ಸಾಕಿದ ಶ್ವಾನ ಸಾಯಲಿ ಎಂದು ವಿಷವುಣಿಸಿ ಮಣ್ಣಿನಲ್ಲಿ ಹೂತರೆ ಎದ್ದು ಬರೋದೇ!

ಮಾಸ್ಕೋ: “ತಾನೊಂದು ಬಗೆದರೆ ದೈವವೊಂದು ಬಗೆಯಿತು’ ಎನ್ನುವುದು ನಾಣ್ಣುಡಿ. ಅದನ್ನೇ ಪ್ರತಿಬಿಂಬಿಸುವ ಘಟನೆ ರಷ್ಯಾದ ಉತ್ತರ ಭಾಗದ ಕೋಮಿ ಎಂಬ ನಗರದ ಉತಾ ಎಂಬಲ್ಲಿ ನಡೆದಿದೆ. ಸಾಕಿದ್ದ 7 ವರ್ಷದ ಜರ್ಮನ್‌ ಶೆಫ‌ರ್ಡ್‌ ತಳಿಯ ನಾಯಿ “ಸಾಯಲಿ’ ಎಂದು ಮಾಲಕ ಅದಕ್ಕೆ ವಿಷದ ಇಂಜೆಕ್ಷನ್‌ ನೀಡಿದ್ದ. ಬಳಿಕ ನಾಯಿ ಸತ್ತು ಹೋಗಿದೆ ಎಂದು ತಿಳಿದುಕೊಂಡು ಅದನ್ನು ಹೂತು ಹಾಕಿದ್ದ. ಅನಂತರ ನಡೆದದ್ದೇ ಅಚ್ಚರಿಯ ಸಂಗತಿ ನೋಡಿ!

ಮಾಲಕ ಸ್ಥಳದಿಂದ ತೆರಳಿದ ಕೂಡಲೇ, ಮಣ್ಣಿನ ಅಡಿಯಲ್ಲಿದ್ದ ನಾಯಿ ಸ್ವಪ್ರಯತ್ನ ದಿಂದಲೇ ಮೇಲೆದ್ದು ಬಂದಿದೆ. ಮಾತ್ರವಲ್ಲದೆ, ದಾರಿ ಅರಸುತ್ತಾ ರಸ್ತೆಯ ಅಂಚಿಗೆ ಬಂದು ಮಳೆಯಲ್ಲಿ ನೆನೆಯುತ್ತಿತ್ತು. ಆಗ ಓಲ್ಗಾ ಲಿಸ್ಟೇವಾ (39) ಎಂಬ ಮಹಿಳೆಯ ಕಣ್ಣಿಗೆ ಬಿತ್ತು. ಆಕೆ ಕೂಡಲೇ ನಾಯಿಯನ್ನು ಕಾರಿನ ಹಿಂದಿನ ಸೀಟ್‌ನಲ್ಲಿ ಕುಳ್ಳಿರಿಸಿ ಉತಾಕ್ಕೆ ಹೋಗಿ, ಅಲ್ಲಿ ಶ್ವಾನಗಳ ಪಾಲನಾ ಕೇಂದ್ರಕ್ಕೆ ಈ ನಾಯಿ ಯನ್ನು ಹಸ್ತಾಂತರಿಸಿದ್ದಾಳೆ. ಅನಂತರ ಅದರ ಮಾಲಕರನ್ನು ಪತ್ತೆ ಮಾಡಲು ಜಾಲತಾಣಗಳಲ್ಲಿ ನಾಯಿಯ ಫೋಟೋ ಪ್ರಕಟಿಸಲಾಯಿತು.

ಅಂತಿಮವಾಗಿ ನಾಯಿಯ ಮಾಲಕರು ಶ್ವಾನಗಳ ಪಾಲನಾ ಕೇಂದ್ರಕ್ಕೆ ಬಂದರು. ಅವರು ತಮ್ಮ ತಪ್ಪೊಪ್ಪಿಕೊಂಡು, ನಾಯಿ ಅನಾರೋಗ್ಯಪೀಡಿತವಾದ್ದರಿಂದ ಸಾಯಿಸಲು ನಿರ್ಧರಿಸಿದ್ದಾಗಿ ತಿಳಿಸಿದರು. ತಪಾಸಣೆ ವೇಳೆ ಶ್ವಾನ ಆರೋಗ್ಯಯುತವಾಗಿದೆ ಎಂದು ಖಚಿತವಾಗಿದೆ. ಸದ್ಯ ಅದು ಶ್ವಾನ ಪಾಲನಾ ಕೇಂದ್ರದಲ್ಲಿಯೇ ಇದೆ.