ಧೋನಿ 350 ಸಿಕ್ಸರ್‌ ಸಾಧನೆ

ಬೆಂಗಳೂರು: ಮಹೇಂದ್ರ ಸಿಂಗ್‌ ಧೋನಿ ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ 350 ಸಿಕ್ಸರ್‌ ಬಾರಿಸಿದ ಭಾರತದ ಮೊದಲ ಕ್ರಿಕೆಟಿಗನೆಂಬ ಹಿರಿಮೆಗೆ ಪಾತ್ರರಾಗಿದ್ದಾರೆ. 

ಬುಧವಾರ ಆಸ್ಟ್ರೇಲಿಯ ವಿರುದ್ಧ ಮೊದಲನೆಯ ಸಿಕ್ಸರ್‌ ಬಾರಿಸಿದಾಗ ಅವರಿಂದ ಈ ಸಾಧನೆ ದಾಖಲಾಯಿತು. ಅವರ ಒಟ್ಟು ಸಿಕ್ಸರ್‌ಗಳ ಸಂಖ್ಯೆ ಈಗ 352ಕ್ಕೆ ಏರಿದೆ. ಟೆಸ್ಟ್‌ನಲ್ಲಿ 78, ಏಕದಿನದಲ್ಲಿ 222, ಟಿ20ಯಲ್ಲಿ 52 ಸಿಕ್ಸರ್‌ ಬಾರಿಸಿದ್ದಾರೆ. 

ಏಶ್ಯ ಇಲೆವೆನ್‌ ಪರ ಏಕದಿನದಲ್ಲಿ ಅವರು 7 ಸಿಕ್ಸರ್‌ ಬಾರಿಸಿದ್ದು ಈ ಲೆಕ್ಕಾಚಾರದಲ್ಲಿ ಸೇರಿಕೊಂಡಿದೆ.
ರೋಹಿತ್‌ ಶರ್ಮ ಅವರದು 349 ಸಿಕ್ಸರ್‌ಗಳ ಸಾಧನೆ. ಒಂದು ವೇಳೆ ಅವರು ಬುಧವಾರ ಕಣಕ್ಕಿಳಿದಿದ್ದರೆ, 350ನೇ ಸಿಕ್ಸರ್‌ ಬಾರಿಸಿದ ಮೊದಲನೇ ಭಾರತೀಯನೆನಿಸಿಕೊಳ್ಳುವ ಅವಕಾಶವಿತ್ತು.