ಅಕ್ಷರಸ್ಥರಿಂದಲೇ ಮತದಾನಕ್ಕೆ ನಿರುತ್ಸಾಹ!

ಮೈಸೂರು: ಪ್ರಜಾಪ್ರಭುತ್ವದ ಹಬ್ಬ ಎನಿಸಿರುವ ಚುನಾವಣೆಯಲ್ಲಿ ಮತದಾನ ಮಾಡಲು ನಗರ ಪ್ರದೇಶದ ಮತದಾರರು, ಅದರಲ್ಲೂ ಅಕ್ಷರಸ್ಥರು ಮತಗಟ್ಟೆಗೆ ಬರಲು ಹಿಂದೇಟು ಹಾಕಿರುವ ಬಗ್ಗೆ ಹಲವು ರೀತಿಯ ವಿಶ್ಲೇಷಣೆಗಳು ವಿಶ್ಲೇಷಣೆಗಳು ನಡೆಯುತ್ತಿವೆ. ಮತದಾರರು ಜಿಲ್ಲಾಡಳಿತವನ್ನು ದೂಷಿಸಿದರೆ, ಜಿಲ್ಲಾಡಳಿತ ಎಲ್ಲಾ ರೀತಿಯ ಪ್ರಯತ್ನವನ್ನೂ ಮಾಡಲಾಗಿದೆ. ಅದರ ಪರಿಣಾಮವೇ ಈ ಬಾರಿ ಶೇ.4 ಮತದಾನ ಹೆಚ್ಚಳವಾಗಿದೆ ಎನ್ನುತ್ತಿದೆ.

ನೈತಿಕ ಮತದಾನ ಜಾಗೃತಿ: ಮತದಾರರ ಪಟ್ಟಿಯಲ್ಲಿನ ಹತ್ತು ಹಲವು ಗೊಂದಲಗಳು ಮತದಾರರನ್ನು ಮತಟಗಟ್ಟೆಯಿಂದ ದೂರ ಉಳಿಯುವಂತೆ ಮಾಡುತ್ತಿದೆ. ಮತದಾರರನ್ನು ಮತಗಟ್ಟೆಗೆ ಕರೆತರುವ ಸಲುವಾಗಿಯೇ ಈ ಬಾರಿ ಮತದಾರರರಲ್ಲಿ ನೋಂದಣಿ ಮತ್ತು ನೈತಿಕ ಮತದಾನ ಕುರಿತು ಜಾಗೃತಿ ಮೂಡಿಸಲು ಸ್ವೀಪ್‌ ವತಿಯಿಂದ ವಿವಿಧ ರೀತಿಯ ಪ್ರಚಾರ ಕಾರ್ಯ ಕೈಗೊಂಡರೂ ಜಿಲ್ಲೆಯಲ್ಲಿ ಒಟ್ಟಾರೆ ಮತದಾನದ ಪ್ರಮಾಣ ಹೆಚ್ಚಳವಾಗಿದ್ದು, ಕೇವಲ ಶೇ.4 ಮಾತ್ರ!

ಗಿರಿಜನ ಹಾಡಿಗಳಲ್ಲಿ ಟಾಂಟಾಂ: ಮತದಾನದ ದಿನಾಂಕ ಹಾಗೂ ವೇಳೆಯನ್ನು ಜಿಲ್ಲೆಯ ಎಲ್ಲಾ ವಿಧಾನಸಭಾ ಕ್ಷೇತ್ರಗಳು ಹಾಗೂ ವಿಶೇಷವಾಗಿ ಹುಣಸೂರು, ಪಿರಿಯಾಪಟ್ಟಣ ಹಾಗೂ ಎಚ್‌.ಡಿ.ಕೋಟೆ ತಾಲೂಕಿನ ಗಿರಿಜನ ಹಾಡಿಗಳಲ್ಲಿ ಟಾಂಟಾಂ ಮೂಲಕ ಪ್ರಚಾರ ಮಾಡಲಾಗಿದೆ. ಹುಣಸೂರು, ಪಿರಿಯಾಪಟ್ಟಣ, ಕೆ.ಆರ್‌.ನಗರ ಹಾಗೂ ನಂಜನಗೂಡು ತಾಲೂಕು ಕೇಂದ್ರಗಳಲ್ಲಿ ಮತದಾರರ ಜಾಗೃತಿಗಾಗಿ ಬೈಕ್‌ ಜಾಥಾಗಳನ್ನು ನಡೆಸಲಾಗಿದೆ.

