ಯೂರೋ ಕಪ್‌: ಇಂಗ್ಲೆಂಡ್‌ಗೆ ಫೈನಲ್‌ ಟಿಕೆಟ್‌

ಲಂಡನ್‌: ಇಂಗ್ಲೆಂಡಿನ ಸುದೀರ್ಘ‌ ಕಾಯುವಿಕೆಗೆ ಮುಕ್ತಿ ಸಿಕ್ಕಿದೆ. ಇದೇ ಮೊದಲ ಬಾರಿಗೆ ಯೂರೋ ಕಪ್‌ ಫ‌ುಟ್‌ಬಾಲ್‌ ಫೈನಲ್‌ಗೆ ಪ್ರವೇಶ ಪಡೆದಿದೆ. ಲಂಡನ್ನಿನ “ವೆಂಬ್ಲಿ ಸ್ಟೇಡಿಯಂ’ನಲ್ಲಿ ಸಾಗಿದ ಜಿದ್ದಾಜಿದ್ದಿ ಸೆಮಿಫೈನಲ್‌ನಲ್ಲಿ ಆಂಗ್ಲರ ಪಡೆ ಡೆನ್ಮಾರ್ಕ್‌ ಸವಾಲನ್ನು ಮೆಟ್ಟಿ ನಿಂತು, ಹೆಚ್ಚುವರಿ ಅವಧಿಯ ಪರಾಕ್ರಮದಿಂದ 2-1 ಅಂತರದ ಗೆಲುವು ಸಾಧಿಸಿತು.

1966ರ ಫಿಫಾ ವಿಶ್ವಕಪ್‌ ಗೆಲುವಿನ ಬಳಿಕ ಇಂಗ್ಲೆಂಡ್‌ ಕಾಣುತ್ತಿರುವ ಪ್ರತಿಷ್ಠಿತ ಫ‌ುಟ್‌ಬಾಲ್‌ ಕೂಟದ ಮೊದಲ ಫೈನಲ್‌ ಇದೆಂಬುದು ಉಲ್ಲೇಖನೀಯ

ರವಿವಾರ ನಡುರಾತ್ರಿಯ ಬಳಿಕ ಇದೇ ಅಂಗಳದಲ್ಲಿ ಸಾಗುವ ಪ್ರಶಸ್ತಿ ಕಾಳಗದಲ್ಲಿ ಇಂಗ್ಲೆಂಡ್‌-ಇಟಲಿ ಮುಖಾಮುಖೀ ಆಗಲಿವೆ. ಇಟಲಿಗೆ ಇದು 4ನೇ ಫೈನಲ್‌. 1968ರಲ್ಲಿ ಯುಗೋಸ್ಲಾವಿಯಾವನ್ನು ಮಣಿಸಿ ತನ್ನ ಏಕೈಕ ಯೂರೋ ಕಪ್‌ ಎತ್ತಿದೆ. 2000 ಮತ್ತು 2012ರಲ್ಲಿ ರನ್ನರ್ ಅಪ್‌ಗೆ ತೃಪ್ತಿಪಟ್ಟಿದೆ.

ಇಂಗ್ಲೆಂಡ್‌-ಡೆನ್ಮಾರ್ಕ್‌ ಪಂದ್ಯ ನಿಗದಿತ ಅವಧಿಯಲ್ಲಿ 1-1ರಿಂದ ಸಮನಾಗಿತ್ತು. ಹೆಚ್ಚುವರಿ ಅವಧಿಯಲ್ಲಿ ಹ್ಯಾರಿ ಕೇನ್‌ ನಿರ್ಣಾಯಕ ಗೋಲು ಸಿಡಿಸಿ ಇಂಗ್ಲೆಂಡ್‌ ಗೆಲುವನ್ನು ಸಾರಿದರು.