ವನಿತಾ ಕ್ರಿಕೆಟ್‌ ತಂಡಕ್ಕೆ ತುಷಾರ್‌ ಕೋಚ್‌

ಹೊಸದಿಲ್ಲಿ: ಮಹಿಳಾ ವಿಶ್ವಕಪ್‌ ಕ್ರಿಕೆಟ್‌ ಪಂದ್ಯಾವಳಿಗೆ ಕೇವಲ ಎರಡು ತಿಂಗಳು ಬಾಕಿ ಇರುವ ಬೆನ್ನಲ್ಲೇ ಭಾರತ ತಂಡದ ಮುಖ್ಯ ಕೋಚ್‌ ಹುದ್ದೆಗೆ ಬರೋಡಾದ ಮಾಜಿ ಆಟಗಾರ ತುಷಾರ್‌ ಅರೋಥೆ ಅವರನ್ನು ಬಿಸಿಸಿಐ ನೇಮಿಸಿದೆ. ಈ ಹಿಂದೆ ಮಾಜಿ ಆಟಗಾರ್ತಿ ಪೂರ್ಣಿಮಾ ರಾವ್‌ ವನಿತಾ ತಂಡದ ಕೋಚ್‌ ಆಗಿದ್ದರು. ಇತ್ತೀಚೆಗೆ ರಾವ್‌ ಅವರನ್ನು ಬಿಸಿಸಿಐ ಕೋಚ್‌ ಹುದ್ದೆಯಿಂದ ವಜಾಗೊಳಿಸಿತ್ತು.

ಈ ಬಗ್ಗೆ ಪ್ರತಿಕ್ರಿಯಿಸಿದ ಪೂರ್ಣಿಮಾ ರಾವ್‌, ‘ಮುಂದಿನ ವಿಶ್ವಕಪ್‌ಗಾಗಿ ತಂಡವನ್ನು ಸಿದ್ಧಪಡಿಸುವಲ್ಲಿ ನಿರತನಾಗಿದ್ದೆ. ಆದರೆ ಯಾವುದೇ ಕಾರಣ ನೀಡದೆ ಬಿಸಿಸಿಐ ನನ್ನನ್ನು ಈ ಹುದ್ದೆಯಿಂದ ಕೆಳಕ್ಕಿಳಿಸಿದೆ. ಮಂಡಳಿಯ ಈ ನಿರ್ಧಾರದಿಂದ ಬೇಸರವಾಗಿದೆ’ ಎಂದಿದ್ದಾರೆ. ತುಷಾರ್‌ ಅರೋಥೆ ಇದಕ್ಕೂ ಮುನ್ನ 2008-12ರ ಅವಧಿಯಲ್ಲಿ ಭಾರತೀಯ ವನಿತಾ ತಂಡದ ಫೀಲ್ಡಿಂಗ್‌ ಕೋಚ್‌ ಹಾಗೂ ಪ್ರಧಾನ ಕೋಚ್‌ ಆಗಿ ಕರ್ತವ್ಯ ನಿಭಾಯಿಸಿದ್ದರು.