ಜಿಲ್ಲೆಯಲ್ಲಿ 6 ಲಕ್ಷಕ್ಕೂ ಹೆಚ್ಚು ಮತದಾನದ ಮಾರ್ಗದರ್ಶನ ಕುರಿತ ಕಿರು ಹೊತ್ತಿಗೆಗಳನ್ನು ಮತದಾರರ ಚೀಟಿ ಜೊತೆಗೆ ವಿತರಿಸಲಾಗಿತ್ತು.
ಮತಯಂತ್ರ, ವಿವಿ ಪ್ಯಾಟ್‌ಗಳನ್ನು ಬಳಸುವ ಬಗ್ಗೆ ಮೈಸೂರು ನಗರದ ಎಲ್ಲಾ ಮಾಲ್‌ಗ‌ಳಲ್ಲಿ, ಮೈಸೂರು ಅರಮನೆ, ಮೃಗಾಲಯ ಮತ್ತು ಸರ್ಕಾರಿ ಕಚೇರಿಗಳಲ್ಲಿ ಪ್ರಾತ್ಯಕ್ಷತೆ ನೀಡಲಾಗಿತ್ತು.

ವಿಶೇಷ ಕಾರ್ಯಕ್ರಮ: ಪ್ರತಿ ವಿಧಾನಸಭಾ ಕ್ಷೇತ್ರದಲ್ಲೂ ಕಡಿಮೆ ಮತದಾನ ಆಗಿರುವ ಶೇ.10 ಮತಗಟ್ಟೆಗಳನ್ನು ಗುರುತಿಸಿ, ಸ್ವೀಪ್‌ ಸಮಿತಿಯಿಂದ ಅಂತಹ ಮತಗಟ್ಟೆಗಳಿಗೆ ವಿಶೇಷ ಗಮನಹರಿಸಿ ಪ್ರತಿ ಮನೆಗೂ ಭೇಟಿ ನೀಡಿ ಮತದಾನ ಮಾಡಲು ಪ್ರೇರೇಪಿಸಲಾಗಿತ್ತು. ಅದರಲ್ಲೂ ವಿಶೇಷವಾಗಿ 2013ರ ವಿಧಾನಸಭಾ ಚುನಾವಣೆಯಲ್ಲಿ ಮೈಸೂರು ನಗರದ ಚಾಮರಾಜ(ಶೇ.55.11), ಕೃಷ್ಣರಾಜ(ಶೇ.58.49) ಮತ್ತು ನರಸಿಂಹರಾಜ ಕ್ಷೇತ್ರ(ಶೇ.54.44) ಮತದಾನವಾಗಿತ್ತು.

ಹೀಗಾಗಿ ಮತದಾನದ ಪ್ರಮಾಣವನ್ನು ಉತ್ತಮಪಡಿಸಲು ಆಯಾ ಪ್ರದೇಶದಲ್ಲಿ ಸ್ವೀಪ್‌ ಸಮಿತಿಯಿಂದ ಮನೆ ಮನೆಗೆ ಭೇಟಿ ನೀಡಿ ಕಡ್ಡಾಯ ಮತದಾನದ ಬಗ್ಗೆ ಮನವರಿಕೆ ಮಾಡಿಕೊಟ್ಟಿದ್ದಲ್ಲದೆ, ಮತದಾರರು ಕಡ್ಡಾಯವಾಗಿ ಮತಗಟ್ಟೆಗಳಿಗೆ ಬಂದು ಮತದಾನ ಮಾಡುವ ಬಗ್ಗೆ ಮಾನವ ಸರಪಳಿ, ಜಾಥಾ ಮೊದಲಾದ ಕಾರ್ಯಕ್ರಮಗಳ ಮೂಲಕ ತಿಳಿವಳಿಕೆ ಮೂಡಿಸಲಾಗಿತ್ತು.

ವಿಶೇಷ ಮತಗಟ್ಟೆ: ಮಹಿಳಾ ಮತದಾರರನ್ನು ಆಕರ್ಷಿಸಲು ಮಹಿಳಾ ಮತದಾರರು ಹೆಚ್ಚಿರುವ ಮತಗಟ್ಟೆಗಳಲ್ಲಿ ಕೆಲವನ್ನು ಆಯ್ಕೆ ಮಾಡಿಕೊಂಡು ಜಿಲ್ಲೆಯಲ್ಲಿ 24 ಮತಗಟ್ಟೆಗಳನ್ನು ಸಖೀ ಮತಗಟ್ಟೆಗಳೆಂದು ಹೆಸರಿಸಲಾಗಿತ್ತು.

