ಕೊನೆಗೂ ಮಕ್ಕಳಿಗೆ ತಾತ್ಕಾಲಿಕ ಕೊಠಡಿ ಭಾಗ್ಯ

ಉಪ್ಪಿನಂಗಡಿ: ಉಪ್ಪಿನಂಗಡಿ ವ್ಯಾಪ್ತಿಯ ಮಠ ಹಿರ್ತಡ್ಕ ಸ.ಹಿ.ಪ್ರಾಥಮಿಕ ಶಾಲೆಯಲ್ಲಿ ಕೊಠಡಿ ಕೊರತೆಯಿಂದ ಜಗಲಿಯಲ್ಲಿ ಪಾಠ ಕೇಳುತ್ತಿದ್ದ ಮಕ್ಕಳಿಗೆ ಕೊನೆಗೂ ತಾತ್ಕಾಲಿಕ ಕೊಠಡಿ ಲಭಿಸಿದೆ.

ಬುಧವಾರ ಉದಯವಾಣಿ ಸುದಿನದಲ್ಲಿ ಈ ಕುರಿತು ವರದಿ ಪ್ರಕಟಗೊಂಡಿತ್ತು. ತತ್‌ ಕ್ಷಣವೇ ಕ್ಷೇತ್ರ ಶಿಕ್ಷಣಾಧಿಕಾರಿ ಸುಕನ್ಯಾ ಡಿ.ಎಸ್‌. ಅವರು, ಶಿಕ್ಷಕರ ಕೊಠಡಿಯಲ್ಲಿ ಮಕ್ಕಳಿಗೆ ತರಗತಿ ನಡೆಸುವಂತೆ ಶಾಲಾ ಮುಖ್ಯಗುರುವಿಗೆ ಸೂಚಿಸಿದ್ದು, ಗುರುವಾರದಿಂದಲೇ ಈ ಕ್ರಮ ಕೈಗೊಳ್ಳಲಾಗಿದೆ. ಹೊಸ ಕಟ್ಟಡ ನಿರ್ಮಾಣ ಆಗುವ ತನಕ ತಾತ್ಕಾಲಿಕ ನೆಲೆಯಲ್ಲಿ ಈ ಪರಿಹಾರ ಕಂಡುಕೊಳ್ಳಲಾಗಿದೆ.

ಒಂದನೇ ತರಗತಿಯಿಂದ ಏಳನೇ ತರಗತಿ ತನಕ ಕ್ಲಾಸ್‌ ರೂಂ ಹೊಂದಿರುವ ಈ ಶಾಲೆಯಲ್ಲಿ ಒಟ್ಟು 86 ವಿದ್ಯಾರ್ಥಿಗಳು ಇದ್ದಾರೆ. ಕೊಪ್ಪಳ, ಹಿರ್ತಡ್ಕ, ಕೆರೆಮೂಲೆ ಪ್ರದೇಶದಿಂದ ಈ ಶಾಲೆಗೆ ವಿದ್ಯಾಭ್ಯಾಸಕ್ಕಾಗಿ ಮಕ್ಕಳು ಬರುತ್ತಾರೆ. ಇಲ್ಲಿ ಏಳು ತರಗತಿಗಳಿವೆ. 1ರಿಂದ 3 ನೇ ತರಗತಿ ತನಕ ಒಂದು ಕೊಠಡಿಯಲ್ಲಿ ನಲಿ-ಕಲಿ ತರಗತಿ ಇದೆ. 4, 5, 6, 7ನೇ ತರಗತಿಗೆ ನಾಲ್ಕು ಕೊಠಡಿ ಇದ್ದರೂ, ಅದರಲ್ಲಿ ಎರಡು ಕೊಠಡಿಗಳು ಹಾಳಾಗಿವೆ. ಪ್ರತಿ ದಿನ ಒಂದು ಕ್ಲಾಸ್‌ ರೂಂ ವಿದ್ಯಾರ್ಥಿಗಳನ್ನು ಜಗಲಿಯಲ್ಲಿ ಕೂರಿಸಿ ಪಾಠ ಮಾಡುತ್ತಾರೆ. ಹಾಗಾಗಿ ನಾಲ್ಕು ತರಗತಿಯವರು ದಿನದ ಒಂದು ತಾಸು ಹೊರಗೆ ಪಾಠ ಕೇಳಬೇಕಾದ ದುಸ್ಥಿತಿ ಉಂಟಾಗಿತ್ತು.

ಶಾಸಕಿ ಶಕುಂತಳಾ ಟಿ. ಶೆಟ್ಟಿ ತಮ್ಮ ಶಾಸಕರ ನಿಧಿಯಿಂದ 7 ಲಕ್ಷ ರೂ. ಮಂಜೂರುಗೊಳಿಸಿದ್ದು, ಆ ಅನುದಾನದಲ್ಲಿ ಇಲ್ಲಿ ಪ್ರತ್ಯೇಕ ಎರಡು ಹೊಸ ಕಟ್ಟಡ ನಿರ್ಮಿಸುವ ಪ್ರಸ್ತಾಪ ಇದೆ. ಆ ಕಾಮಗಾರಿಗೆ ವೇಗ ನೀಡಿದರೆ ಕೊಠಡಿ ಕೊರತೆಯಿಂದ ಮಕ್ಕಳಿಗೆ ಮುಕ್ತಿ ಸಿಗಲಿದೆ.