ರಾಣಿಬೆನ್ನೂರ: ಜನನಿಬಿಡ ಪ್ರದೇಶವಾದ ನಗರದ ಮಧ್ಯೆ ಭಾಗದ ಎಂ.ಜಿ. ರಸ್ತೆಯಲ್ಲಿರುವ ಜನತಾ ಬಜಾರದ 20
ಮಳಿಗೆಗಳು ಶಿಥಿಲಗೊಂಡಿದ್ದು, ಇಂದು ನಾಳೆ ಕುಸಿಯುವ ಆತಂಕವಿದ್ದು, ವ್ಯಾಪಾರಸ್ಥರು ಜೀವ ಕೈಯಲ್ಲಿ ಹಿಡಿದುಕೊಂಡು ವ್ಯಾಪಾರ ಮಾಡುತ್ತಿದ್ದಾರೆ.
ಸುಮಾರು 60 ವರ್ಷಗಳ ಹಿಂದೆಯೇ ಎಂ.ಜಿ. ರಸ್ತೆಯಲ್ಲಿ ಸಣ್ಣ ಪುಟ್ಟ ವ್ಯಾಪಾರಸœರಿಗೆ ಹಾಗೂ ಸಹಕಾರಿ ಸಂಘ-ಸಂಸ್ಥೆಗಳಿಂದ ಜನತೆಗೆ ಕಡಿಮೆ ದರದಲ್ಲಿ ದಿನ ಬಳಕೆ ವಸ್ತುಗಳನ್ನು ವಿರಿಸಲು ಅನುಕೂಲವಾಗಲಿ ಎಂಬ ಉದ್ದೇಶದಿಂದ ನಗರಸಭೆ ಜನತಾ ಬಜಾರ್‌ ನಿರ್ಮಿಸಿತ್ತು. ಅಂದು ನಗರಭೆಯ 32 ಮಳಿಗೆಗಳ ಸಂಕೀರ್ಣವನ್ನು ಹೊರತುಪಡಿಸಿ ಬೇರಾವ ಮಳಿಗೆಯೂ ಇಲ್ಲಿ ಇರಲಿಲ್ಲ. ಈ ಕಟ್ಟಡದಲ್ಲೇ ಶಾಸಕರಾದ ಕೆ.ಬಿ. ಕೋಳಿವಾಡ ಅವರು ಕಂಜುಮರ್ಸ್‌ ಕೋ ಆಪ್‌ ಸೊಸೈಟಿಯನ್ನು ಪ್ರಾರಂಭಿಸಿದ್ದರು. ಆದರೆ ಅದು ನಷ್ಟವಾಗಿ ಹರಾಜಿನಲ್ಲಿ ಅಲ್ಲಿಯ ಎಲ್ಲಾ ವಸ್ತುಗಳ ಮಾರಾಟವನ್ನು ಮಾಡಲಾಯಿತು.
ಜನತಾ ಬಜಾರ್‌ ಕಟ್ಟಡದಲ್ಲಿ ಸುಮಾರು 25ರಿಂದ 30 ಅಂಗಡಿಗಳಿವೆ. ಇದರಲ್ಲಿ ಬಣ್ಣದ ಅಂಗಡಿಗಳು, ಪುಸ್ತಕ, ಔಷಧಿ, ಹೋಟೆಲ್‌, ಪಾತ್ರೆ, ಪಾನಬೀಡಾ ಅಂಗಡಿಗಳು ಸೇರಿದಂತೆ ಇತರ ಅಂಗಡಿಗಳಿವೆ. ಇಲ್ಲಿ ವ್ಯಾಪಾರ ಭರ್ಜರಿಯಾಗಿ ನಡೆಯುತ್ತಿದೆ. ಕಡಿಮೆ ಬಾಡಿಗೆಗೆ ಜನನಿಬಿಡ ಪ್ರದೇಶದಲ್ಲಿ ದೊಡ್ಡ ದೊಡ್ಡ ಮಳಿಗೆಗಳು ಸಿಕ್ಕಿರುವುದರಿಂದ ವ್ಯಾಪಾರಸ್ಥರು ನಿಶ್ಚಿಂತೆಯಿಂದಿದ್ದಾರೆ. ಆದರೆ ಕಟ್ಟಡ ಶಿಥಿಲಗೊಂಡಿದ್ದು, ಯಾವುದೇ ಕ್ಷಣದಲ್ಲಾದರೂ ಬೀಳುವ ಹಂತದಲ್ಲಿದೆ.
