ಮಾಜಿ ಐಎಎಫ್ ಮುಖ್ಯಸ್ಥ ಇದ್ರಿಸ್‌ ಹಸನ್‌ ಲತೀಫ್ ಅಂತ್ಯಕ್ರಿಯೆ

ಹೈದರಾಬಾದ್‌: 94ರ ಹರೆಯದಲ್ಲಿ ನಿನ್ನೆ ಸೋಮವಾರ ನಿಧನ ಹೊಂದಿದ್ದ ಭಾರತೀಯ ವಾಯು ಪಡೆಯ ಮಾಜಿ ಮುಖ್ಯಸ್ಥ ಏರ್‌ ಚೀಫ್ ಮಾರ್ಶಲ್‌ ಇದ್ರಿಸ್‌ ಹಸನ್‌ ಲತೀಫ್ ಅವರ ಅಂತ್ಯಕ್ರಿಯೆ ಇಂದು ಇಲ್ಲಿನ ಹಳೇ ನಗರದ ದಫ‌ನ ಭೂಮಿಯಲ್ಲಿ ಸಕಲ ಮಿಲಿಟರಿ ಗೌರವಗಳೊಂದಿಗೆ ನಡೆಯಿತು. 

ಲತೀಫ್ ಅವರು 1978ರ ಸೆಪ್ಟಂಬರ್‌ನಿಂದ 1981ರ ಆಗಸ್ಟ್‌ ವರೆಗೆ ಐಎಎಫ್ ಮುಖ್ಯಸ್ಥರಾಗಿದ್ದರು. ಇಲ್ಲಿನ ಖಾಸಗಿ ಆಸ್ಪತ್ರೆಯಲ್ಲಿ ಅವರು ನಿನ್ನೆ ಸೋಮವಾರ ನಿಧನ ಹೊಂದಿದ್ದರು. 

1981ರಲ್ಲಿ ನಿವೃತ್ತರಾದ ಬಳಿಕ ಲತೀಫ್ ಅವರು ಮಹಾರಾಷ್ಟ್ರದ ರಾಜ್ಯಪಾಲರಾಗಿ ಮತ್ತು ಅನಂತರ ಫ್ರಾನ್ಸ್‌ನಲ್ಲಿ ಭಾರತೀಯ ರಾಯಭಾರಿಯಾಗಿ ಸೇವೆ ಸಲ್ಲಿಸಿದ್ದರು.

ತಮ್ಮ 18ನೇ ವಯಸ್ಸಿನಲ್ಲಿ ಲತೀಫ್ ಅವರು ರಾಯಲ್‌ ಇಂಡಿಯನ್‌ ಫೋರ್ಸ್‌ ಸೇರಿದ್ದರು; ಮರು ವರ್ಷವೇ ಸೇವೆಗೆ ನಿಯೋಜಿತರಾಗಿದ್ದರು.