ಡಿವೈಎಸ್‌ಪಿ ಪಂಡಿತ್‌ ಹತ್ಯೆಗೆ ಚಿತಾವಣೆಗೈದಿದ್ದ ಉಗ್ರ ಮಟಾಶ್‌

ಶ್ರೀನಗರ : ಡಿವೈಎಸ್‌ಪಿ ಅಯೂಬ್‌ ಪಂಡಿತ್‌ ಅವರನ್ನು ಚಚ್ಚಿ ಸಾಯಿಸುವಲ್ಲಿ ಉದ್ರಿಕ್ತ ಸಮೂಹಕ್ಕೆ ಚಿತಾವಣೆಗೈದಿದ್ದ ಹಿಜ್‌ಬುಲ್‌ ಮುಜಾಹಿದೀನ್‌ ಉಗ್ರ ಸಾಜಿದ್‌ ಅಹ್ಮದ್‌ ಗಿಲ್‌ಕರ್‌ ಮೊನ್ನೆ ಮಂಗಳವಾರ ರಾತ್ರಿ ಬಡಗಾಂವ್‌ನಲ್ಲಿ ನಡೆದಿದ್ದ ಭದ್ರತಾ ಪಡೆಗಳ ಎನ್‌ಕೌಂಟರ್‌ನಲ್ಲಿ ಹತನಾಗಿರುವುದು ದೃಢಪಟ್ಟಿದೆ. 

ಶ್ರೀನಗರದಲ್ಲಿ ಕಳೆದ ತಿಂಗಳಲ್ಲಿ ಡಿವೈಎಸ್‌ಪಿ ಅಯೂಬ್‌ ಪಂಡಿತ್‌ ಅವರನ್ನು ಉದ್ರಿಕ್ತ ಸಮೂಹವು ಚಚ್ಚಿ ಸಾಯಿಸಿದ ಪ್ರಕರಣವು ಜಮ್ಮು ಕಾಶ್ಮೀರದಲ್ಲಿ ಭಾರೀ ಸಾರ್ವಜನಿಕ ಆಕ್ರೋಶಕ್ಕೆ ಕಾರಣವಾಗಿತ್ತು. ಜತೆಗೆ ಮುಖ್ಯಮಂತ್ರಿ ಮೆಹಬೂಬ ಮುಫ್ತಿ ಅವರು ಉದ್ರಿಕ್ತರ ಈ ಕೃತ್ಯವನ್ನು “ವಿಶ್ವಾಸದ ಕಗ್ಗೊಲೆ’ ಎಂದು ಖಂಡಿಸುವಂತೆ ಆಗ್ರಹಿಸಲಾಗಿತ್ತು. 

ಡಿವೈಎಸ್‌ಪಿ ಪಂಡಿತ್‌ ಅವರನ್ನು ಜೂನ್‌ 22ರಂದು ಶ್ರೀನಗರದ ನೌಹಟ್ಟಾ ಪ್ರದೇಶದಲ್ಲಿನ ಐತಿಹಾಸಿಕ ಜಾಮಿಯಾ ಮಸೀದಿಯ ಹೊರಗೆ ಉದ್ರಿಕ್ತ ಜನಸಮೂಹ ಕಲ್ಲು ಹೊಡೆದು, ವಿವಸ್ತ್ರಗೊಳಿಸಿ, ಚಚ್ಚಿ ಸಾಯಿಸಿತ್ತು.