ಹೊಸದಿಲ್ಲಿ: ಕೋವಿಡ್-19ದಿಂದ ಸಂಕಟಕ್ಕೆ ಸಿಲುಕಿದ ಟೇಬಲ್‌ ಟೆನಿಸ್ ಪರಿವಾರಕ್ಕೆ ಭಾರತದ ಮೂವರು ಟಿಟಿ ಆಟಗಾರರು ಆರ್ಥಿಕ ನೆರವಿಗೆ ಮುಂದಾಗಿದ್ದಾರೆ. ಇವರೆಂದರೆ ಶರತ್‌ ಕಮಲ್‌, ಜಿ. ಸಥಿಯನ್‌ ಮತ್ತು ನೇಹಾ ಅಗರ್ವಾಲ್‌.
ಈ ಮೂವರು ಸೇರಿಕೊಂಡು ನಾಲ್ಕೇ ದಿನಗಳಲ್ಲಿ 7 ಲಕ್ಷ ರೂ. ಒಟ್ಟುಗೂಡಿಸಿದ್ದಾರೆ. ಇದನ್ನು 10 ಲಕ್ಷ ರೂ.ಗೆವಿಸ್ತರಿಸಿ ಕನಿಷ್ಠ 100 ಮಂದಿಗೆ ನೆರವು ಒದಗಿಸುವುದು ಇವರ ಯೋಜನೆಯಾಗಿದೆ. ತೀವ್ರ ಸಂಕಟದಲ್ಲಿರುವ ಟಿಟಿ ಆಟಗಾರರಿಗೆ, ತರಬೇತುದಾರರಿಗೆ, ಅಂಪಾಯರ್‌ ಮೊದಲಾದವರಿಗೆಲ್ಲ ಈ ನೆರವು ಲಭಿಸಲಿದೆ.
“ಇಂಥದೊಂದು ಯೋಜನೆ ಹೊಳೆದದ್ದು ಸಥಿಯನ್‌ ಅವರಿಗೆ. ಕೋವಿಡ್ ದಿಂದಾಗಿ ಕೆಲಸವಿಲ್ಲದೆ ಕುಳಿತಿರುವ ಟಿಟಿ ತರಬೇತುದಾರರಿಗೆ ಹಾಗೂ ಇತರರಿಗೆ ಈ ಸಮಯದಲ್ಲಿ ಕನಿಷ್ಠ ಇಷ್ಟಾದರೂ ನೆರವು ನೀಡೋಣ ಎಂದು ತೀರ್ಮಾನಿಸಿದೆವು…’ ಎಂಬುದಾಗಿ ಶರತ್‌ ಕಮಲ್‌ ಹೇಳಿದರು.
ಈ ನೆರವು ಯಾರಿಗೆ ತಲುಪಬೇಕು ಎಂಬುದನ್ನು ಸೌಮ್ಯದೀಪ್‌ ರಾಯ್‌ ಮತ್ತು ಕಮಲೇಶ್‌ ಮೆಹ್ತಾ ಸೇರಿಕೊಂಡು ನಿರ್ಧರಿಸಲಿದ್ದಾರೆ.
