ತೈಲ ಕಳವು ತಡೆಗೆ ಇ-ಕೀ

ನವದೆಹಲಿ: ಉತ್ತರ ಪ್ರದೇಶದ ಪೆಟ್ರೋಲ್‌ ಬಂಕ್‌ ಒಂದರಲ್ಲಿ “ಚಿಪ್‌’ ಬಳಸಿ ತೈಲ ದೋಚುತ್ತಿದ್ದ ಪ್ರಕರಣಗಳು ಬೆಳಕಿಗೆ ಬಂದ ಬೆನ್ನಲ್ಲೇ ಈಗ ಸರ್ಕಾರಿ ಸ್ವಾಮ್ಯದ ತೈಲ ಕಂಪನಿಗಳು ಅದಕ್ಕೆ  ಕಡಿವಾಣ ಹಾಕಲು ಮುಂದಾಗಿವೆ. ಇದಕ್ಕಾಗಿ “ಇ-ಕೀ’ (ಎಲೆಕ್ಟ್ರಾನಿಕ್‌ ಕೀ) ಪರಿಚಯಿಸಲು ಚಿಂತನೆ ನಡೆಸಿ ರುವ ತೈಲ ಕಂಪನಿಗಳು ಒನ್‌ ಟೈಂ ಪಾಸ್‌ವರ್ಡ್‌ (ಒಟಿಪಿ) ಬಳಕೆ ಮೂಲಕ ಟ್ಯಾಂಕರ್‌ಗಳ ಮುಚ್ಚಳ ತೆಗೆವ ವ್ಯವಸ್ಥೆ ಬರಲಿದೆ.

ತೈಲ ಕಂಪನಿಗಳ ರಿಫೈನರಿಗಳಿಂದ ಬಂಕ್‌ಗೆ ತೈಲೋತ್ಪನ್ನ ಪೂರೈಕೆ ಮಾಡುವ ಹಾಗೂ ಟ್ಯಾಂಕರ್‌ನಿಂದ ಬಟವಾಡೆ ಆಗುವ ತನಕ ಪ್ರತಿ ಹಂತದಲ್ಲಿಯೂ ನಿಗಾ ವಹಿಸಲು ನೆರವಾಗಲಿದೆ. ಎಲ್ಲ  ಹಂತದಲ್ಲಿಯೂ ಮುಚ್ಚಳ ತೆರೆಯಲು ಒಟಿಪಿ ಇಲ್ಲದೇ ಸಾಧ್ಯವೇ ಇರುವುದಿಲ್ಲ. ಆದರೆ ಡೀಲರ್‌ಗಳಿಗೆ ವಿಶೇಷ ಪಾಸ್‌ವರ್ಡ್‌ ನೀಡಿರಲಾ ಗುತ್ತದೆ. ಜತೆಗೆ ಟ್ಯಾಂಕರ್‌ ಹೊರಟಿರುವ ಬಗ್ಗೆ ಜಿಪಿಎಸ್‌ ವ್ಯವಸ್ಥೆ ಮೂಲಕ ನಿಗಾ ಇರಿಸಲಾಗುತ್ತದೆ.

ಇಂಡಿಯನ್‌ ಆಯಿಲ್‌ ಕಾರ್ಪೊರೇಷನ್‌ (ಐಒಸಿ), ಹಿಂದೂಸ್ತಾನ್‌ ಪೆಟ್ರೋಲಿಯಂ ಕಾರ್ಪೊರೇಷನ್‌ (ಎಚ್‌ಪಿಸಿಎಲ್‌) ಹಾಗೂ ಭಾರತ್‌ ಪೆಟ್ರೋಲಿಯಂ ಕಾರ್ಪೊರೇಷನ್‌ (ಬಿಪಿಸಿಎಲ್‌) ಈಗಾಗಲೇ ಈ ಬಗ್ಗೆ ಚರ್ಚಿಸಿದ್ದು, ಮುಂದಿನ ವರ್ಷಾಂತ್ಯದಲ್ಲಿ ದೇಶದ 55 ಸಾವಿರ ಪಂಪ್‌ಗ್ಳಲ್ಲಿ ಅಳವಡಿಸಿ, ತೀವ್ರ ನಿಗಾದಲ್ಲಿ ಇರಿಸಲು ಸಿದ್ಧತೆ ಮಾಡಿಕೊಂಡಿವೆ. 

ಈ ವ್ಯವಸ್ಥೆ ಅಳವಡಿಕೆಗೆ ಪ್ರತಿ ಔಟ್‌ಲೆಟ್‌ಗೆ ಕಂಪನಿಗಳು 4-5 ಲಕ್ಷ ರೂ. ಖರ್ಚು ಮಾಡಬೇಕಾಗುತ್ತದೆ. ಅಂದುಕೊಂಡಂತೆ ಯೋಜನೆ ಕಾರ್ಯರೂಪಕ್ಕೆ ಬರಲು ಒಟ್ಟು ಖರ್ಚು 2,000 ಕೋಟಿ ರೂ. ಆಗಲಿದೆ.