ಗಿರಿಜನರನ್ನು ಮತಗಟ್ಟೆಗೆ ತರಲು ಎಚ್‌.ಡಿ.ಕೋಟೆ, ಹುಣಸೂರು, ಪಿರಿಯಾಪಟ್ಟಣಗಳಲ್ಲಿ ಆದಿವಾಸಿಗಳಿಗಾಗಿಯೇ ವಿಶೇಷ ಮತಗಟ್ಟೆಗಳನ್ನು ಸ್ಥಾಪಿಸಲಾಗಿತ್ತು. ಇಷ್ಟೆಲ್ಲದರ ಮಧ್ಯೆಯೂ ನಗರ ಪ್ರದೇಶದ ಮತದಾರರು ಮತಗಟ್ಟೆಗೆ ಬರಲು ನಿರುತ್ಸಾಹ ತೋರಿದ್ದಾರೆ. ಇದರ ಪರಿಣಾಮ ಗ್ರಾಮೀಣ ಪ್ರದೇಶದಲ್ಲಿ ದಾಖಲೆಯ ಮತದಾನವಾಗಿದ್ದರೆ, ಮೈಸೂರು ನಗರದ ಕೃಷ್ಣರಾಜ-ಶೇ.58.86, ಚಾಮರಾಜ-ಶೇ.59.18 ಹಾಗೂ ನರಸಿಂಹರಾಜ ಕ್ಷೇತ್ರದಲ್ಲಿ ಶೇ.61.43 ಮತದಾನವಾಗಿದೆ.

ಮೈಸೂರಿನ ವಿದ್ಯಾರಣ್ಯಪುರಂ ನಿವಾಸಿ ಪ್ರವೀಣ್‌ ಕುಮಾರ್‌ ಮನೆಗೆ ಚುನಾವಣಾ ಆಯೋಗದಿಂದ ನೀಡಲಾದ ಗುರುತಿನ ಚೀಟಿಯಲ್ಲಿ ಹೆಸರಿಸಲಾಗಿದ್ದ ಕನಕಗಿರಿ ಸರ್ಕಾರಿ ಶಾಲೆಯ ಮತಗಟ್ಟೆಗೆ ಮತದಾನ ಮಾಡಲು ಬೆಳಗ್ಗೆ 10ಗಂಟೆಗೆ ಉತ್ಸಾಹದಿಂದ ಹೋದರೆ, ಅಲ್ಲಿನ ಮತದಾರರ ಪಟ್ಟಿಯಲ್ಲಿ ಇವರ ಹೆಸರನ್ನೇ ತೆಗೆದುಹಾಕಲಾಗಿತ್ತು. ಮೂರ್‍ನಾಲ್ಕು ಮತಗಟ್ಟೆಗಳಲ್ಲಿ ವಿಚಾರಿಸಿದರೂ ಹೆಸರು ಪತ್ತೆಯಾಗಲಿಲ್ಲ.

ಹೀಗಾಗಿ ಸಹಾಯವಾಣಿ 1950ಗೆ ಕರೆ ಮಾಡಿದಾಗ ಮನೆಯಿಂದ 2 ಕಿಲೋ ಮೀಟರ್‌ ದೂರವಿರುವ ಗೌರಿಶಂಕರ ನಗರದ ಗೌರಿಶಂಕರ ಹೈಸ್ಕೂಲ್‌ ಮತಗಟ್ಟೆಗೆ ಹೋಗುವಂತೆ ತಿಳಿಸಲಾಯಿತು. ಈ ಹುಡುಕಾಟದ ಪರಿಣಾಮ ಮಧ್ಯಾಹ್ನ 3ಗಂಟೆ ವೇಳೆಗೆ ಮತದಾನ ಮಾಡಬೇಕಾಯಿತು. ಆದರೆ, ಮತಗಟ್ಟೆ ಬಗ್ಗೆ ಮಾಹಿತಿ ಇರುವ ಸಂದೇಶ ರಾಜ್ಯ ಮುಖ್ಯ ಚುನಾವಣಾಧಿಕಾರಿ ಕಚೇರಿಯಿಂದ ಭಾನುವಾರ ಮಧ್ಯಾಹ್ನ 3.20ಕ್ಕೆ ಮೊಬೈಲ್‌ಗೆ ಸಂದೇಶ ಬಂದಿದೆ. ಇಷ್ಟೆಲ್ಲಾ ಸುತ್ತಾಡಿಸಿದರೆ ಮತದಾರರು ಹೇಗೆ ಮತಗಟ್ಟೆಗೆ ಬರುತ್ತಾರೆ ಎಂದು ಪ್ರಶ್ನಿಸುತ್ತಾರೆ ಅವರು.

* ಗಿರೀಶ್‌ ಹುಣಸೂರು