ಯುಪಿ,ಬಿಹಾರದಲ್ಲಿ ಬಿಗಡಾಯಿಸಿದ ನರೆ:ಸಾವಿನ ಸಂಖ್ಯೆ170 ಕ್ಕೆ

ಹೊಸದಿಲ್ಲಿ: ಉತ್ತರ ಪ್ರದೇಶ ಮತ್ತು ಬಿಹಾರದಲ್ಲಿ ಭೀಕರ ನೆರೆ ಪರಿಸ್ಥಿತಿ ಕಾಣಿಸಿಕೊಂಡಿದ್ದು , ಶನಿವಾರದ ವರೆಗೆ ಪ್ರವಾಹ ಸಂಬಂಧಿತ ಅವಘಡಗಳಿಗೆ 170 ಮಂದಿ ಬಲಿಯಾಗಿದ್ದಾರೆ.

ಬಿಹಾರದ 13ಕ್ಕೂ ಹೆಚ್ಚು ಜಿಲ್ಲೆಗಳಲ್ಲಿ ಕಳೆದ ಕೆಲ ದಿನಗಳಿಂದ ಭಾರೀ ಪ್ರವಾಹ ಕಾಣಿಸಿಕೊಂಡಿದ್ದು ಜನ ತತ್ತರಿಸಿಹೋಗಿದ್ದಾರೆ . ವಾಯು ಸೇನೆ ತುರ್ತು ರಕ್ಷಣಾ ಕಾರ್ಯಗಳನ್ನು ನಡೆಸುವಲ್ಲಿ ನಿರತವಾಗಿದೆ. ಸುಮಾರು 1ಕೋಟಿ 8 ಲಕ್ಷ ದಷ್ಟು ಜನರು ನೆರೆಯಿಂದಾಗಿ ಸಂತ್ರಸ್ತರಾಗಿದ್ದು, ಈಗಾಗಲೇ 4 ಲಕ್ಷ ಜನರನ್ನು ಸುರಕ್ಷಿತ ಪ್ರದೇಶಗಳಿಗೆ ಸ್ಥಳಾಂತರಿಸಲಾಗಿದೆ ಎಂದು ವರದಿಯಾಗಿದೆ.

ಬಿಹಾರದಲ್ಲಿ ಕಳೆದ 5 ದಿನಗಳಲ್ಲಿ 130 ಮಂದಿ ಬಲಿಯಾಗಿದ್ದು, ಅರಾರಿಯಾ ಜಿಲ್ಲೆಯೊಂದರಲ್ಲೇ 30 ಮಂದಿ ಸಾವನ್ನಪ್ಪಿದ್ದಾರೆ.

ಉತ್ತರ ಪ್ರದೇಶಲ್ಲೂ ಕೆಲ ಜಿಲ್ಲೆಗಳು ನೆರೆ ಪೀಡಿತವಾಗಿದ್ದು ಇದುವರೆಗೆ 40 ಮಂದಿ ಪ್ರಾಣ ಕಳೆದುಕೊಂಡಿದ್ದಾರೆ. ಬಹರೀಚ್‌ನಲ್ಲಿ ಸಾವಿರಾರು ಜನರು ಸಂತ್ರಸ್ತರಾಗಿದ್ದಾರೆ.