ಈ ಕಟ್ಟಡದ ಬಗ್ಗೆ ನಗರ ಸಭೆಯ ಯಾವುದೇ ಅಧಿಕಾರಿಗಳು, ಜನ ಪ್ರತಿನಿಧಿಗಳು ತಲೆ ಕೆಡಿಸಿಕೊಳ್ಳುವ ಗೋಜಿಗೆ ಹೋಗಿಲ್ಲ. ಈ ಹಿಂದೆ ಕಟ್ಟಡದಲ್ಲಿ ಸಾರ್ವಜನಿಕ ಗ್ರಂಥಾಲಯವಿತ್ತು. ಸುಮಾರು 10 ವರ್ಷಗಳ ಹಿಂದೆಯೇ ಗ್ರಂಥಾಲಯಕ್ಕೆ ಬರುವ ಓದುಗರು ಕಟ್ಟಡದ ಭದ್ರತೆಯ ವಿರುದ್ಧ ಹೋರಾಟ ಮಾಡಿದಾಗ ನಗರ ಸಭೆಯ ಅಧಿಕಾರಿಗಳು ಗ್ರಂಥಾಲಯವನ್ನು ನಗರಸಭೆಯ ಕಟ್ಟಡಕ್ಕೆ ಸ್ಥಳಾಂತರಿಸಿದ್ದಾರೆ. ಅಲ್ಲಿಂದ ಇಲ್ಲಿಯವರೆಗೆ ಈ ಕಟ್ಟಡ ನೆಲಸಮ ಮಾಡಿ ಹೊಸ ಕಟ್ಟಡ ನಿರ್ಮಾಣ ಮಾಡುವಂತೆ ಸಾರ್ವಜನಿಕರು ನಗರಸಭೆಗೆ ಅನೇಕ ಬಾರಿ ಮನವಿ ಸಲ್ಲಿಸುತ್ತಾ ಬಂದಿದ್ದರೂ ಈವರೆಗೂ ಅಧಿಕಾರಿಗಳು ಯಾವುದೇ ಕ್ರಮ ಕೈಗೊಂಡಿಲ್ಲ.
ಇದೇ ರೀತಿ ಜನತಾ ಬಜಾರ್‌ ಎದುರಿಗೆ ಎಂ.ಜಿ. ರಸ್ತೆಯಲ್ಲಿ 32 ಮಳಿಗೆಗಳು ಕೂಡ ಶಿಥಿಲಾವಸ್ಥೆಗೆ ತಲುಪಿದ್ದರು ಸಹ ಅಧಿಕಾರಿಗಳು ಯಾವುದೇ ಕ್ರಮಕ್ಕೆ ಮುಂದಾಗಿರಲಿಲ್ಲ. ಆಗ ರವಿ ಟೆಕ್ಸಟೈಲ್ಸ್‌ ಕುಸಿದು ಕೆಲಸಗಾರನೊಬ್ಬ ಮೃತಪಟ್ಟು ಒಂದು ವರ್ಷದ ಬಳಿಕ ನಗರ ಸಭೆಯ ಅಧಿಕಾರಿಗಳು ಎಚ್ಚೆತ್ತುಕೊಂಡು ಮಳಿಗೆಗಳನ್ನು ನೆಲಸಮಗೊಳಿಸಿ ಹೊಸ ಮಳಿಗೆಗಳನ್ನು ನಿರ್ಮಾಣ ಮಾಡಿದ್ದಾರೆ. ಈಗ ಜನತಾ ಬಜಾರ ಕಟ್ಟಡವನ್ನು ತುರ್ತಾಗಿ ನೆಲಸಮಗೊಳಿಸದಿದ್ದರೆ ಅನಾಹುತವಾಗುವ ಸಾಧ್ಯತೆಯಿದೆ. ಈಗಾಗಲೇ ಸೋರುತ್ತಿರುವ ಮಳಿಗೆಗಳಲ್ಲಿ ಬಿರುಕು ಬಿಟ್ಟಿದೆ. ಅಲ್ಲದೆ ಮೇಲ್ಚಾವಣೆ ಕಾಂಕ್ರೀಟ್‌ ಕಿತ್ತು ಹೋಗಿ ಕಬ್ಬಿಣದ ಸಲಾಕೆಗಳು ಹೊರಗೆ ಕಾಣಿಸುತ್ತಿವೆ. ನಿತ್ಯ ಸಾವಿರಾರು ಜನರು ಒಡಾಡುವ ಪ್ರದೇಶದಲ್ಲಿ ಕಟ್ಟಡ ಕುಸಿದು ಅನಾಹುತ ಸಂಭವಿಸುವ ಪೂರ್ವದಲ್ಲಿ ನಗರಸಭೆ ಅಧಿಕಾರಿಗಳು ಎಚ್ಚೆತ್ತುಕೊಳ್ಳಬೇಕಿದೆ.
ಮಂಜುನಾಥ ಎಚ್‌. ಕುಂಬಳೂರ
