗಿರುವಾಗ ರಾಮ ಮಂದಿರ ಶಿಲಾನ್ಯಾಸ ಮಾಡಲು ಹೊರಟಿದ್ದಾರೆ. ಆ ರಾಮನೇ ಅವರನ್ನು ಕಾಪಾಡಬೇಕೆಂದು ಮಾಜಿ ಸ್ಪೀಕರ್ ರಮೇಶ್ ಕುಮಾರ್ ಪರೋಕ್ಷವಾಗಿ ಬಿಜೆಪಿಗೆ ಟಾಂಗ್ ನೀಡಿದರು.

ಬೆಳಗಾವಿಯಲ್ಲಿ ಮಂಗಳವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು ಭಾರತ ಸೇರಿದಂತೆ ವಿಶ್ವದಲ್ಲಿ ಕೋವಿಡ್-19 ಸೋಂಕು ದಟ್ಟವಾಗಿ ವ್ಯಾಪಿಸಿದೆ. ಈ ಸಂದರ್ಭದಲ್ಲಿ ಯಾವುದೇ ಸಮಾವೇಶ, ಸಭೆ, ಧಾರ್ಮಿಕ ಕೆಲಸಗಳು ನಡೆಯುವಂತಿಲ್ಲ ಎಂದು ಹೇಳಿ ದೇಶದ ಜವಾಬ್ದಾರಿ ಹೊತ್ತವರು ಎಲ್ಲರಿಗೂ ನಿರ್ಬಂಧ ಹಾಕಿದ್ದರು. ಆದರೆ ಈಗ ಅವರೇ ಶ್ರೀರಾಮನ ಶಿಲಾನ್ಯಾಸ ಮಾಡಲು ಹೊರಟ್ಟಿದ್ದಾರೆ. ಅವರನ್ನು ರಾಮನೇ ಕಾಪಾಡಬೇಕೆಂದು ಅಸಮಾಧಾನ ವ್ಯಕ್ತಪಡಿಸಿದರು.

ರಾಜ್ಯದಲ್ಲಿ ಸಿಎಂ ಬಿ.ಎಸ್.ಯಡಿಯೂರಪ್ಪ ಅನಾರೋಗ್ಯಕ್ಕೆ ಒಳಗಾದಾಗ ಆರೋಪ ಮಾಡುವುದು ಸದಾಚಾರ ಅಲ್ಲ. ವಿಪಕ್ಷ ನಾಯಕ ಸಿದ್ದರಾಮಯ್ಯ ಅವರಿಗೂ ಕೋವಿಡ್-19 ಸೋಂಕು ತಗುಲಿದೆ. ಅವರಿಬ್ಬರೂ ಶೀಘ್ರದಲ್ಲಿಯೇ ಆರೋಗ್ಯವಾಗಿ ಬರಲಿ ಎಂದು ಆಶಯ ವ್ಯಕ್ತಪಡಿಸಿದರು